Pájina aktualizada iha 17:35h, kuarta-feira 01 Abril

Covid-19: Governu timoroan lamenta kazu izoladu sira hosi intimidasaun ba ema estranjeiru sira tanba vírus

23 de Março de 2020, 23:37

Ministru Reforma Lejislativu ho Asuntu Parlamentar timoroan nian lamenta ona, iha loron-segunda ne'e akontesimentu hosi kazu izoladu sira hosi intimidasaun ba sidadaun estranjeiru sira iha Timor-Leste tanba hanoin salan katak Covid-19 hanesan moras hosi ema estranjeiru sira.


"Ho triste tebes maka ha'u rona akontesimentu sira ne'e. Governu sei halo esforsu tomak hodi hapara ho asaun izoladu sira ne'e", hatete hosi ministru Fidelis Magalhães ba Lusa.

"Ami tenki insentiva no promove tan espíritu solidáriu, liuliu hasoru tema sira susar ne'e", nia konsidera.

Sidadaun estranjeiru balun reporta iha loron hirak ikus ne'e ba Lusa insidente oioin, laiha insidente todan ida, hosi kazu sira ne'ebé sira hetan intimidasaun, ho uzu liafuan hanesan "korona malae", hanesan liafuan ne'ebé uza baibain iha Timor-Leste hodi refere ba ema estranjeiru sira.

Iha loron-domingu, loja xinés oioin iha Timor-Leste taka mós tanba sai hanesan vítima intimidasaun nian, maski hafoin komunidade emprezarial xineza organiza tiha rekolla fundu sira hodi apoia família sira ne'ebé afetadu hosi inundasaun iha loron 13 Marsu iha Díli.

Intimidasaun sente mós iha Baucau iha profesor portugés sira ne'ebé destakadu iha sidade daruak hosi nasaun nian, halo embaixador Portugal nian haruka atu dosente sira fila ba Díli.

Parte hosi inseguransa reporta hosi profesor sira akontese tanba notísia falsu oioin no boatu sira ne'ebé maka sirkula iha findesemana ne'ebé tenta relasiona kazu konfirmadu dahuluk hosi Covid-19 nian no kazu suspeitu ida seluk ne'ebé relasionadu ho Baucau.

"Sé maka hela kleur iha Timor no sé maka mai iah ne'e no hafoin ne'e fila, mantén ligasaun forte ida no domin espesial ida ho Timor durante tempu barak, hatene katak ema timoroan sira la'ós povu ida antiestranjeiru, maibé hanesan kontráriu", Fidelis Magalhães hatete.

Agora daudaun iha kazu konfirmadu ida hosi Covid-19 iha Timor-Leste.

Koronavírus foun, responsável hosi pandemia Covid-19, infeta ona ema rihun 324 resin iha mundu tomak, na'in 14.300 resin mate ona.

Hafoin mosu iha Xina, iha Dezembru, moras ne'e espalla ona iha nasaun ho teritóriu hamutuk 179, halo Organizasaun Mundial Saúde (OMS) deklara ona situasaun ida pandemia nian.

Lusa

 


Comentários

Critério de publicação de comentários