Pájina aktualizada iha 18:07h, sesta-feira 07 Agostu

Vírus: Timor-Leste aprova restrisaun ba entrada hosi estranjeiru sira ne'ebé mai hosi Xina

06 de Fevereiro de 2020, 19:29

Iha loron-kuarta ne'e Governu aprova ona restrisaun temporáriu sira ba entrada hosi sidadaun estranjeiru sira ne'ebé mai hosi Repúblika Popular Xina, iha medida ida hodi evita daet hosi koronavírus foun xinés nian.


Rezolusaun aplika mós "medida interdisaun ida ba entrada, iha teritóriu nasional, hosi sidadaun estranjeiru sira ne'ebé iha semana haat ikus ne'e sai ka liu iha tránzitu" iha provínsia xineza Hubei, sentru hosi moras koronavírus foun (2019-nCoV).

Entrada bele hetan autorizasaun "bainhira aprezenta relatóriu médiku ho foto, ne'ebé fó sai hosi instituisaun hospitalar ne'ebé rekoñesidu iha nível internasional", haktuir hosi diploma ne'ebé aprova iha Konsellu Ministru.

Testu rezolusaun determina katak "labele rekuza entrada ba sidadaun nasional sira no sidadaun estranjeiru sira ne'ebé maka moris iha teritóriu Repúblika Demokrátika Timor-Leste nian no ne'ebé maka baibain hela ka hanesan reprezentante legal sira hosi labarik-ki'ik sira ho nasionalidade timoroan ka labarik-ki'ik nasional sira hosi Estadu datoluk ne'ebé hanesan rezidente legal sira iha Timor-Leste ne'ebé maka iha kbiit paternal ka asegura nia sustentu ho edukasaun".

Governu sei haree fali kinzenalmente medida "hodi halo nia manutensaun ka eliminasaun", refere.

Ministru interinu Interior timoroan nian konfirma ona ba Lusa katak desizaun ne'e hanesan úniku ne'ebé maka hili ofisialmente hosi Governu.

Filomeno Paixão subliña ona katak laiha validade ruma despaxu ne'ebé asina hosi responsável polisial ida iha inísiu semana ne'ebé refere ba bandu hosi entrada sidadaun xinés sira nian.

"Dokumentu ne'e la mai hosi Ministériu. Hanesan inisiativu hosi ajente ne'ebé maka reprende ona no hasai ona hosi nia postu. Desizaun úniku kona-ba bandu ne'e foti iha loron-kuarta ne'e", nia esplika.

"Desizaun ne'ebé foti iha loron-kuarta ne'e iha Konsellu Ministru hanesan ho ida ne'ebé maka foti ona hosi Austrália, Indonézia ho Singapura. Ho nasaun tolu foti ona desizaun, Timor-Leste iha ona protesaun", nia refere. Díli iha ligasaun aéreu ho de'it nasaun tolu no fronteira terestre ho Indonézia.

Diploma hatete mós ministra interina Saúde nian, Élia Amaral, hodi implementa, hamutuk ho Ministériu relevante sira, "protokolu sira ne'ebé estabelese hosi Organizasaun Mundial Saúde nian".

Iha konkretu, "estranjeiru ruma ne'ebé to'o iha Timor-Leste, la haree ba proibisaun, no ne'ebé hili atu la fila lalais ba portu orijen nian sei hetan kuarentena obrigatóriu".

Kona-ba sidadaun nasional sira, rezidente permanente sira no nia família sira ne'ebé maka sai ka vizita iha tránzitu iha Repúblika Popular Xina nian, Ministériu Saúde timoroan tenki "sensibiliza sira ba nesesidade hodi tama iha izolamentu voluntáriu durante loron 14 nia laran, ne'ebé apoia hosi profisional sira saúde nian, hahú kedas bainhira to'o iha Timor-Leste".

Élia Amaral esplika ona ba Lusa katak entre "loron-kuarta ho loron-kinta" sei to'o iha Timor-Leste ekipamentu adisional ba triajen hosi pasajeiru sira ne'ebé to'o iha fronteira sira nasaun nian, ho teste sira temperatura nian no deklarasaun médiku ida.

"Dezde hetan vírus, Governu foti hela medida preventiva sira, ho kordenasaun hamutuk ho OMS no serbisu sira imigrasaun nian. Ami iha ema sira iha fronteira sira, ami sei iha ekipamentu limitadu sira, maibé ne'e sei reforsa", nia esplika.

"Ami iha ema na'in 65 hosi Ministériu, voluntáriu sira ho elementu sira hosi Ekipa Surtu nian, hosi Unidade Emerjénsia hosi Hospital Nacional Guido Valadares, hosi servisu epidemiolójiku sira ho Laboratóriu Saúde nian", nia hatete.

Brigada Médiku Xineza sei apoia mós, liuliu hodi tulun funsionáriu timoroan sira iha kontaktu ho sidadaun xinés sira.

Rezolusaun hatete katak "kontrolu reforsadu ida iha postu sira fronteira aéreu nian, rai ho tasi nian, disponibiliza máskara sira ba ema sira iha aeroportu, hosi fronteira rai nian no portu nian, nune'e mós akompaña hosi profisional sira saúde nian ho instrumentu sira ho sukat temperatura isin nian".

Ikusmai, ministru Negósiu Estranjeiru ho Koperasaun, sei kordena ho autoridade xineza sira, "iha manifestu ida solidariedade nian ba Governu ho Povu hosi Repúblika Popular Xina nian, hodi haree ho baze iha relasaun forte koperasaun ho amizade nian entre povu rua no nia kontinuidade".

Sei "instrui mós misaun diplomátiku sira hodi estabelese komunikasaun adekuadu ho autoridade relevante sira hosi nasaun viziñu sira kona-ba medida restritivu sira ne'ebé inkritu iha rezolusaun foun".

Xina aumenta ona iha loron-kuarta ne'e númeru hosi vítima mortal ba na'in 490 no ema infestadu na'in 24.300 resin hanesan balansu hosi moras pneumonia ne'ebé mosu hosi koronavírus foun ida (2019-nCoV) ne'ebé hetan iha Dezembru 2019, iha Wuhan, kapital hosi provínsia Hubei (sentru), ne'ebé tama hela iha kuarentena.

Aleinde teritóriu kontinental Xina nian no rejiaun xineza sira Makau ho Hong Kong, iha kazu infesaun sira ne'ebé konfirma iha nasaun hamutuk 20 resin, kazu foun ikus identifika iha Béljika.

Organizasaun Mundial Saúde (OMS) deklara ona iha loron-kinta liubá hanesan situasaun ida emerjénsia saúde públika nian iha ámbitu internasional ne'ebé hili medida sira prevensaun nian no kordenasaun iha nível mundial.

Lusa

 


Comentários

Critério de publicação de comentários