Pájina aktualizada iha 20:31h, kinta-feira 24 Setembru

COVID-19: La'o Hamutuk husu apoiu prioritáriu sira ba ema sira ne'ebé fraku liu

14 de Abril de 2020, 01:18

La'o Hamutuk defende, iha loron-segunda ne'e, katak apoiu ekonómiku hosi Governu iha ámbitu hosi COVID-19 tenki fó prioridade ba populasaun sira ne'ebé fraku tebes, liuliu ba traballador sira hosi área informal no populasaun rural sira.


Iha karta aberta ida ne'ebé haruka ba primeiru-ministru timoroan, Taur Matan Ruak, ONG La'o Hamutuk husik ona rekomendasaun ne'e no rekomendasaun sira seluk iha momentu ne'ebé maka Governu hanoin hela medida sira ba apoiu ekonómiku hodi hatán ba COVID-19.

ONG defende ona katak apoiu "labele hanoin de'it ba empreza sira iha Díli", tanba "maioria hosi agregadu familiar sira iha Timor-Leste depende hosi área informal, inklui kios sira, ema sira ne'ebé hanesan vendedor ambulante sira, merkadu sira, táxi sira, mikrolet sira, agrikultor sira ho traballador doméstiku sira, ne'ebé maka la halo parte iha ekonomia formal".

Tanba ne'e, no hodi evita atu iha diskriminasaun entre área formal, "ne'ebé fó serbisu ba menus 20% hosi populasaun", Gvoernu tenki fó "asisténsia finanseiru ba ema hotu".

Bainhira labele kontrola folin sira, defende mós katak maski fahe sasán importante sira ba populasaun, barak maka bele sosa iha nível lokal, nune'e ajuad promova "soberania alimentar no, iha prazu naruk, hamenus importasaun sira".

Aleinde ne'e, La'o Hamutuk rekomenda evita empréstimu sira hosi instituisaun internasional sira, hanesan Banku Mundial ka Banku Aziátiku ba Dezenvolvimentu. Bainhira halo, fundu sira ne'e tenki apoia ekonomia lokal no evita atu "empreza boot sira" laiha "vantajen injustu sira" iha asesu ba kréditu.

Bainhira felisita medida sira prevensaun nian ne'ebé maka Governu hili hodi hatán ba COVID-19, organizasaub defende ona katak pakote hosi apoiu ekonómiku tenki "fó prioridade ba ema sira ne'ebé fraku liu (…) hodi garanti atu labele sai hanesan vítima sira hosi impaktu ekonómiku".

ONG lembra vulnerabilidade ne'ebé iha ona, tanba 3/4 hosi populasaun iha nasaun moris iha zona rural sira no 2/3 hosi populasaun depende hosi agrikultura subsisténsia nian, no husu tan apoiu sira.

"Ami nia sidadaun barak hanesan fraku liu ba komplikasaun sira COVID-19 nian, tanba sofre problema sira saúde, inklui nutrisaun ne'ebé ladi'ak no moras respiratóriu sira hanesan tuberkuloze no moras pulmaun sira nian", nia refere.

Maski mensiona área intervensaun balun, pakote ekonómiku ne'ebé hato'o, ne'ebé semana ne'e sei fila fali ba Konsellu Ministru, seidauk inklui medida konkretu sira, nota hosi ONG.

Maski nune'e, hanoin mós apoiu sira hamutuk dolar millaun 36 ba grupu fraku sira no to'o dolar millaun 50 "ba área privadu, inklui banku sira ho empreza sira", salienta.

"Pakote falla bainhira la esplika loloos prosesu ba distribuisaun osan nian, hahán sira ho ai-moruk sira ba grupu fraku sira no la defini loloos sé maka halo parte iha kategoria hosi ema fraku sira", nia konsidera.

Kona-ba apoiu ba área privadu, ONG defende ona "monitorizasaun maka'as ida" hodi garanti atu apoiu públiku sira "uza hodi kompensa traballador sira durante COVID-19 no la'ós halo emprezáriu sira sai riku".

Ikusmai, organizasaun husu ona ba líder sira no partidu polítiku sira hodi "haluha sira nia interese partidáriu sira no pesoal sira no konsentra nia atensaun iha prevensaun ba vírus no iha protesaun hosi sidadaun tomak Timor-Leste nian".

"Transparénsia ho direitu ema sira nian presiza hetan respeitu", subliña.

To'o agora, Timor-Leste rejista ona kazu haat hosi COVID-19, na'in ida rekupera ona.

Pandemia COVID-19 halo ona ema rihun 112 resin mate no infeta ona ema millaun 1,8 resin iha nasaun no teritóriu sira hamutuk 193.

Lusa

 


Comentários

Critério de publicação de comentários