Pájina aktualizada iha 23:03h, segunda-feira 25 Maiu

Governu buka hetan solusaun ba problema sira ho rejimi duodesimal limitadu

13 de Fevereiro de 2020, 20:50

Ministériu Finansa rekolla hela iha entidade sira Estadu nian lista ida hosi problema sira ne'ebé maka mosu tanba limitasaun rejimi duodésimu nian ne'ebé hala'o dezde inísiu tinan ne'e, haktuir hosi fonte ezekutivu.


Fonte sira hosi ministériu oioin, ne'ebé ko'alia ho Lusa, konfirma ona katak rejimi - ne'ebé aprova lahó restrisaun, la hanesan ho anterior sira - afeta daudaun aspetu oioin sira hanesan kontratu sira manutensaun nian, kuota ba organizmu internasional sira no to'o pensaun ba ema katuas-ferik sira.

Hanesan ezemplu, Ministériu Finansa rasik iha susar sira ho kontratu sira manutensaun nian ba ekipamentu, inklui ba nia elevador sira, ho problema sira iha kontratu sira seluk no iha pagamentu ba prestasaun sira no kuota sira iha organizasaun internasional sira, no seluk tan.

Email sira ne'ebé maka Lusa iha asesu hatudu katak Prezidénsia hosi Konsellu Ministru sira husu ona ba ministériu oioin atu indika problema sira ne'ebé maka akontese hela ho aplikasaun hosi rejimi duodesimal.

Objetivu maka identifika problema sira hotu ne'ebé iha hodi, iha tempu badak, promove reuniaun alargadu ida hodi "hetan solusaun sira".

Problema sira hanesan "konsekuénsia hosi rejimi duodesimal" maibé, liuliu, tanba publika ona dekretu ida ho kritériu orsamental sira "limitadu tebes" duké ne'ebé maka hato'o hosi Finansa.

Fonte hosi Governu konfirma ona ba Lusa katak limitasaun oioin, hodi hasoru ho aspetu sira loron-loron Estadu nian, halo parte hosi proposta dahuluk hosi dekretu-lei hosi rejimi duodesimal ne'ebé maka prepara hosi Ministériu Finansa.

Diploma ikusmai aprova ho testu hanesan iha Konsellu Ministru sira - ho mudansa oituan -, maibé ikusmai hasai tiha restrisaun sira iha redasaun ikus diploma nian ne'ebé maka publika ona iha Jornal Repúblika.

Tanba rejimi atual la kontempla limitasaun ruma, ne'e bele hamosu risku ba validade hosi kontratu oioin, liuliu ba pagamentu semestral hosi pensaun sira hosi katuas-ferik sira, ka bolsa inan nian ne'ebé maka selu trimestralmente, haktuir hosi fonte sira ne'ebé hanesan.

Versaun dahuluk hosi dekretu, ne'ebé hato'o hosi Ministériu Finansa no ne'ebé maka Lusa iha asesu, iha parágrafu rua no artigu extra ida ne'ebé kalkula ona situasaun sira hosi restrisaun ne'e, no ne'ebé maka hasai tiha.

Hosi artigu 3, ne'ebé refere ba "rejimi duodesimal", hanesan ezemplu, hasai tiha determinasaun ida katak "iha situasaun restrisaun no iha fundamentasaun di'ak, membru Governu responsável ba área finansa bele autoriza antesipasaun hosi duodésimu".

No ida seluk ne'ebé determina katak "rejimi duodesimal la aplika ba restrisaun hosi Orsamentu Seguransa Sosial nian, ne'ebé efetua ho baze iha respetivu planu sira hosi tezouraria ne'ebé elabora hosi Institutu Nasional Seguransa Sosial nian, no la ba transferénsia sira hosi Orsamentu Estadu nian ba Orsamentu Seguransa Sosial nian, ne'ebé maka efetuadu ho baze iha nesesidade sira ne'ebé kalkula iha planu sira ne'ebé refere hosi tezouraria".

La halo parte mós iha testu final maka artigu ida ne'ebé permiti "aumentu hosi kompromisu sira" iha kuadru duodesimal, "ho prazu sira to'o tinan ida relasionadu ho kontratasaun hosi ema no akizisaun hosi sasán no serbisu sira" bainhira presiza "hodi garanti funsionamentu di'ak hosi serbisu públiku sira, dezde despeza sira ne'ebé hasai fulan-fulan labele liu hosi limiti sira hosi duodésimu nian".

Rejimi duodésimu, ne'ebe limita maka'as gastu sira Governu nian, presiza tanba Orsamentu Jeral Estadu (OJE) nian ba tinan 2020 la pasa iha Parlamentu Nasional, hamosu krizi polítika ida ne'ebé seidauk iha solusaun.

Dekretu ne'ebé fiksa rejimi duodesimal hanesan limitadu tebes duké iha tinan 2'18, bainhira nasaun hasoru parte barak tinan nian ho duodésimu, no aprova ona iha Janeiru lahó restrisaun ruma.

Dekretu fulan-Janeiru 2018 nian fiksa ona limitasaun oioin, inklui "despeza sira ne'ebé nia fonte finansiamentu sira la'ós hanesan reseita jeral sira Estadu nian", ba transferénsia sira ba embaixada sira no reprezentasaun diplomátiku sira seluk, ka ne'ebé destina hodi "selu tusan sira ne'ebé iha relasaun ho asisténsia médika iha estranjeiru" no hodi sosa ai-moruk sira.

Iha Juñu 2018, bainhira iha ona mandatu hosi Governu atual, ezekutivu aprova ona limitasaun seluk ida ba despeza sira "ne'ebé destina hodi selu pensaun sira katuas-ferik nian no invalidez, nune'e mós ba bolsa inan nian".

Lusa

 


Comentários

Critério de publicação de comentários