Pájina aktualizada iha 07:14h, kinta-feira 03 Jullu

COVID-19: Profesora portugeza ne'ebé halo viajen hosi Timor-Leste infetadu iha Portugal

15 de Abril de 2020, 02:37

Profesora portugeza na'in ida ne'ebé hanorin iha Timor-Leste, no ne'ebé to'o iha Portugal iha loron 04 Abril, infetadu ho COVID-19, anunsia hosi porta-vós ida hosi Governu timoroan nian iha loron-tersa ne'e.


Rui Araújo, porta-vós hosi Sentru Integradu ba Jestaun Krizi nian (CIGC) anunsia ona kazu, ne'ebé maka Governu portugés informa ona ba autoridade timoroan sira, iha konferénsia imprensa iha Díli.

"Ita nia nasaun belun, Portugal, informa ona katak profesora na'in ida iha grupu hosi portugés sira ne'ebé sai hosi Timor-Leste iha loron 04 Abril ba Portugal (...) halo ona teste ho rezultadu pozitivu" iha loron 06 Abril", nia afirma.

"Profesora hetan hela apoiu hosi autoridade sira saúde Portugal nian, no fahe ona informasaun liuhosi kanal diplomátiku sira, hodi identifika kontaktu sira ne'ebé maka nia halo iha Timor-Leste", nia hatutan.

Ekipa sira saúde timoroan nian halo ona teste ba profesor na'in haat, kolega dosente sira infetadu nian no ba motorista na'in ida, haktuir hosi fonte sira Ministériu Saúde nian.

"Ekipa vijilánsia epidemiolójiku halo hela akompañamentu no monitoriza kontaktu sira ne'e no foti ona medida sira, inklui laboratorial sira, ne'ebé presiza", nia konsidera.

Embaixador Portugal nian iha Díli, José Pedro Machado Vieira, hatete ona ba Lusa katak situasaun akompaña hela hosi Ministériu Saúde nasaun rua nian, ne'ebé iha kontaktu nafatin, no tuir hosi autoridade lokal sira, hosi Organizasaun Mundial Saúde (OMS) no Embaixada.

"Profesor sira iha kuarentena dezde hetan kazu ne'e, iha loron-segunda liubá. Agora daudaun ami hein hela rezultadu hosi teste sira ne'ebé halo ona iha loron-segunda no hein aban", nia hatete.

Laiha profesor ida maka rejista, to'o agora, sintoma ruma hosi moras ne'e.

Rastreiu hosi kontaktu hosi profesora iha Portugal, ne'ebé to'o iha loron 04 Abril, halo hela hosi autoridade portugeza.

Timor-Leste rejista ona, to'o agora, kazu neen hosi COVID-19, inklui rekuperasaun hosi ema na'in ida.

Lusa

 


Comentários

Critério de publicação de comentários