Pájina aktualizada iha 18:09h, kuarta-feira 01 Abril

Covid-19: Embaixada portugeza iha Díli iha kontaktu ho projetu sira koperasaun nian

24 de Março de 2020, 02:54

Embaixada Portugal nian iha Díli iha hela kontaktu permanente ho responsável sira hosi projetu tomak hosi koperasaun bilateral ne'ebé halo iha Timor-Leste, iha ámbitu hosi medida sira ne'ebé relasionadu ho Covid-19, hatete hosi fonte postu diplomátiku ba Lusa iha loron-segunda ne'e.


Fonte esplika katak halo ona reuniaun dahuluk ho kordenador sira hosi projetu sira hotu ne'ebé inklui área sira hanesan edukasaun, agrikultura, kultura, literasia ho supervizaun finanseiru.

"Projetu sira akompaña hela loron-loron, liuhosi kordenador sira, hodi avalia situasaun", refere hosi fonte.

Iha kauza maka projetu sira Pró-Portugés, hosi apoiu ba formasaun dosente sira nian, FOCO, ne'ebé sentra iha apoiu iha Universidade Nasional Timor Lorosa'e (UNTL), Konsultóriu hosi Jornalista sira, Quinta Portugal, projetu Pró-Kultura no programa PFMO hosi literasia ho supervizaun finanseiru.

Responsável sira hosi embaixada hasoru malu ona ho projetu sira ne'e, nune'e mós ho kordenador sira hosi projetu hosi Sentru Aprendizajen ho Formasaun Eskolar (CAFE) - ne'ebé integra dosente portugés na'in 140 - no Eskola Portugeza Díli nian.

Lina Vicente, kordenadora hosi projetu CAFE hatete iha loron-segunda ba Lusa katak kuaze profesor tomak ne'ebé destakadu iha Timor-Leste ho baze iha programa luzu-timoroan husu ona hodi fila ba Portugal tanba pandemia covid-19.

Fonte hosi Embaixada Portugal nian iha Díli hatete ba Lusa katak aleinde profesor sira, portugés sira seluk iha Timor-Leste, ne'ebé nia númeru seidauk hatene, husu mós hodi fila.

Diretor hosi Eskola Portugeza Díli nian, Acácio de Brito, hatete ona ba Lusa katak "pelumenus profesor na'in rua" hatudu ona vontade hodi fila.

Koronavírus foun, responsável hosi pandemia Covid-19, infeta ona ema rihun 324 resin iha mundu tomak, na'in 14.300 resin mate ona.

Hafoin mosu iha Xina, iha Dezembru, moras ne'e espalla ona iha nasaun ho teritóriu hamutuk 179, halo Organizasaun Mundial Saúde (OMS) deklara ona situasaun ida pandemia nian.

Nasaun oioin hili ona medida estraordináriu sira inklui rejimi kuarentena ho taka fronteira sira.

To'o agora iha kazu konfirmadu ida hosi Covid-19 iha Timor-Leste.

Lusa

 


Comentários

Critério de publicação de comentários