Pájina aktualizada iha 21:27h, kinta-feira 24 Setembru

COVID-19: Governu aprova planu sosioekonómiku hodi hatán ba pandemia

21 de Abril de 2020, 02:54

Konsellu Ministru aprova ona iha loron-segunda ne'e planu sosioekonómiku ida ho medida hamutuk 20 resin hodi hatán ba efeitu negativu sira COVID-19 nian iha ekonomia nasional, informa hosi ezekutivu.


"Aprova ona planu iha nia totalidade no iha loron-kuarta sei aprova diploma oioin ne'ebé presiza hodi halo nia implementasaun", hatete ba Lusa hosi Fidelis Magalhães, ministru kordenador interinu ba Asuntu Ekonómiku.

"Folin total hosi medida sira ne'e sei proporsional ba impaktu sira hosi emerjénsia sanitáriu no medida ekonómiku sira sei dinámiku no sei haree ba nia pezu bainhira dura impaktu ekonómiku", refere Governu iha komunikadu maibé lahó detalle ba folin parsial sira hosi medida sira.

Medida sira, ne'ebé ko'alia ona iha semana hirak nia laran, diskuti no fortelesidu iha loron-sesta durante reuniaun ida hosi komisaun interministerial hosi Governu timoroan hodi hasoru ho COVID-19.

Iha loron-segunda ne'e maka aprova iha nível formal iha reuniaun hosi Konsellu Ministru ne'ebé desidi mós hodi husu ba Prezidente Repúblika aumentu ba estadu emerjénsia durante loron 30 tan.

Hanesan medida sira ne'ebé haree espesial liu hodi "proteje ema sira, proteje empregu sira, sustenta konsumu ho apoia atividade sira hosi área privadu" no inklui "rendimentu báziku mensal ida" ba família rihun 214 resin durante fulan tolu no pagamentu to'o 60% hosi saláriu sira hosi traballador sira hosi área formal ne'ebé maka iha redusaun ka suspensaun ba kontratu.

Entre "medida estratéjiku sira", iha mós sosa stock ida ba foos emerjénsia ba fulan tolu, "hodi kompensa posibilidade ba falta ruma durante pandemia", fo subsídiu sira hodi garanti konektividade nasional no garanti ligasaun aéreu semana ida dala tolu ba "ligasaun médiku sira ho emerjénsia importante sira" entre Díli ho Darwin.

Iha medida sira inklui mós subsídiu sira hosi transporte marítimu hosi merkadoria sira hosi Ataúro ho Oecusse no aumenta deskarga sira iha portu marítimu durante oras 24 nia laran iha loron no fó izensaun parsial iha pagamentu ba konta sira enerjia elétriku nian no izensaun ba pagamentu konta bee nian.

Empreza sira ho traballador sira sei izentu mós hosi kontribuisaun ba Seguransa Sosial no sei izenta mós pagamentu ba renda sira hosi propriedade sira Estadu nian.

Governu aprova mós programa kréditu ida ho taxa ki'ik, "garantia kréditu ba importador sira hosi sasán importante sira ho empréstimu sira emerjénsia nian".

Sei implementa mós programa ida hodi aumenta oferta hahán nian iha kosta-súl no medida sira "hodi garanti disponibilidade ba fator produsaun agríkola, pekuáriu ho peska".

Tanba desizaun hodi taka fronteira sira ba sidadaun ruma hodi labele tama iha nasaun, Governu desidi mós fó apoiu finanseiru ba estudante timoroan na'in 4.200 resin iha estranjeiru nune'e mós subsídiu internet nian ba estudante sira iha Timor-Leste.

To'o agora, Timor-Leste rejista ona kazu konfirmadu hamutuk 22 ba COVID-19, entre sira na'in ida rekupera ona.

Iha nível global, pandemia COVID-19 halo ona ema rihun 164 resin mate no infeta ona ema millaun 2,3 resin iha nasaun ho teritóriu hamutuk 193. Pasiente rihun 525 resin maka konsidera hanesan kura ona.

Lusa

 


Comentários

Critério de publicação de comentários