Pájina aktualizada iha 20:45h, kinta-feira 24 Setembru

COVID-19: Autoridade sira aprova pakote ekonómiku

18 de Abril de 2020, 02:27

Iha loron-sesta ne'e, autoridade sira aprova ona pakote ida ho medida ekonómiku hamutuk 19 hodi hatán ba efeitu sira COVID-19 nian no ne'ebé inklui, entre medida sira seluk, subsídiu ida ba família sira ho apoiu ba traballador sira ho empregu sira, haktuir hosi ministru iha área ne'e ba Lusa.


"Hanesan medida sira ho baze iha pilar neen - konektividade, sasán importante sira, telekomunikasaun, serbisu báziku sira, kréditu ho apoiu diretu ne'ebé agora sei aprova iha Konsellu Ministru", hatete hosi Fidelis Magalhães, ministru kordenador interinu ba Asuntu Ekonómiku sira, ba Lusa.

Medida sira, ne'ebé ko'alia ona iha semana hirak nia laran, aprova ona durante reuniaun ida hosi komisaun interministerial Governu nian hodi hasoru COVID-19, ne'ebé desidi aumenta mós estadu emerjénsia ba loron 30, ne'ebé sei hala'o daudaun to'o loron 28 Abril.

Pakote ne'ebé aprova iha loron-sesta ne'e, ne'ebé sei sai iha diploma sira iha Konsellu Ministru sira, hakarak hatán ba risku ekonómiku hosi COVID-19 iha Timor-Leste.

Medida balun, hanesan konektividade área ho ligasaun sira to'o Ataúro ka enklave Oecusse, aprova tiha ona, nune'e sei implementa tuir dalan progresivu, nia esplika.

Iha konkretu, hanesan "medida estratéjika hamutuk 19 hodi implementa lalais hodi apoia família sira ho empreza sira iha tempu susar ne'e, hamenus impaktu ekonómiku hosi emerjénsia sanitáriu".

Hanesan medida sira ne'ebé haree liuliu hodi "proteje ema sira, proteje empregu, sustenta konsumu no apoia atividade sira hosi área privadu".

Medida sira inklui subsídiu ida ba família hamuutk 214 resin durante fulan tolu, pagamentu to'o 60% hosi saláriu traballador sira hosi área formal ne'ebé maka iha kuarentena ka iha uma.

"Ne'e sei estabiliza empregu no sei permiti atu empreza sira kontinua fó nafatin nia pesoal importante", refere Governu.

Ezekutivu sei sosa mós stock emerjénsia ida ba foos hodi garanti fornesimentu durante fulan tolu no "kompensa posibilidade ba falta durante pandemia".

Governu sei mantén ligasaun aéreu ho Darwin, sei selu transporte tasi nian ba merkadoria sira hosi no ba Ataúro ho Oecusse no sei permiti deskarga iha Portu Díli durante oras 24 nia laran hodi evita atrazu sira iha distribuisaun ba abastesimentu importante sira.

Governu sei mantén subsídiu elétriku ida ho dolar 15 fulan-fulan, sei halakon konta bee nian no sei suspende pagamentu ba distribuisaun sira seguransa sosial nian no pagamentu ba renda iha rai sira Estadu nian.

"Medida sira inklui programa ida kréditu konsiderável, ho taxa juru sira ki'ik, garantia sira kréditu nian ba importador sira hosi sasán importante sira ho empréstimu emerjénsia nian, hodi evita falénsia, mantén empreza sira loke nafatin no apoia família sira hodi rezolve sira nia susar finanseiru.

Fidelis Magalhães destaka mós programa ida hodi aumenta oferta hosi hahán sira iha kosta-súl, apoiu sira hodi fortalese produsaun agríkola, pekuáriu ho peska no fó bolsa apoiu nian ba estudante timoroan na'in 4.200 resin iha estranjeiru no ne'ebé agora labele fila ba nasaun.

Governu desidi aprova "rekursu fiskal sira no monetáriu sira ne'ebé presiza hodi garanti lalais atu ekonomia sobrevive durante krizi" COVID-19 nian, tuir informa hosi ezekutivu iha nota ida ne'ebé haruka ba Lusa.

"Hanesna prioridade nasional ida ko'alia kustu sira ho implikasaun sira hosi xoke ekonómiku ida ba períudu ida fulan tolu, hosi Maiu to'o Jullu, hodi nune'e ema sira ne'ebé afetadu hosi efeitu negativu sira bele hetan protesaun hasoru lakon rendimentu sira hodi nune'e empreza sira ne'ebé hasoru susar bele mantén nia fluksu kaixa ho atividade ekonómiku", refere ezekutivu.

Projesaun sira Governu nian ba tinan ne'e antesipa katak agregadu familiar médiu bele sofre lakon rendimentu entre dolar 170 no 670, signifika maka'as bainhira haree katak saláriu mínimu haleu entre dolar 120 fulan-fulan.

"Ne'e bele halo ami nia sidadaun fraku sira ba pobreza no ba défice hahán nian", Magalhães esplika.

Iha Timor-Leste, alunu sira sei simu subsídiu asesu ba internet hodi estuda iha distánsia, ho Governu dezenvolve "sistema rastreiu ida ba COVID-19".

Timor-Leste, to'o agora, iha kazu konfirmadu COVID-19 hamutuk 18, na'in ida rekupera ona.

Iha nível global, pandemia COVID-19 halo ona ema rihun 145 mate no infeta ona ema millaun 2,1 resin iha nasaun ho teritóriu sira 193.

Hodi kombate pandemia, governu sira haruka ona ema biliaun haat ba uma (liuhosi metade populasaun planeta nian), taka komérsiu ne'ebé la importante no hamenus maka'as tráfegu aéreu, hapara área tomak hosi ekonomia mundial.

Lusa

 


Comentários

Critério de publicação de comentários