Pájina aktualizada iha 20:19h, kinta-feira 24 Setembru

COVID-19: MNE pormenoriza apoiu internasional ba kombate moras ne'e

17 de Abril de 2020, 01:21

Ministru Negósiu Estranjeiru destaka iha loron-kinta ne'e apoiu internasional iha kombate ba COVID-19, hodi subliña esforsu sira hodi sosa material médiku ho tentativa hodi estabelese unidade ida kuidadu intensivu nian.


Dionísio Babo, ne'ebé ko'alia iha parlamentu iha debate kona-ba resposta ba pandemia COVID-19 iha Timor-Leste, subliña ona diálogu regular ho maka'as ho nasaun viziñu oioin ho parseiru internasional sira, ho destake ba Organizasaun Mundial Saúde (OMS).

Governante admiti ona katak, iha parte, apoiu ne'e hetan hela susar tanba limitasaun hosi sirkulasaun hosi ema sira ho sasán sira, nune'e "hamosu dezafiu boot ba nasaun", motivu ne'ebé Governu konklui ona akordu ida hodi mantén dalan aéreu ida nakloke, liuliu ba karga, entre Díli ho Austrália.

Importante maka akordu halo ho Programa ONU nian ba Dezenvolvimentu (UNDP) hodi sosa material médiku ho ekipamentu iha merkadu internasional, nia rekoñese.

"Sosa sira ne'e halo tuir hela kontrolu maka'as ida hosi kualidade hodi evita atu bele to'o material falsu, hanesan akontese iha nasaun oioin. No ami tenki rezolve kestaun transporte hosi produtu sira ba Timor", nia afirma.

Babo lembra katak iha "buka maka'as ba material ho ekipamentu médiku" iha mundu no katak Timor-Leste halo hela "esforsu maka'as ida" hodi garanti importasaun hosi sasán importadu sira.

Babo destaka ona apoiu boot ne'ebé maka OMS fó hela ba esforsu sira hodi kombate moras ne'e iha Timor-Leste, hodi subliña mós apoiu ne'ebé fó hosi Uniaun Europeia liuhosi UNICEF no apoiu hosi nasaun sira hanesan Austrália, Xina, Japaun, Estadus Unidus ho Koreia-Súl.

Uniaun Europeia ho ONU anunsia mós katak sei haruka parte balun hosi fundu projetu Spotlight, ne'ebé kombate violénsia jéneru, hodi hatán ba impaktu hosi COVID-19 liuliu iha tema sira violénsia ba feto sira ho labarik-feto sira.

Aleinde apoiu ho material protesaun pesoal nian, asisténsia ba Laboratóriu Nasional no ba reforsu hosi sentru sira izolamentu nian, Babo refere ba asisténsia ne'ebé nasaun oioin fó hela ba estudante sira ka traballador timoroan sira.

Liuliu, destaka ona desizaun hosi Canberra hodi aumenta vistu sira ba tinan ida ba traballador timoroan sira iha Austrália, bainhira Koreia-Súl renova mós vistu hosi traballador sira no estudante sira timoroan nian iha nasaun.

Babo esplika ona katak halo hela negosiasaun ho Austrália ba posibilidade hodi estabelese ba unidade móvel ida hosi kuidadu intensivu no ne'ebé hala'o hela diskusaun sira ho nasaun sira seluk kona-ba fornesimentu hosi ai-han sira, liuliu foos.

To'o agora, Timor-Leste iha kazu 18 hosi COVID-19, na'in ida rekupera ona.

Iha nível global, pandemia COVID-19 halo ona ema rihun 133 resin mate no infeta ona ema millaun rua resin iha nasaun ho teritóriu hamutuk 193. Pasiente hamutuk rihun 436 resin konsidera kura ona.

Hodi kombate pandemia, governu sira haruka ema biliaun haat (liu metadu hosi populasaun planeta nian) hakmatek iha uma, taka ona komérsiu la importante no hamenus maka'as tráfego aéreu, hapara área tomak hosi ekonomia mundial.

Lusa

 


Comentários

Critério de publicação de comentários