Pájina aktualizada iha 16:25h, sabado 29 Fevereiru

CNRT hasoru malu ho PR hodi analiza krizi polítika

23 de Janeiro de 2020, 17:52

Delegasaun hosi Congresso Nacional da Reconstrução Timorense (CNRT) transmiti ona, iha loron-kinta ne'e, ba Prezidente Timor-Leste disponibilidade hodi ajuda hetan solusaun ida ba krizi polítika iha nasaun.


"Ami agradese ba señor Prezidente hodi konvida CNRT. Ha'u senti onradu mai iha ne'e hodi ko'alia hafoin xumbu ba orsamentu. Ami tenki ko'alia hamutuk no rona orientasaun hosi Prezidente", hatete hosi Francisco Kalbuadi, sekretáriu-jeral partidu nian ba jornalista sira hafoin enkontru.

"Ami ko'alia ona ho señor Prezidente ne'ebé hahú ohin prosesu prosesu audisaun ho partidu sira no sosiedade sivil, líder relijiozu sira hodi hetan solusaun ida. Ami hatudu ona ami nia vontade tomak, tuir orientasaun hosi prezidente [CNRT nian, Xanana Gusmão]", nia hatete.

Delegasaun entrega ona ba xefe Estadu, Francisco Guterres Lu-Olo, karta ida hosi Xanana Gusmão kona-ba situasaun maibé la fó sai nia konteúdu.

"Pozisaun hosi prezidente [CNRT] aprezenta ona iha karta. Ha'u entrega ona karta ne'e ba señor Prezidente Repúblika", nia hatete.

Kalbuadi invoka ona artigu 74 hosi konstituisaun ne'ebé refere ba kompeténsia sira hosi Prezidente Repúblika hanesan "símbolu no garanti independénsia nasional nian, unidade Estadu nian no funsionamentu regular hosi instituisaun demokrátiku sira".

Hatán kona-ba kauza, Kalbuadi hatete katak "laiha ema ida maka ko'alia kona-ba Governu foun" no tenki hein konkluzaun hosi prosesu audisaun ba forsa sira hotu nasaun nian, hodi buka hetan solusaun ida.

Maski nune'e, nia insisti ona katak objetivu maka hetan solusaun ida ne'ebé garanti "dame ho estabilidade nasional".

Kona-ba estadu koligasaun Governu nian, Aliansa Mudansa ba Progresu (AMP), Kalbuadi la komenta deklarasaun hosi primeiru-ministru, Taur Matan Ruak, ne'ebé hatete katak koligasaun "laiha ona" hafoin deputadu sira CNRT nian halo abstensaun no vota kontra hasoru Orsamentu Jeral Estadu (OJE) nian, ne'ebé hamosu xumbu iha loron-sesta liubá.

Kona-ba AMP nian futuru nia hatete katak desizaun sira sei foti ho diálogu sira entre partidu tolu ne'ebé halo parte - CNRT, Partidu Libertasaun Popular (PLP) hosi Taur Matan Ruak ho Kmanek Haburas Unidade Nacional Timor Oan (KHUNTO) – no desizaun sira sei foti iha konferénsia nasional.

Kalbuadi la hatete bainhira maka sei halo konferénsia AMP nian, hodi esplika de'it katak "tenki hein" audisaun sira hosi xefe Estadu nian.

Lu-Olo konvoka ona enkontru oioin ho partidu sira ne'ebé iha fatin iha parlamentu, jurista sira, eis-kombatente sira, sosiedade sivil ho líder relijiozu sira, iha prosesu ne'ebé hotu iha loron 04 Fevereiru ho konvokatória hosi Konsellu Estadu nian.

Iha loron-kinta ne'e, sei halo mós reuniaun entre Lu-Olo ho delegasaun ida hosi Kmanek Haburas Unidade Nacional Timor Oan (KHUNTO), partidu datoluk AMP nian, ho dirijente sira hosi partidu sira ne'ebé ki'ik liu iha parlamentu, União Democrática Timorense (UDT) ho Frente Mudansa (FM).

Iha loron-sesta ajenda mós enkontru ho Frente Revolucionária do Timor-Leste Independente (Fretilin), partidu boot ho fatin iha parlamentu, atualmente iha opozisaun.

Lusa

 


Comentários

Critério de publicação de comentários