Pájina aktualizada iha 06:42h, kinta-feira 03 Jullu

COVID-19: Timor-Leste rejista kazu foun rua, aumenta nune'e total ba infetadu na'in neen

14 de Abril de 2020, 19:53

Iha loron-tersa ne'e, Timor-Leste rejista ona kazu foun rua ba COVID-19, aumenta nune'e númeru total ba ema infetadu sira iha nasaun ba na'in neen, anunsia hosi porta-vós Governu nian iha loron-tersa ne'e.


Porta-vós hosi Sentru Integradu ba Jestaun Krizi nian (CIGC), Rui Araújo, esplika ona katak ema na'in sanulu resin hein hela rezultadu sira teste nian no ema liu atus resin maka iha ona rezultadu negativu.

"Kazu lima ne'ebé konfirmadu hahú hosi loron-sesta [inklui sira ne'ebé maka hetan iha loron-tersa ne'e] halo parte iha fatin úniku ida izolamentu nian. Tanba ne'e, posibilidade hosi daet ba grupu iha liur hanesan ki'ik", nia refere.

"Situasaun agora hanesan kontroladu. Labele pániku", nia afirma.

Kazu lima ne'ebé konfirmadu hahú iha loron-sesta halo parte hosi grupu ida hosi ema na'in 37 ne'ebé sai hosi postu fronteira Mota-Ain, iha norte illa nian, ba Díli, iha loron 01 Abril, iha autokarru ne'ebé aluga hosi Sentru Integradu ba Jestaun Krizi nian (CIGC) ne'ebé kria hosi autoridade timoroan sira nian hodi lidera kombate hasoru COVID-19.

Ho suspensaun hosi transporte públiku sira tanba limitasaun hosi estadu emerjénsia nian, autokarru sira aluga hosi CIGC, espesialmente hodi tula ema timoroan sira ne'ebé maka tama ona iha nasaun, "no laiha pasajeiru baibain seluk", indika hosi autoridade sira.

Governu esplika ona katak autokarru sira akompaña hosi efetivu sira hosi Unidade Polísia Fronteira nian (UPF) to'o hotel iha Díli, hodi sira tama iha kuarentena no ne'ebé maka hetan ona kazu lima.

Rui Araújo esplika ona katak hafoin ne'e autokarru fila kedas, ho akompañamentu polisial, ba zona fronteira nian, hodi paradu no laiha uzu hahú hosi momentu ne'ebá.

Rui Araújo esplika katak autoridade timoroan sira informa ona sira nia maluk sira iha Indonézia, timoroan infetadu sira sai hosi fatin ne'e, iha ámbitu hosi akordu sira koperasaun internasional sira nian ne'ebé hala'o iha kazu sira hanesan ne'e.

Informasaun ikus sira hosi Governu hatudu katak total ema na'in 570 maka iha izolamentu obrigatóriu, no hosi númeru total ba kazu suspeitu sira dezde inísiu aumenta ba na'in 178 ne'ebé na'in 34 sei hein hela rezultadu sira, ho kazu pozitivu neen no sira seluk hanesan negativu.

Pandemia COVID-19, mosu hosi koronavírus SARS-CoV-2, halo ona ema rihun 118 resin mate no infeta one ema millaun 1,9 resin iha nasaun ho teritóriu hamutuk 193.

Hafoin mosu iha Xina, iha Dezembru, moras ne'e espalla iha mundu tomak, Estadus Unidus sai hanesan nasaun ne'ebé rejista númeru hosi vítima mortal aas (na'in 23.529) no ema infetadu (liu rihun 570).

Lusa

 


Comentários

Critério de publicação de comentários