Pájina aktualizada iha 07:28h, kinta-feira 03 Jullu

COVID-19: Timor-Leste ho "pasaporte hodi aprende" iha projetu ensinu distánsia nian

21 de Abril de 2020, 01:41

Labarik sira iha Timor-Leste hetan daudaun benefísiu dezde final Marsu nian ba ensinu distánsia nian, ho konteúdu sira iha televizaun ho radiofóniku, livru eletróniku sira ho plataforma online ida iha ámbitu hosi projetu ida hosi Ministériu Edukasaun ne'ebé apoia hosi UNICEF.


"Escola ba Uma" dezenvolve ona hosi Ministériu Edukasaun hodi fornese konteúdu sira iha plataforma oioin hodi nune'e labarik sira iha nível oioin ensinu nian bele estuda nafatin durante períudu taka eskola sira tanba COVID-19.

Inisiativu ne'e iha baze iha plataforma Learning Passport, dezenvolve ho apoiu hosi UNICEF ho Microsoft, ne'ebé permiti, refere hosi komunikadu ida hosi organizasaun internasional, atu material sira ensinu nian bele iha asesu iha fatin ruma iha nasaun laran.

Dezenvolve lalais tebes iha de'it semana rua nia laran, "Escola Ba Uma" produs ona epizódiu televizaun hamutuk 28 no programa rádiu rua, disponibiliza livru eletróniku sira ho livru ida hodi nune'e aman-inan sira bele esplika ba oan sira ho nesesidade espesial kona-ba saida maka COVID-19.

Iha nota ne'ebé haruka ba Lusa, UNICEF esplika katak plataforma inklui programa televizaun sira ho radiofóniku sira - ne'ebé sei transmiti loron-loron iha televizaun ho rádiu públika sira, RTTL, manual sira ho livru sira istória nian hosi kuríkulu nasional no mós material adisional hosi ensinu distánsia nian.

Iha kazu hosi alunu sira ne'ebé laiha asesu ba teknolojia foun sira, halo daudaun impresaun ba livru sira ne'ebé maka sei fahe iha nasaun tomak, UNICEF esplika.

Inisiativu inklui dezenvolvimentu hosi aplikasaun ida ba telefone móvel sira - agora daudaun iha faze teste sira antes halo nia lansamentu -, no parseria ida ho empreza telekomunikasaun ida hodi nune'e nia kliente hamutuk rihun 600 bele iha asesu gratuitu ba livru sira.

Iha nível global, plataforma Learning Passport lansa iha loron-segunda ne'e hodi bele uza iha mundu tomak, iha momentu ne'ebé iha enseramentu ka limitasaun sira iha ensinu prezensial ne'ebé afeta nasaun 190 resin no alunu hamutuk biliaun 1,57, haktuir hosi komunikadu hamutuk ida hosi UNICEF ho Microsoft.

Projetu hanesan adaptasaun ida hosi inisiativu ida ne'ebé dezenvolve ho apoiu hosi Universidade de Cambridge no diresionadu ba labarik deslokadu sira ka refujiadu sira.

"Agora maka aumenta hodi permiti introdusaun hosi kuríkulu nasional sira ba labarik sira ho joven sira ne'ebé sira nia eskola taka tanba COVID-19", refere hosi komunikadu hodi nota katak plataforma iha rekursu sira ba profesor sira, alunu sira ho enkaregadu edukasaun.

Henrietta Forre, diretora ezekutivu UNICEF nian, esplika katak "entre taka eskola sira, izolamentu ho sentimentu persistente ba tauk ho ansiedade, efeitu sira pandemia nian iha mós impaktu iha labarik sira iha mundu tomak".

"Ita bele serbisu hamutuk hodi esplora dalan tomak hodi garanti edukasaun hosi labarik sira no apoia sira iha momentu sira susar ne'e", nia refere.

Dezenvolve iha fulan 18 ikus ne'e, plataforma tuir loloos hahú ho projetu-pilotu sira, no aselera ona kalendáriu tanba efeitu sira hosi COVID-19 iha mundu tomak.

Aleinde Timor-Leste, Kosovo ho Ukránia hanesan nasaun dahuluk sira ne'ebé maka implementa kuríkulu nasional sira iha plataforma.

"Hanesan impaktu COVID-19 laiha fronteira, solusaun sira mós labele iha fronteira no eziji kolaborasaun hosi setór públiku ho privadu hodi garanti atu alunu sira hotu kontinua aprende", hatete hosi Brad Smith, prezidente hosi Microsoft.

To'o agora, Timor-Leste rejista ona kazu konfirmadu hamutuk 22 ba COVID-19, entre sira na'in ida rekupera ona.

Iha nível global, pandemia COVID-19 halo ona ema rihun 164 resin mate no infeta ona ema millaun 2,3 resin iha nasaun ho teritóriu hamutuk 193. Pasiente rihun 525 resin maka konsidera hanesan kura ona.

Lusa

 


Comentários

Critério de publicação de comentários