Pájina aktualizada iha 23:33h, segunda-feira 25 Maiu

Covid-19: Prezidente Repúblika husu ba parlamentu estadu emerjénsia hahú loron-kinta

25 de Março de 2020, 23:47

Iha loron-kuarta ne'e Prezidente Repúblika husu ona ba parlamentu "autorizasaun nesesáriu" hodi deklara estadu emerjénsia durante loron 30, entre 26 Marsu to'o 24 Abril, hanesan medida hodi hatán ba pandemia Covid-19.


Pedidu, ne'ebé haruka ba parlamentu iha karta ida ne'ebé maka Lusa iha asesu, agora sei debate iha plenáriu iha loron-kinta, iha sekuénsia hosi desizaun hosi reuniaun konferénsia nian hosi líder sira iha loron-kuarta dadeer (oras lokal).

"Ha'u hakarak deklara estadu emerjénsia (…) ba períudu ida loron 30 ho inísiu iha loron 26 Marsu tuku 00:00 no hotu iha loron 24 Abril tuku 24:00, iha teritóriu nasional tomak", xefe Estadu, Francisco Guterres Lu-Olo, hakerek.

"Vírus ne'e la hili kór, rasa, jéneru, tinan, nasionalidade, pozisaun sosial ka situasaun ekonómiku. Ne'e hanesan momentu ida hosi unidade nasional nian", nia hatutan.

Iha testu, Lu-Olo husu ona kolaborasaun hosi deputadu sira ho konsidera ona katak hamutuk sei bele "manán dezafiu ne'e" hodi kombate hasoru pandemia ne'ebé maka "Timor-Leste mós la livre hosi moras ne'e".

"Governu entende katak iha kontestu atual (…) Timor-Leste hasoru hela ho situasaun ida hosi kalamidade públiku nune'e maka hato'o ona ba Prezidente Repúblika deklarasaun hosi estadu emerjénsia nian. Ha'u konkorda ho análize ne'e", nia refere iha karta ne'ebé haruka ba parlamentu.

Lu-Olo indika ona katak Governu, Konsellu Estadu ho Konsellu Superior Defeza ho Seguransa (CSDS) nian hato'o ona "iha sentidu favorável" ba deklarasaun no atu adopsaun hosi estadu emerjénsia implika foti medida nesesáriu sira ba saúde públika.

Medida sira ne'e bele "implika limitasaun ka suspensaun hosi ezersísiu ba direitu sira, liberdade sira ho garantia fundamental sira, hanesan direitu ba liberdade, direitu ba reuniaun ka manifestasaun, liberdade sirkulasaun nian, direitu ba propriedade ho inisiativu ekonómiku, liberdade kultu nian (iha nia dimensaun koletivu) no direitu ba rezisténsia", nia hatete.

Entre "kondisionante sira ba direitu sira, liberdade sira ho garantia sira", Prezidente timoroan refere ona ba kontrolu sanitáriu sira iha portu sira ho aeroportu sira, izolamentu kompulsivu ho medida sira hodi asegura sirkulasaun internasional hosi sasán ho serbisu importante sira.

Impede mós "asaun tomak ho asaun ruma rezisténsia ativu ka pasiva nian" hasoru orden sira ne'ebé maka autoridade sira fó, bele rekizita prestasaun serbisu sira no uzu hosi sasán móvel ho imóvel sira, estabelesimentu komersial sira ka industrial sira, ka kondisionamentu sira seluk hosi inisiativu ekonómiku privadu nian.

Ne'e "bele hanesan dezafiu boot nasaun nian", dezde restaurasaun independénsia nian, no vitória "depende hosi hahalok hosi ema ida-idak nian", nune'e ema hotu tenki "sai hanesan responsável", hatete hosi xefe Estadu timoroan.

Agora daudaun iha kazu konfirmadu ida hosi Covid-19 iha Timor-Leste.

Koronavírus foun, responsável hosi pandemia Covid-19, infeta ona ema rihun 400 resin iha mundu tomak, na'in 18.000 resin mate ona.

Hafoin mosu iha Xina, iha Dezembru, moras ne'e espalla ona iha nasaun ho teritóriu hamutuk 179, halo Organizasaun Mundial Saúde (OMS) deklara ona situasaun ida pandemia nian.

Nasaun oioin hili ona medida estraordináriu sira inklui rejimi kuarentena ho taka fronteira sira.

Lusa

 


Comentários

Critério de publicação de comentários