Pájina aktualizada iha 20:33h, kinta-feira 24 Setembru

COVID-19: Kazu foun rua iha Timor-Leste, total kazu haat

13 de Abril de 2020, 23:40

Iha loron-segunda ne'e, autoridade sira saúde nian anunsia ona kazu foun rua COVID-19 nian, ne'ebé aumenta ona ba númeru total haat ba ema infetadu sira iha nasaun.


Pasiente na'in tolu iha ona izolamentu, iha Díli, anunsia hosi diretora-jeral hosi Prestasaun Serbisu Saúde timoroan nian, Odete Viegas, rekorda katak pasiente na'in haat rekupera ona.

Odete Viegas hatutan ona katak kazu suspeitu hamutuk 168 iha nasaun, kazu 111 hatudu ona rezultadu negativu no kazu 53 sei hein hela rezultadu hosi teste sira.

"Kazu pozitivu tolu senti sintoma kmaan sira iha izolamentu iha sentru saúde Vera Cruz", hatete hosi responsável.

Odete Viegas ko'alia iha sala situasaun hosi Sentru Integradu ba Jestaun Krizi nian (CIGC) COVID-19 nian iha konferénsia imprensa diáriu kona-ba atualizasaun hosi progresaun ba moras nian iha Timor-Leste.

Diretora-jeral esplika ona katak kazu foun rua maka iha relasaun ho pasiente konfirma iha loron-sesta liubá. Sira hotu halo parte hosi grupu ida ema na'in ualu nian ne'ebé halo viajen entre kapital Timor Osidental, Kupang, no fronteira Batugadé, iha norte illa nian.

"Sira mai hamutuk hosi Kupang no hosi grupu hanesan. Entre sira seluk iha ona rezultadu negativu balun no sira seluk sei hein hela rezultadu sira", afirma ona ba Lusa.

Odete Viegas hatutan katak autoridade sira halo hela teste adisional sira ba ema sira ne'ebé maka iha fatin hanesan kuarentena, ne'ebé iha kontaktu no rezultadu sira sei hein to'o loron-tersa.

Autoridade sira saúde nian kontinua observa ema sira ne'ebé iha kuarentena hodi komprova karik ema balun iha sintoma sira, esplika katak halo hela reforsu adisional hodi mantén ema ketak-ketak no iha kuartu úniku sira.

Iha parte seluk, Odete Viegas hatutan katak agora daudaun iha ema na'in 637 ne'ebé maka iha izolamentu obrigatóriu iha infraestrutura sira Governu nian, na'in 524 iha Díli no na'in 113 iha munisípiu sira seluk, nune'e tau hamutuk ho na'in neen ne'ebé izola iha uma.

Total ida hosi ema na'in 1.261 (na'in 1.051 iha Díli no na'in 210 iha munisípiu sira seluk) konklui ona períudu loron 14 kuarentena nian.

Odete Viegas apela ona ba jornalista sira hodi la "publika notísia sira lahó konfirmasaun hodi la hamosu pániku iha komunidade", hodi husu mós ba populasaun hodi mantén kalma.

Pandemia COVID-19 halo ona ema rihun 112 resin mate no infeta ona ema millaun 1,8 resin iha nasaun ho teritóriu hamutuk 193.

Hafoin mosu iha Xina, iha Dezembru, moras ne'e espalla iha mundu tomak no Estadus Unidus agora sai hanesan nasaun ne'ebé rejista númeru boot hosi vítima mortal (liu rihun 22) no infetadu sira (rihun 555 resin).

Kontinente europeu, ho ema infetadu rihun 932 resin no vítima mortal rihun 77, hanesan fatin ne'ebé iha númeru boot liu hosi kazu sira, no Itália sai hanesan nasaun daruak iha mundu ho vítima mortal maka'as, iha ema na'in 19.899 mate no kazu konfirmadu hamutuk rihun 156 resin.

Lusa

 


Comentários

Critério de publicação de comentários