Pájina aktualizada iha 16:57h, sabado 29 Fevereiru

Bolsonaro to'o iha Índia ba vizita ofisial dahuluk

25 de Janeiro de 2020, 01:49

Prezidente Brazil nian, Jair Bolsonaro, to'o iha loron-sesta ne'e iha Nova Deli ba vizita ofisial dahuluk durante loron haat iha Índia, ne'ebé, aleinde halo reuniaun sira ho primeiru-ministru indianu, Narendra Modi, sei dezenvolve ajenda ida ho karáter ekonómiku.


Aviaun hosi xefe Estadu brazileiru, ne'ebé halo viajen akompaña hosi nia feen, Michelle Bolsonaro, no oan-feto na'in ida, halo ona eskala iha Luanda, Angola, no Nairobi, Kénia, antes tuun iha baze aéreu Palam, iha kapital indianu, ne'ebé komitiva brazileiru simu ona hosi visi-ministru Relasaun Exterior sira nian.

Bolsonaro, iha nia vizita Estadu dahuluk ba Índia dezde sa'e ba poder iha tinan ida liubá, sei hanesan konvidadu prinsipal iha loron-domingu ne'e hosi komemorasaun sira ho desfile militar ba Loron Repúblika ba dala 71, ne'ebé selebra aprovasaun hosi Konstituisaun indianu.

Prezidente brazileiru sei hahú ajenda ofisial iha loron-sábadu ho resepsaun ofisial iha palásiu prezidensial hosi Rashtrapati Bhawan no oferta ai-funan tradisional ne'ebé líder estranjeiru sira halo bainhira to'o iha nasaun aziátiku iha memorial hosi líder istóriku Mahatma Gandhi.

Tuirmai, Bolsonaro halo reuniaun dahuluk ho ministru Relasaun Exterior Índia nian, Subrahmanyam Jaishankar, antes iha enkontru bilateral ida ho Modi, ne'ebé sei halo dahuluk entre líder na'in rua no hafoin aumenta ho ministru oioin, na'in hitu hosi Gabinete Bolsonaro nian.

Bolsonaro ho Modi sei halo deklarasaun hamutuk ida ba imprensa.

Iha loron hanesan, Prezidente Brazil nian sei simu hosi xefe Estadu indianu, Ram Nath Kovind, ne'ebé sei oferese mós bankete ofisial ida hodi fó homenajen ba hóspede.

Iha loron-domingu, nia sei partisipa nu'udar konvidadu prinsipal no, hamutuk ho Modi, iha komemorasaun sira hosi Loron Repúblika nian no sei asisti ba demonstrasaun hosi poder militar Índia nian.

Ikusmai, iha loron-segunda, hala'o Fórum Emprezarial Índia-Brazil, ne'ebé sei partisipa autoridade sira ho emprezáriu sira hosi nasaun rua, ne'ebé durante vizita ne'e hein atu asina pelumenus akordu hamutuk 15, liuliu ekonómiku sira, inklui akordu ida hosi investimentu no akordu rua hodi fasilita troka petróleu sira, gás ho biokombustível sira.

Iha loron hanesan no antes fila ba Brazília, Bolsonaro sei halo vizita lalais ida ba sidade istórika Agra, fatin ne'ebé maka lokaliza palásiu Taj Mahal, monumentu ne'ebé koñesidu liu iha Índia.

Líder na'in rua hasoru malu ba dala ikus durante Simeira ba dala 11 hosi BRICS (bloku ne'ebé harii hosi Brazil, Rúsia, Índia, Xina ho Áfrika-Súl) ne'ebé halo iha fulan-Novemnru liubá iha kapital brazileiru nian.

Lusa

 


Comentários

Critério de publicação de comentários