Pájina aktualizada iha 18:53h, sesta-feira 07 Agostu

Covid-19: PM husu deskulpa ba OMS tanba deklarasaun sira hosi responsável polisial

26 de Março de 2020, 01:51

Primeiru-ministru, Taur Matan Ruak, lamenta ona iha loron-kuarta ne'e deklarasaun sira hosi responsável polosial nasaun nian ne'ebé kritika ona serbisu hosi ONU no hosi Organizasaun Mundial Saúde (OMS) iha Timor-Leste.


Nota ida ne'ebé fó sai iha pájina ofisial hosi nia gabinete iha Facebook, esplika katak Taur Matan Ruak hasoru malu iha loron-kuarta ne'e ho responsável ONU nian iha Timor-Leste, Roy Trivedy, ho mós responsável hosi Organizasaun Mundial Saúde (OMS) nian, Rajesh Pandav.

Iha enkontru ne'e, xefe Governu "lamenta ona deklarasaun ho falta kuidadu" hosi superintendente xefe Polísia Nasional Timor-Leste (PNTL) nian, Pedro Belo, kona-ba asaun hosi ONU nian iha Timor-Leste.

"Governu husu deskulpa ba OMS no realsa katak deklarasaun sira la reflete Governu ka Estadu Timor-Leste nian", nia refere.

Taur Matan Ruak hatete katak fó ona instrusaun ba ministru interinu Interior, Filomeno Paixão, hodi garanti atu "komandante limita ko'alia de'it kona-ba nia área serbisu nian".

Xefe Governu repete "konfiansa" hosi ezekutivu iha OMS no katak Estadu apresia servisu ne'ebé maka organizasaun dezenvolve nafatin iha nasaun hodi apoia ba esforsu sira Governu nian hodi kombate pandemia Covid-19.

Lusa tenta kontaktu ministru interinu Interior maibé laiha susesu.

Iha komunikadu ne'ebé haruka ba Lusa iha loron-kuarta, Roy Trivedy hatudu "dezilusaun maka'as no la haksolok" tanba krítika sira "ne'ebé la responsável" hosi komandante polísia timoroan ida kona-ba apoiu hosi Organizasaun Mundial Saúde nian iha kombate hasoru Covid-19 iha nasaun.

"Hanesan triste tebes haree no rona funsionáriu públiku importante ida deklara ba públiku iha televizaun nasional iha loron-tersa kalan ne'e katak" la satisfeitu ho OMS ne'ebé la ajuda Governu hodi kombate Covid-19", hatete hosi Roy Trivedy iha komunikadu ne'ebé haruka ba Lusa.

"Deklarasaun ne'ebé halo hosi komandante operasional PNTL nian hanesan la loos, hatudu falta komprensaun ida hosi knaar OMS nian no hanesan la responsável tebes", nia refere.

Eis-Prezidente Repúblika, José Ramos-Horta, husu mós deskulpa iha loron-kuarta ne'e, nu'udar sidadaun Timor-Leste, ba krítika sira ne'ebé maka kompatriota balun halo hasoru sidadaun sira no ajénsia estranjeiru sira, inklui ba ONU, ne'ebé maka iha prezensa iha nasaun.

"Ha'u husu deskulpa ba ami nia hóspede sira hotu ne'ebé serbisu iha rai doben ne'e bainhira ema timoroan balun la respeita imi. Nu'udar sidadaun Timor-Leste ha'u hakruuk hodi husu deskulpa ba imi", nia hakerek iha mensajen ida iha Facebook.

"Balun haluha ona solidariedade sira hosi komunidade internasional. Balun iha sensibilidade", nia subliña.

Komentáriu sira hosi Ramos-Horta mosu iha sekuénsia hosi relatu sira hosi insidente sira ne'ebé envolve ema estranjeiru sira, inklui ema portugés sira, ne'ebé asosiadu ba koronavírus foun, nune'e mós hosi krítika sira hosi responsável polisial.

Lusa

 


Comentários

Critério de publicação de comentários