Pájina aktualizada iha 03:26h, segunda-feira 02 Juñu

Xanana Gusmão akuza PR hanesan "boneku ida" iha Fretilin nia liman

25 de Março de 2020, 02:27

Iha loron-tersa ne'e líder hosi partidu daruak, CNRT, Xanana Gusmão, akuza ona Prezidente Repúblika tanba la foti desizaun sira kona-ba impase polítika, hodi konsidera katak sai hela hanesan "boneku ida" hosi nia partidu Fretilin.


"Señór [Francisco Guterres] Lu-Olo halo hela esforsu ida ne'ebé halo sistema iha Timor-Leste sai hanesan prezidensialista. Nia manda", Xanana Gusmão afirma iha loron-tersa iha konferénsia imprensa hosi koligasaun foun maioria parlamentar nian iha Timor-Leste, lidera hosi Congresso Nacional da Reconstrução Timorense (CNRT).

"Maibé tanba ami koñese malu, la'ós nia maka manda, nia obedese. Ne'e hanesan problema boot. Prezidensializmu ne'ebé maka Prezidente hanesan boneku ida (…) ne'ebé obedese ba orden sira hosi nia partidu", nia hatete hodi refere ba Frente Revolucionária do Timor-Leste Independente (Fretilin).

Xanana Gusmão husik ona, iha loron-tersa ne'e, krítika maka'as sira hasoru xefe Estadu, hodi kritika katak kontinua la foti desizaun kona-ba pedidu demisaun hosi primeiru-ministru Taur Matan Ruak, ne'ebé aprezenta iha fulan ida resin liubá no tanba semana rua nia laran la hatan ba aprezentasaun hosi koligasaun foun ida hosi maioria parlamentar.

Líder istóriku timoroan afirma ona katak maski konstituisaun impede atu xefe Estadu iha kargu polítiku sira, Francisco Guterres Lu-Olo kontinua hanesan prezidente Fretilin nian, kargu ne'ebé nia nunka husik.

Koligasaun foun eziji atu xefe Estadu aseita pedidu demisaun hosi xefe Governu atual, Taur Matan Ruak, no loke odamatan ba formasaun hosi ezekutivu tuirmai.

Xanana Gusmão kestiona mós lejitimidade hosi Governu atual ne'ebé "hanesan demisionáriu, laiha maioria" no tanba ne'e "labele foti inisiativu sira hanesan asaun sira ne'ebé haruka ona ba parlamentu ba mudansa hosi lei estruturante sira".

Líder CNRT nian - ne'ebé lidera aliansa ida hosi partidu neen ne'ebé reprezenta hamutuk kadeira 34 hosi kadeira 65 ne'ebé disponível iha parlamentu - refere liuliu ba proposta hosi mudansa ba lei orsamentu ho jestaun finanseiru, agora debate hela iha parlamentu.

"Foti inisiativu lahó kompeténsia ba asaun ne'e. Parlamentar sira, deputadu sira hosi koligasaun iha ne'e hotu no sira sei reprova ne'e tanba hanesan la konstitusional, la legal", nia afirma.

Hatán ba Lusa iha loron-tersa ne'e kona-ba karik deputadu sira hosi maioria sei aprova ka la'e deklarasaun ruma hosi estadu emerjénsia nian - ne'ebé husu hosi Governu ba Prezidente Repúblika no presiza aprovasaun parlamentar - Xanana Gusmão la husik klaru ida.

"Tenki iha autorizasaun hosi parlamentu. Depois maka ita haree, ita sei haree", nia afirma.

Iha konferénsia imprensa, porta-vós hosi koligasaun, António da Conceição, le ona deklarasaun ida ne'ebé garanti katak aliansa hosi partidu neen hanesan "sólidu" no atua "hamutuk iha parlamentu nasional".

Testu eziji ba xefe Estadu hodi atua ho "independénsia, ba unidade Estadu nia di'ak no funsionamentu regular hosi instituisaun sira" hodi rezolve impase polítiku hodi bele hatán ho di'ak ba krizi sira ne'ebé maka nasaun hasoru, inklui risku hosi Covid-19.

Aliansa konsidera katak presiza "lideransa forte ida" hodi ultrapasa problema atual sira no kritika plataforma entendimentu ne'ebé maka anunsia iha loron-sábadu liubá hosi Fretilin ho Partidu Libertasaun Popular (PLP), hosi atual primeiru-ministru Taur Matan Ruak nian.

Mari Alkatiri, sekretáriu-jeral Fretilin nian, hatete ona ba Lusa katak plataforma iha apoiu hosi deputadu sira seluk, sujere katak membru sira hosi forsa koligasaun nian ne'ebé lidera hosi Xanana Gusmão bele apoia.

Aliansa foun maioria parlamentar hatán hodi rekorda lei hosi partidu polítiku sira hodi lembra fali katak deputadu ruma ne'ebé viola diretriz hosi partidu bele lakon nia mandatu.

Rekorda kata Governu atual harii hosi koligasaun ida hosi CNRT, KHUNTO ho PLP, ne'ebé agora PLP hanesan izoladu lahó apoiu hosi partidu rua seluk, rotura ida ne'ebé akontese tanba xumbu, ho votu kontra ho abstensaun hosi deputadu sira Xanana Gusmão nian, ba Orsamentu Jeral Estadu (OJE) ba tinan 2020.

Timor-Leste hasoru hela duodésimu limitadu dezde loron 01 Janeiru, lahó fundu sufisiente sira iha konta tezouro no hasoru krizi Covid-19 nian no impaktu hosi inundasaun sira ne'ebé halo ona estraga hamutuk dolar millaun 20 no afeta ona ema rihun sanulu resin.

Lusa

 


Comentários

Critério de publicação de comentários