Pájina aktualizada iha 20:41h, kinta-feira 24 Setembru

COVID-19: Kazu sira iha Timor-Leste aumenta ba 22, na'in ida rekupera ona

20 de Abril de 2020, 19:41

Autoridade sira saúde nian anunsia ona iha loron-segunda ne'e katak iha nível ofisial iha tan kazu foun tolu ba COVID-19 nian, aumenta nune'e ba ema na'in 22 hosi númeru total ema infetadu sira iha nasaun dezde inísiu moras ne'e, na'in ida rekupera ona.


Porta-vós hosi Sentru Integradu ba Jestaun Krizi nian (CIGC) Rui Araújo konfirma ona iha briefing diáriu iha Sala Situasaun nian katak kazu foun ida hosi kazu pozitivu foun sira ne'e maka profesor portugés na'in ida ne'ebé maka destaka iha Liquiçá, iha leste Díli nian.

"To'o agora ekipa vijilánsia epidemiolójiku la deteta kazu suspeitu ida iha komunidade Liquiçá nian", nia afirma.

Kazu pozitivu foun ida, ne'ebé Lusa fó sai iha notísia iha loron-domingu, hanesan profesor portugés ida ne'ebé nia amostra, antes ho rezultadu negativu maibé ikusmai analiza fali iha Darwin, iha Austrália.

Pasiente ne'e ho pasiente seluk, ne'ebé nia análize daruak iha Darwin hatudu hanesan "inkonkluzivu", halo parte hosi grupu ida ho profesor na'in haat ho motorista na'in ida ne'ebé maka iha kontaktu ho profesora portugeza ne'ebé halo ona viajen ba Lisboa iha loron 04 Abril ne'ebé, ikusmai, iha teste pozitivu ba COVID-19.

Profesora ne'e halo viajen ba Portugal ho ema portugés na'in 200 resin iha semo repatriamentu ne'ebé organiza hosi Governu portugés.

Rui Aráujo adianta ona katak profesor na'in rua ne'e transfere ona iha loron-segunda ne'e ba izolamentu iha Klínika Vera Cruz, iha Díli, sira na'in rua "laiha sintoma sira".

Profesor na'in rua seluk ho motorista agora tenki kompleta fali siklu loron 14 ba kuarentena nian hodi nune'e bele halo fali teste sira, haktuir hosi fonte projetu ne'ebé maka dosente sira halo parte.

Iha Klínika Vera Cruz iha pasiente na'in 21 ne'ebé maka infetadu no na'in lima seluk hanesan provável, balun ho sintoma kmaan, maibé maioria lahó sintoma ida.

"Sira iha akompañamentu ho observasaun médiku. Bainhira iha sintoma sira simu tratamentu no bainhira la dezenvolve sintoma sira sei iha nafatin observasaun, ho akompañamentu espiritual no psikolójiku online ho WhatsApp, bainhira sira presiza", nia esplika.

Rui Araújo esplika katak kazu ativu sira iha Timor-Leste iha relasaun ho "kluster neen", iha konkretu maka hotel lima iha Díli, no grupu hosi dosente portugés sira iha vila Liquiçá.

Rui Araújo hatete ona katak profesora infetadu no na'in ida seluk ho rezultadu inkonkluzivu sira to'o ona iha Timor-Leste iha loron 28 Fevereiru no katak profesora portugeza ne'ebé iha teste pozitivu iha Portugal to'o iha Díli iha loron 09 Marsu.

Balansu ikus hatudu katak autoridade timoroan sira rejista ona kazu hamutuk 327 hosi ema sira ho rezultadu suspeitu sira, na'in lima konsidera hanesan "provável" no na'in 91 hein hela rezultadu, ho na'in 123 negativu.

Iha kuarentena iha mós ema na'in 597, entre sira maka profisional saúde na'in 23 ho funsionáriu sira seluk ne'ebé maka envolve hela iha apoiu ba ema sira iha izolamentu ho kuarentena, iha prosesu ida rotatividade hosi ekipa sira.

Aleinde grupu sira ne'ebé identifika ona iha Díli, Rui Araújo hatete ona katak autoridade sira hela hela rezultadu sira ba teste sira hosi kazu suspeitu sira iha Aileu ho Same, iha parte súl hosi Díli, ne'ebé sidadaun sira iha hela izolamentu.

Iha nível global, pandemia COVID-19 halo ona ema rihun 164 resin mate no infeta ona ema millaun 2,3 resin iha nasaun ho teritóriu hamutuk 193. Pasiente rihun 525 resin maka konsidera hanesan kura ona.

Lusa

 


Comentários

Critério de publicação de comentários