Pájina aktualizada iha 06:05h, segunda-feira 26 Maiu

Covid-19: Ramos-Horta husu deskulpa ba timoroan sira ne'ebé kritika estranjeiru sira

26 de Março de 2020, 02:01

Eis-Prezidente Repúblika, José Ramos-Horta, husu ona deskulpa iha loron-kuarta ne'e, nu'udar sidadaun Timor-Leste nian, tanba krítika sira ne'ebé maka kompatriota balun halo hasoru sidadaun sira ho ajénsia estranjeiru sira, inklui ONU, ne'ebé maka iha prezensa iha nasaun.


"Ha'u husu deskulpa ba ami nia hóspede sira hotu ne'ebé serbisu iha rai doben ne'e bainhira ema timoroan balun la respeita imi. Nu'udar sidadaun Timor-Leste ha'u hakruuk hodi husu deskulpa ba imi", nia hakerek iha mensajen ida iha Facebook.

"Balun haluha ona solidariedade sira hosi komunidade internasional. Balun iha sensibilidade", nia subliña.

Komentáriu sira hosi Ramos-Horta mosu iha sekuénsia hosi relatu sira hosi insidente sira ne'ebé envolve ema estranjeiru sira, inklui ema portugés sira, ne'ebé asosiadu ba koronavírus foun, nune'e mós hosi krítika sira hosi komandante polisia importante ida timoroan nian hasoru serbisu hosi Organizasaun Mundial Saúde (OMS).

Iha loron-kuarta ne'e kordenador ONU nian iha Timor-Leste hatudu "dezilusaun maka'as no la haksolok" tanba krítika sira "ne'ebé la responsável" hosi komandante polísia timoroan ida kona-ba apoiu hosi Organizasaun Mundial Saúde nian iha kombate hasoru Covid-19 iha nasaun.

"Hanesan triste tebes haree no rona funsionáriu públiku importante ida deklara ba públiku iha televizaun nasional iha loron-tersa kalan ne'e katak" la satisfeitu ho OMS ne'ebé la ajuda Governu hodi kombate Covid-19", hatete hosi Roy Trivedy iha komunikadu ne'ebé haruka ba Lusa.

"Deklarasaun ne'ebé halo hosi komandante operasional PNTL nian hanesan la loos, hatudu falta komprensaun ida hosi knaar OMS nian no hanesan la responsável tebes", nia refere.

Iha publikasaun iha Facebook, Ramos-Horta rekorda ona apoiu ne'ebé maka Portugal fó, hosi estranjeiru sira seluk no hosi ONU "durante tinan nakukun kleur" hosi okupasaun indonéziu nian, no ne'ebé permiti ona ba nasaun hodi hetan fali nia independénsia.

Ramos-Horta hakerek katak sistema ONU nian iha Timor-Leste "tanba Estadu Timoroan hakarak" no tanba nasaun husu nafatin apoiu ne'e.

"Iha Facebook ha'u haree krítika balun hasoru ONU, "malae sira", ba Xina, no kontra Organizasaun Mundial Saúde nian. Timor-Leste hanesna membru ONU nian no ita hanesan membru hosi OMS", Ramos-Horta hakerek.

Eis-Prezidente hatete katak hanesan Estadu timoroan maka husu ba OMS hodi hela iha Timor-Leste, la depende "hosi sentavu ida ho OMS no nia programa sira" iha nasaun, no hanesan organizasaun ida "ne'ebé respeitadu iha mundu tomak".

"Ha'u tau konfiansa tomak iha ONU, 100% konfiansa iha ajénsia espesializadu sira ONU nian", nia subliña.

Ramos-Horta hakotu ho apelu ida ba ema timoroan sira hodi hatudu katak iha "fuan" no katak "iha tempu ksolok no iha tempu aat sira" simu nafatin ho di'ak sira nia hóspede sira.

"No, liuliu iha tempu sira hosi krizi todan iha mundu tomak, nu'udar timoroan sira, ita tenki simu ho fuan ema sira ne'ebé maka hosi tasi seluk no ne'ebé maka hamutuk ho ita, simu sira ho di'ak", nia refere.

Agora daudaun iha kazu konfirmadu ida hosi Covid-19 iha Timor-Leste.

Lusa

 


Comentários

Critério de publicação de comentários