Pájina aktualizada iha 07:14h, kinta-feira 03 Jullu

COVID-19: ONU ho UE haruka apoiu hodi kombate violénsia jéneru nian iha Timor-Leste

15 de Abril de 2020, 01:22

UE ho ONU anunsia, iha loron-tersa ne'e, katak sei haruka dolar millaun ia hosi programa Spotlight hodi hatán ba risku hosi violénsia hasoru feto sira iha kontestu hosi pandemia COVID-19 iha Timor-Leste.


Objetivu maka reforsa kompromisu hodi proteje no apoia feto sira ho labarik-feto sira iha Timor-Leste, haktuir hosi komunikadu konjuntu ida.

Nune'e, misaun sira UE ho ONU konkorda muda programasaun hosi programa Spotlight, lansa tinan ne'e iha Díli, hodi "aborda violénsia hasoru feto sira ho labarik-feto sira iha kontestu COVID-19 nian".

Iha kauza maka "polítika sira apoiu nian, aumentu ba apoiu ba organizasaun sira sosiedade sivil nian, aumentu hosi envolvimentu ho área edukasaun ho saúde no konsiensializasaun kona-ba risku hosi aumentu violénsia hasoru feto sira ho labarik-feto sira".

Embaixador UE nian iha Díli, Andrew Jacobs, afirma ona katak hanesan "aumentu apoiu ba organizasaun sira hosi sosiedade sivil iha liña oin hodi hatán, garanti atu serbisu sira la'ós nakloke de'it maibé iha liu asesu ba grupu sira ne'ebé dalabarak ema haluha".

"Iha krizi global ne'ebé maka nunka akontese no imprevizível, Uniaun Europeia kontinua iha empeñu hodi proteje no apoia feto sira iha Timor-Leste", nia refere iha komunikadu hanesan.

Kordenador rezidente ONU nian iha Díli, Roy Trivedy, lembra ona katak resposta ba violénsia jéneru "halo parte iha sentru programasaun kona-ba resposta ba COVID-19".

Bainhira konsidera katak hanesan responsabilidade hosi ema hotu hodi iha asaun, Trivedy hatete katak apoiu ba Timor-Leste, liuhosi Governu ho sosiedade sivil, sei kontinua "ko'alia kona-ba violénsia hasoru feto sira ho labarik-feto sira, inklui dezafiu foun sira ne'ebé COVID-19 hamosu" iha nasaun.

"Ne'e hanesan momentu ida ba Timor-Leste hodi iha asaun solidariedade nian no muda krizi ne'e ba oportunidade ida hodi hetan Objetivu Global sira. ONU sei asegura nafatin atu ema sira ne'ebé maka ami serbi sai forte liu hosi krizi ne'e no proteje direitu fundamental sira hosi labarik-feto tomak, feto sira ho ema sira ne'ebé fraku liu", nia hatete.

Iha kontestu atual hosi limitasaun sira iha Timor-Leste, "feto sira bele hetan risku maka'as ba violénsia doméstika duké antes, tanba iha izolamentu iha ambiente ida ne'ebé nível stress hanesan aas".

"Fator oioin ne'ebé bele hamosu violénsia ne'e hasoru feto sira ho labarik-feto sira", liuliu sira ne'ebé hasoru ona "limitasaun iha sira nia komunidade, hanesan ezemplu, tanba defisiénsia ida ka moras", nia adianta.

"Feto sira ho labarik-feto sira hasoru risku boot ida violénsia nian tanba aumentu hosi izolamentu iha uma, limitasaun ba movimentu iha liur, interupsaun sira iha meiu subsisténsia nian, taka eskola sira no tensaun sira ne'ebé aumenta iha família nia laran", nia refere.

Prestasaun hosi asisténsia téknika krítika ba dezenvolvimentu hosi polítika sira ho programa sira, inklui relasionadu ba instalasaun sira kuarentena, iha ámbitu hosi kombate ba violénsia jéneru nian, hanesan mudansa ida ne'ebé aprovadu.

Sei iha mós komunikasaun sira ba risku hodi konsiensializa kona-ba "aumentu hosi risku ba violénsia hasoru feto sira no labarik-feto sira iha kontestu COVID-19 nian no kona-ba oinsá komunidade sira bele iha asaun hodi prevene violénsia".

Sei fó mós apoiu ba organizasaun lokal sira hosi sosiedade sivil "hodi garanti atu feto sira ho labarik-feto sira bele iha kontaktu ho prestador sira serbisu nian (polísia, saúde ka apoiu sosial) no garanti atu serbisu sira bele nakloke no asesível ba ema sira ne'ebé fraku liu".

Sei iha mós lasu sira ho eskola sira ho aman-inan sira hodi promove relasionamentu saudável no respeitozu iha kontestu foun hosi ensinu distánsia nian.

ONU ho UE haree "ho preokupasaun maka'as, relatóriu sira hosi aumentu ba violénsia doméstika no íntima hosi parseiru sira", iha kontestu hosi pandemia COVID-19.

Timor-Leste to'o agora rejista ona kazu neen ba COVID-19, inklui na'in ida ne'ebé rekupera ona.

Pandemia COVID-19 halo ona ema rihun 118 resin mate no infeta ona ema millaun 1,9 resin iha nasaun ho teritóriu hamutuk 193.

Lusa

 


Comentários

Critério de publicação de comentários