Pájina aktualizada iha 16:57h, sabado 29 Fevereiru

Vírus: Kazu rejista iha provínsia hamutuk 29 hosi provínsia xineza 31

25 de Janeiro de 2020, 02:30

Koronavírus foun ne'ebé maka detekta iha fulan liubá iha sidade Wuhan rejista ona iha provínsia hamutuk 29 hosi provínsia hamutuk 31 hosi Xina, haktuir hosi autoridade sira saúde nian ne'ebé maka haktuir hosi ajénsia notísia ofisial Xinhua.


Komisaun Nasional Saúde nian aumenta ona, iha loron-sesta ne'e, númeru hosi vítima mortal ba na'in 25 no na'in 830 hosi númeru pasiente sira ne'ebé infetadu. Aleinde kazu sira ne'ebé konfirmadu, iha tan kazu suspeitu hamutuk 1.000 ne'ebé maka hato'o iha provínsia hamutuk 20 iha nasaun, indika.

Maibé, jornal South China Morning Post, ne'ebé haktuir Diáriu Povu nian, jornal ofisial hosi Partidu Komunista, hatete ema mate na'in 26 no kazu infesaun hamutuk 878.

Vítima mate ida akontese dook hosi episentru hosi vírus, iha Heilongjiang, besik fronteira ho Rúsia, hatete hosi autoridade lokal sira iha loron-sesta ba ajénsia notísia France-Presse (AFP).

Atu hapara propagasaun hosi vírus, autoridade xinés sira aumenta ona iha loron-sesta ne'e kuarantena no taka ona transporte hosi sidade hamutuk 13 no kondadu sira iha provínsia Hubei, ne'ebé iha Wuhan hanesan kapital, afeta liu ema millaun 40 resin.

Autoridade sira saúde nian alerta ona populasaun atu evita reuniaun familiar sira no eventu públiku sira durante períudu Tinan Foun Lunar ne'ebé hahú iha sábadu.

Epidemia mosu iha momentu ida ne'ebé ema xinés millaun resin halo viajen, tanba okaziaun hosi Tinan Foun Xinés nian, festa prinsipal hosi família xinés sira ne'ebé ekivale hanesan natal hosi nasaun osidental sira.

Tuir Ministériu Transporte xinés, nasaun sei rejista total ida hosi viajen interna hamutuk biliaun tolu iha períudu ne'e.

Iha loron-kinta, Organizasaun Mundial Saúde (OMS) hili ona hodi la deklara emerjénsia internasional ida hasoru epidemia koronavírus ne'ebé maka detekta iha sidade Wuhan.

Maibé, rezerva ona posibilidade hodi hasoru malu ho komité iha futuru hodi ko'alia fali kona-ba eventual emerjénsia internasional ida ne'ebé sei implika implementasaun hosi medida preventiva iha nível global.

Kazu rejistadu hamutuk 800 resin hamosu tauk kona-ba potensial epidemia ida ne'ebé hanesan ho pneumonia atípika ida ka Síndrome Respiratória Aguda Grave (SARS), ne'ebé entre tinan 2002 ho 2003 halo ona ema na'in 650 mate iha Xina kontinental ho Hong Kong.

Aleinde Xina kontinental, detekta ona kazu sira iha Makau, Tailándia, Taiwan, Hong Kong, Koreia-Súl, Japaun, Vietname, Singapura ho Estadus Unidus. Além da China continental, foram já detetados casos em Macau, Tailândia, Taiwan, Hong.

Iha loron-sesta ne'e, autoridade sira Singapura nian konfirma ona kazu rua, aumenta nune'e ba kazu tolu hosi númeru total hosi pasiente sira ne'ebé afetadu hosi pneumonia virua ne'e iha sidade-estadu.

Pasiente sira ne'ebé afetadu maka feto na'in ida ho tinan 53 no mane na'in ida ho tinan 37 ne'ebé to'o iha Singapura iha loron-tersa, mai hosi sidade xineza Wuhan.

Lusa

 


Comentários

Critério de publicação de comentários