Pájina aktualizada iha 07:06h, kinta-feira 03 Jullu

COVID-19: Governu esplika katak kazu sira iha ligasaun ho fatin haat iha Díli

18 de Abril de 2020, 00:17

Iha loron-sesta ne'e, autoridade sira saúde nian anunsia ona katak kazu 18 hosi ema infetadu sira no na'in haat sira seluk ne'ebé deskonfia ba COVID-19 halo parte iha fatin haat ne'ebé uza ba kuarentena hosi sidadaun sira ne'ebé tama hosi Indonézia.


"Laiha kazu ida maka todan. Iha de'it ema na'in rua ka na'in tolu ho sintoma kmaan sira konstipasaun nian maibé maioria laiha sintoma", esplika hosi Rui Araújo, porta-vós hosi Sentru Integradu ba Jestaun Krizi nian (CIGC).

"Teste sira halo ona tanba sira hanesan ema sira ne'ebé iha kontaktu ho kazu pozitivu sira", nia refere hodi nota katak kazu konfirmadu sira hotu no kazu provável sira iha hela izolamentu iha Klínika Vera Cruz iha Díli.

Rui Araújo hatete katak parte barak hosi kazu konfirmadu, 16, mai hosi fatin úniku iha Hotel Katuas, iha sentru Díli, ne'ebé iha mós kazu "provável" seluk ida ne'ebé nia análize dahuluk hanesan inkonkluzivu.

Grupu ne'e tama ona iha Timor-Leste iha loron 01 Abril liuhosi fronteira rai no transporta ba Díli.

Rui Araújo konfirma ona katak iha mós kazu konfirmadu ida iha Hotel Timing, iha sentru kapital nian, hosi sidadaun na'in ida ne'ebé tama iha nasaun iha loron 29 Marsu.

Iha mós "kazu provável" ida hosi Hotel Fortuna, iha zona Farol, iha Díli, ne'ebé tama mós iha nasaun iha loron 29 Marsu no kazu provável seluk ida hosi ema timoroan sira ne'ebé iha hela kuarentena iha Hotel Novo Horizonte, iha zona leste sidade nian, no ne'ebé maka tama iha nasaun iha loron 08 Abril.

Aleinde ne'e, Rui Araújo hatete ona katak autoridade sira desisi aumenta períudu kuarentena ba ema na'in 14 ne'ebé iha hotel seluk ida iha zona osidental sidade nian.

"Hanesan joven estudante sira ne'ebé iha laiha tinan 60. Hanesan ema sira ne'ebé iha imunidade maka'as liu no lahó moras krónika nune'e risku hanesan ki'ik hosi kazu sira todan liu. Ne'e fó mai ami tempu balun hodi ami bele prepara", nia refere.

"Maibé joven sira tenki kontribui no tanba ne'e tenki hili no mantén distansiamentu sosial no medida sira seluk", nia subliña.

Autoridade timoroan sira, to'o agora, rejista ona kazu 18 hosi COVID-19, ne'ebé na'in ida rekupera ona, no kazu negativu hamutuk 195, rejista mós "kazu provável haat" ne'ebé maka presiza halo teste foun sira. Ema na'in 19 seluk hein hela rezultadu sira.

Rui Aráujo hatete ona katak halo hela prosesu hodi sosa material ho ekipamentu médiku, inklui ventilador sira - Timor-Leste iha de'it ventilador ida - no formasaun iha nasaun tomak.

"Ekipa formador sira hosi Institutu Nasional Saúde nian, no hosi organizasaun Maluk Timor, ho apoiu hosi ONG no parseiru dezenvolvimentu nian, fó hela formasaun ba ekipa médika sira iha munisípiu sira no iha sentru saúde sira iha nasaun laran hodi halo triajen ho konsulta", nia refere.

"Triajen nia objetivu maka identifika ema sira ne'ebé bele iha sintoma sira COVID-19 nian. Halo parte hosi esforsu prevensaun no mitigasaun", nia hatete.

Lusa

 


Comentários

Critério de publicação de comentários