Pájina aktualizada iha 10:23h, segunda-feira 06 Jullu

Covid-19: Timor-Leste anunsia rezultadu negativu sira ba teste foun sira

24 de Março de 2020, 22:58

Ministériu Saúde timoroan anunsia iha loron-tersa ne'e katak teste lima dahuluk ne'ebé halo ba kazu suspeitu sira Covid-19 nian ne'ebé halo iha Laboratóriu Nasional, no komprova ona iha Darwin, hatudu ona rezultadu negativu.


"Ministériu Saúde deklara ba públiku katak rezultadu hosi kazu suspeitu lima Covid-19 nian (...) hanesan negativu", informa hosi ministra interina Saúde nian.

Élia dos Reis Amaral esplika ona katak teste sira halo ona iha Laboratóriu Nasional no hafoin ne'e konfirma ona hosi Darwin Hospital iha Austrália.

"Rezultadu signifika katak pasiente na'in lima ne'e iha sintoma infesaun nian maibé laiha koronavírus. Ekipa médiku ne'ebé akompaña hela no monitoriza pasiente sira fó ona alta ba sira, hasai ona sira hosi kuarentena", nia afirma.

Agora daudaun iha kazu konfirmadu ida hosi Covid-19 iha Timor-Leste.

Ministra interina adianta ona katak pasiente "kontinua iha tratamentu médiku ho kondisaun ida ne'ebé estável tebes to'o agora".

Koronavírus foun, responsável hosi pandemia Covid-19, infeta ona ema rihun 345 resin iha mundu tomak, na'in 15.100 resin mate ona.

Hafoin mosu iha Xina, iha Dezembru, moras ne'e espalla ona iha nasaun ho teritóriu hamutuk 179, halo Organizasaun Mundial Saúde (OMS) deklara ona situasaun ida pandemia nian.

Nasaun oioin hili ona medida estraordináriu sira inklui rejimi kuarentena ho taka fronteira sira.

Lusa

 


Comentários

Critério de publicação de comentários