Pájina aktualizada iha 14:53h, sabado 29 Fevereiru

Fretilin aseita partisipa iha Governu foun bainhira lidera ezekutivu

12 de Fevereiro de 2020, 00:50

Fretilin, partidu boot iha parlamentu no agora daudaun iha opozisaun, aseita de'it halo parte iha ezekutivu foun ida, hanesan solusaun ba krizi polítika iha nasaun, bainhira lidera, hatete hosi nia xefe bankada ba Lusa.


"Sim, ami sei partisipa iha Governu ruma, maibé Governu foun tenki harii hosi Fretilin no lidera hosi Fretilin ho primeiru-ministru ka xefe ezekutivu hosi Fretilin", afirma hosi Aniceto Guterres Lopes ba Lusa.

Maski afirma katak Frente Revolucionária do Timor-Leste Independente (Fretilin) hakarak halo diálogu ho forsa polítika ruma no katak "di'ak liu hanesan diálogu ida lahó pré-kondisaun sira", eis-prezidente Parlamentu nian hatete katak partidu tenki lidera ezekutivu foun.

Hatán kona-bá opsaun sira hosi koligasaun ho Congresso Nacional da Reconstrução Timorense (CNRT), partidu Xanana Gusmão nian no forsa boot hosi koligasaun pré-eleitoral hosi Governu atual, Aniceto Lopes hatete katak Fretilin iha disponibilidade ba opsaun sira hotu.

"Ami iha preferénsia ho aliansa sira ho partidu sira ne'ebé iha fatin iha parlamentu, maibé ami nakloke ba buat hotu", nia hatete.

"Iha nível lideransa sira seidauk iha kontaktu sira hosi partidu sira. Ami hein ona inisiativu hosi Prezidente Repúblika no ami agora hein hela hodi haree partidu ne'ebé maka hakarak hahú diálogu", nia subliña.

Líder hosi bankada Fretilin komenta ona deklarasaun hosi Prezidente Repúblika, Francisco Guterres Lu-Olo, hafoin reuniaun ne'ebé nia promove iha loron-segunda ho líder istóriku sira nasaun nian, ne'ebé Xanana Gusmão hetan konvite maibé la marka prezensa.

Lu-Olo esplika ona ba jornalista sira katak partisipante sira iha enkontru konkorda ona katak konvoka eleisaun antesipadu hanesan "rekursu ikus" hodi rezolve krizi iha nasaun, atu partidu sira iha parlamentu tenki hetan solusaun ida no atu, to'o iha ne'ebá, primeiru-ministru kontinua hala'o nafatin knaar sira.

Iha parte seluk, Xanana Gusmão afirma ona iha findesemana iha entrevista iha televizaun katak eleisaun antesipadu hanesan solusaun úniku "justu ho demokrátiku" ba krizi polítika iha nasaun, ne'ebé sai aat liu iha Janeiru tanba xumbu hosi Orsamentu Jeral Estadu (OJE) tinan 2020 nian.

Xumbu ne'e, tanba votu sira kontra ho abstensaun hosi deputadu sira CNRT nian, mosu hafoin fulan barak hosi krítika sira CNRT nian hasoru desizaun hosi Lu-Olo hodi rekuza la fó pose ba membru sira Governu nian na'in sanulu resin, maioria hosi Xanana Gusmão nia partidu.

Aniceto Guterres Lopes hatete katak Fretilin prontu hodi ajuda hetan solusaun ida ba krizi no rekorda ona katak Lu-Olo nia apelu "halo ona ba partidu sira no tanba ne'e aproximasaun ruma ka kontaktu ruma depende hosi partidu sira".

Lusa

 


Comentários

Critério de publicação de comentários