Pájina aktualizada iha 12:05h, sesta-feira 07 Agostu

CNRT negosia Governu foun bainhira PR fó pose ba membru sira ne'ebé hili ona

11 de Fevereiro de 2020, 20:56

Congresso Nacional da Reconstrução Timorense (CNRT), partidu boot hosi koligasaun Governu nian, aseita negosia de'it ezekutivu foun ruma bainhira Prezidente Repúblika, Francisco Guterres Lu-Olo, rekua no fó pose ba ministru sira hosi partidu ne'e nian.


Xefe bankada CNRT nian, Duarte Nunes, hatete ona ba Lusa katak mudansa hosi pozisaun hosi Francisco Guterres Lu-Olo ne'e hanesan "pré-kondisaun" hodi nune'e forsa polítika, lidera hosi Xanana Gusmão, aseita halo parte iha ezekutivu foun ruma.

"Kondisaun ne'ebé maka hato'o hosi partidu maka bainhira ami harii Governu seluk ida, Prezidente tenki fó pose ba elementu sira ne'ebé hili ona, ba lista ne'ebé maka primeiru-ministru aprezenta ona. Hanesan kondisaun úniku ne'ebé maka ami hato'o", afirma hosi Duarte Nunes iha deklarasaun sira ba Lusa.

Líder hosi bankada CNRT nian halo komentáriu kona-ba deklarasaun sira hosi Prezidente Repúblika, Lu-Olo, hafoin reuniaun ne'ebé nia halo ona ho líder istóriku sira nasaun nian, ne'ebé konvida mós Xanana Gusmão maibé nia la partisipa.

Lu-Olo esplika ona ba jornalista sira katak partisipante sira iha enkontru konkorda ona katak konvoka eleisaun antesipadu hanesan "rekursu ikus" hodi rezolve krizi iha nasaun, atu partidu sira iha parlamentu tenki hetan solusaun ida no atu, to'o iha ne'ebá, primeiru-ministru kontinua hala'o nafatin knaar sira.

Iha parte seluk, Xanana Gusmão afirma ona iha findesemana iha entrevista iha televizaun katak eleisaun antesipadu hanesan solusaun úniku "justu ho demokrátiku" ba krizi polítika iha nasaun, ne'ebé sai aat liu iha Janeiru tanba xumbu hosi Orsamentu Jeral Estadu (OJE) tinan 2020 nian.

Xumbu ne'e, tanba votu sira kontra ho abstensaun hosi deputadu sira CNRT nian, mosu hafoin fulan barak hosi krítika sira CNRT nian hasoru desizaun hosi Lu-Olo hodi rekuza la fó pose ba membru sira Governu nian na'in sanulu resin, maioria hosi Xanana Gusmão nia partidu.

Admiti katak iha posibilidade atu CNRT partisipa iha solusaun governativu alternativa ida, Duarte Nunes hatete katak bainhira "Prezidente mantén pozisaun, kaiha interese hosi partidu" hodi halo.

Iha loron-tersa ne'e, iha parlamentu, Duarte Nunes refere ona ba kontradisaun hosi sira ne'ebé maka hakarak duun CNRT tanba krizi, hodi halo nafatin krítika ba partidu ho nia líder, Xanana Gusmão, no iha tempu hanesan hakarak atu forsa polítika aseita diálogu.

"Ha'u hanoin katak hanesan kontradisaun ida. Laiha lójika pensamentu nian, Presiza koperasaun, partisipasaun CNRT nian no ikusmai maka kanta loron-loron, hakilar inventa buat hotu hasoru CNRT", nia afirma.

Kona-ba situasaun hosi Aliansa Mudansa ba Progresu (AMP), koligasaun pré-eleitoral hosi Governu, Duarte Nunes la konkretiza karik sei iha ka la'e disolusaun formal no hatete katak "entendimentu" maka atual primeiru-ministru "entrega pasta" bainhira iha solusaun alternativu ida.

Lusa

 


Comentários

Critério de publicação de comentários