Pájina aktualizada iha 12:15h, sesta-feira 07 Agostu

Covid-19: Austrália apoia hela Timor-Leste hodi hatán ba koronavírus foun

20 de Março de 2020, 02:23

Governu australianu serbisu hela ho Timor-Leste hodi ajuda hametin kondisaun sira ho kapasidade sira hodi hatán ba epidemia hosi koronavírus foun, inklui Laboratóriu Nasional, informa hosi Embaixada.


Iha resposta ida ne'ebé hakerek no haruka ba Lusa, Embaixada Austrália nian iha Díli indika ona katak serbisu "besik hela" ho autoridade timoroan sira, kona-ba medida sira prevensaun nian no hodi hatán ba pandemia Covid-19, fornese ona ekipamentu hosi protesaun pesoal ho sasán médiku sira seluk ba funsionáriu sira hosi área saúde nian.

Serbisu mós hodi abastese tan "ekipamentu médiku importante sira", nia refere maibé la espesifika.

Liuhosi Eskola Menzies hosi Investigasaun Médika, Austrália apoia hela laboratóriu timoroan hodi bele halo teste sira ba Covid-19, liuhosi asaun sira formasaun ba funsionáriu sira hosi Hospital Nasional Guido Valadares nian.

Austrália fó sai mós finansiamentu ba programa ASTEROID hodi "hadi'ak kualifikasaun sira hosi funsionáriu sira iha klínika sira iha nasaun tomak hodi ajuda prevene no kontrola infesaun sira hanesan Covid-19".

Apoia mós hodi hadi'a iha estrutura sira izolamentu nian "identifika hosi Timor-Leste iha nia programa hodi hatán ba Covid-19", haktuir hosi nota ne'e.

Kona-ba ema timoroan atus resin ne'ebé iha Austrália tanba halo parte hosi Programa Traballador Sazonal sira no hosi Programa Serbisu Pasífiku, Governu australianu serbisu hela "hodi garanti partisipante sira nia moris di'ak".

Seguru saúde obrigatóriu sei garanti atu "traballador sazonal sira hotu ho partisipante sira iha asesu ba tratamentu médiku hanesan hosi klase mundial ne'ebé maka sidadaun australianu sira iha, bainhira sira iha vírus iha Austrália", hatutan embaixada.

Konsellu sira viajen no saúde nian kona-ba Covid-19 fó sai hela ba traballador sazonal sira hotu liuhosi sira nia empregador sira.

Timor-Leste laiha kazu ruma rejistadu ba Covid-19.

Koronavírus foun, responsável hosi pandemia Covid-19, infeta ona ema rihun 210 resin iha mundu tomak, ne'ebé na'in 8.750 resin mate ona.

Moras ne'e hahú iha Xina, iha Dezembru liubá, no espalla ona ba nasaun ho teritóriu hamutuk 170 halo Organizasaun Mundial Saúde (OMS) deklara hanesan situasaun pandemia nian.

Nasaun sira ne'ebé afetadu liu hafoin Xina maka Itália ho ema na'in 2.978 mate ona hosi kazu hamutuk 35.713, Iraun ho ema na'in 1.135 mate (kazu hamutuk 17.361), España ho ema na'in 638 mate (kazu hamutuk 14.769) ho Fransa ho ema na'in 264 mate (iha kazu hamutuk 9.134).

Hasoru avansu hosi pandemia, nasaun oioin foti ona medida esepsional sira, inklui rejimi kuarentena no taka fronteira sira.

Lusa

 


Comentários

Critério de publicação de comentários