Pájina aktualizada iha 16:23h, sabado 29 Fevereiru

Partidu KHUNTO sei fó apoiu "máximu" ba desizaun ruma hosi PR kona-ba krizi polítika

23 de Janeiro de 2020, 18:19

KHUNTO, forsa datoluk hosi koligasaun Governu nian, repete fali, iha loron-kinta, apoiu "máximu" ba desizaun ruma ne'ebé maka Prezidente Timor-Leste sei foti hodi rezolve krizi polítika atual iha nasaun.


"KHUNTO konfia iha desizaun hosi Prezidente Repúblika no KHUNTO sei fó nia apoiu máximu ba desizaun ruma hosi señor Prezidente", esplika hosi prezidente Kmanek Haburas Unidade Nacional Timor Oan (KHUNTO), Armanda Berta dos Santos, ba jornalista sira.

Líder KHUNTO nian, forsa datoluk hosi Aliansa Mudansa ba Progresu (AMP), ne'ebé apoia Governu, ko'alia ba jornalista sira hafoin enkontru ida ho Prezidente timoroan, Francisco Guterres Lu-Olo, ne'ebé hakarak rona líder polítiku sira no sosiedade sivil kona-ba situasaun atual iha nasaun.

Berta dos Santos hatete katak delegasaun sira defende ona nesesidade hosi diálogu boot ida ne'ebé halo parte forsa nasional sira hodi hetan solusaun ida ba krizi ne'ebé mosu hosi xumbu ba Orsamentu Jeral Estadu (OJE) ba tinan 2020.

Iha loron-segunda, primeiru-ministru ho líder hosi Partidu Libertasaun Popular (PLP) - forsa daruak AMP nian - afirma ona katak koligasaun "laiha ona" hafoin deputadu sira hosi CNRT halo abstensaun no vota kontra hasoru OJE nune'e hamosu xumbu iha loron-sesta liubá.

Responsável hosi KHUNTO invoka ona artigu 86 hosi konstituisaun kona-ba kompeténsia sira hosi Prezidente Repúblika kona-ba órgaun sira seluk.

Entre aspetu sira seluk, artigu refere kompeténsia hosi xefe Estadu hodi "sobu Parlamentu Nasional, iha kazu hosi krizi institusional todan ne'ebé la permiti formasaun hosi Governu ka aprovasaun hosi Orsamentu Jeral Estadu nian hosi períudu ida ne'ebé boot liu loron 60, ho audisaun previa hosi partidu polítiku sira ne'ebé iha fatin iha parlamentu no rona Konsellu Estadu".

No hanesan mós kompeténsia Prezidente nian hodi "demiti Governu no hasai primeiru-ministru", maibé determina de'it katak ne'e akontese "bainhira nia programa rejeitadu hosi Parlamentu Nasional ba dala rua konsekutivu".

Lei la ko'alia kona-ba demisaun hosi xefe Governu nian bainhira laiha aprovasaun ba orsamentu.

Lu-Olo konvoka ona enkontru oioin ho partidu sira ne'ebé iha fatin iha parlamentu, jurista sira, eis-kombatente sira, sosiedade sivil ho líder relijiozu sira, iha prosesu ne'ebé hotu iha loron 04 Fevereiru ho konvokatória hosi Konsellu Estadu nian.

Iha loron-kinta ne'e, sei halo mós reuniaun entre Lu-Olo ho delegasaun ida hosi Kmanek Haburas Unidade Nacional Timor Oan (KHUNTO), partidu datoluk AMP nian, ho dirijente sira hosi partidu sira ne'ebé ki'ik liu iha parlamentu, União Democrática Timorense (UDT) ho Frente Mudansa (FM).

Iha loron-sesta ajenda mós enkontru ho Frente Revolucionária do Timor-Leste Independente (Fretilin), partidu boot ho fatin iha parlamentu, atualmente iha opozisaun.

Lusa

 


Comentários

Critério de publicação de comentários