Pájina aktualizada iha 01:53h, domingu 06 Jullu

Covid-19: ONU konsidera "la responsável" krítika timoroan sira nian ba apoiu hosi OMS

26 de Março de 2020, 00:16

Kordenador ONU nian iha Timor-Leste, iha loron-kuarta ne'e, hatudu ona "dezilusaun boot no la kontente" tanba krítika sira "la responsável" hosi komandante polísia timoroan ida kona-ba apoiu hosi Organizasaun Mundial Saúde (OMS) nian iha kombate hasoru Covid-19 iha nasaun.


"Hanesan triste tebes haree no rona funsionáriu públiku importante ida deklara ba públiku iha televizaun nasional iha loron-tersa kalan ne'e katak" la satisfeitu ho OMS ne'ebé la ajuda Governu hodi kombate Covid-19", hatete hosi Roy Trivedy iha komunikadu ne'ebé haruka ba Lusa.

"Deklarasaun ne'ebé halo hosi komandante operasional PNTL nian hanesan la loos, hatudu falta komprensaun ida hosi knaar OMS nian no hanesan la responsável tebes", nia refere.

Hatudu "dezilusaun maka'as no la haksolok", Trivedy subliña ona katak dezde fulan-Janeiru nia klaran maka ekipa sira OMS nian no ajénsia sira seluk ONU nian serbisu hamutuk ho autoridade timoroan sira hodi kombate pandemia ne'e.

"Xefe OMS nian iha Timor-Leste, Rajesh Pandav ho nia ekipa, hamutuk ho sira seluk, serbisu nafatin oras barak durante loron hitu durante semana, ho profisionalizmu maka'as, dedikasaun ho determinasaun, maski iha dezafiu barak", hakerek iha komunikadu.

Roy Trivedy repete fali katak krítika sira ne'ebé halo hosi Pedro Belo, iha deklarasaun sira ba televizaun públika RTTL, hanesan "la loos", tanba primeiru-ministru ho líder sira seluk ho responsável nasional sira "rekoñese ona iha públiku kontributu maka'as hosi OMS hodi ajuda Timor-Leste hodi prepara ba pandemia".

"Deklarasaun hosi Komandante PNTL nian hatudu mós komprensaun ladi'ak hosi knaar OMS nian - ne'ebé hanesan ajénsia espesializadu ida hosi ONU, liuliu iha ne'e hodi fó konsellu, apoia ho ajuda Governu Timor-Leste nian iha kestaun tomak saúde nian", sustenta hosi Trivedy.

"Hanesan la responsável tanba, hanesan funsionáriu públiku, halo deklarasaun hanesan ne'e la'ós hamenus konfiansa públika iha serbisu hosi Governu Timor-Leste nian no OMS nian, ne'ebé hanesan rekoñesidu hanesan instituisaun global ida ne'ebé respeitadu tebes, maibé mós hamosu perigu ba povu sira nia moris bainhira rona desinformasaun ida hanesan ne'e", nia refere mós.

Trivedy subliña katak ne'e bele halo ema balun "la rona konsellu sira ne'ebé maka fó hosi profisional kualifikadu sira" bele hamosu mós "ameasa ho abuzu sira ba ema sira hosi OMS no ONU nian".

"Iha análize ikus, Governu Timor-Leste ho nia Ministériu Saúde maka tenki implementa medida sira hodi hatán ba emerjénsia COVID-19 nian. OMS ho ONU komplementa ho apoia resposta ne'e maibé la substitui", nia insisti.

Lusa tenta hetan ona komentáriu adisional sira hosi responsável sira ONU ho OMS nian iha Timor-Leste maibé laiha resposta.

Agora daudaun iha kazu konfirmadu ida hosi Covid-19 iha Timor-Leste.

Lusa

 


Comentários

Critério de publicação de comentários