Pájina aktualizada iha 06:52h, kinta-feira 03 Jullu

COVID-19: Governu aprova subsídiu ba família sira ho rendimentu ki'ik

23 de Abril de 2020, 23:43

Iha loron-kinta ne'e, Governu aprova ona subsídiu estraordináriu ida hamutuk dolar 100 durante fulan tolu ba família timoroan sira, hanesan medida hodi hatán ba impaktu hosi COVID-19 iha ekonomia nasional.


Medida, ne'ebé tuir Governu hakarak hatán ba "impaktu prejudisial sira iha meiu hosi subsisténsia hosi família sira ho rendimentu ki'ik iha nasaun tomak", sei fó apoiu ba agregadu sira ne'ebé maka rejista iha Livru Família nian to'o loron 31 Marsu.

Sei inklui agregadu familiar tomak "kompostu hosi pelumenus sidadaun na'in ida" dezde "nia elementu ruma hosi família, fulan-fulan, manán ho dalan regular montante ida aas liu dolar amerikanu 500".

Medida, aprezenta hosi ministra Solidariedade Sosial ho Inkluzaun, Armanda Berta dos Santos, halo parte iha pakote hosi medida sosioekonómiku sira Governu nian hodi hasoru ho impaktu hosi pandemia COVID-19.

Aprovasaun akontese maski iha diferensa opiniaun sira iha ezekutivu nia laran kona-ba universalidade ka la'e ba nia aplikasaun, ho fonte sira hosi ezekutivu admiti ba Lusa katak laiha informasaun loloos no mós númeru hosi família sira no mós kona-ba oinsá determina limiti hosi dolar 500 iha nasaun ida ne'ebé parte barak hosi ekonomia hanesan informal no ne'ebé kuaze laiha deklarasaun ba rendimentu sira.

Solusaun ne'ebé hetan hanesan dalan ida entre membru sira Governu nian ne'ebé defende universalidade hosi nia aplikasaun ba família tomak iha nasaun no sira ne'ebé defende justisa sosial boot iha definisaun hosi família sira ne'ebé maka sei hetan benefísiu.

Fidelis Magalhães, ministru kordenador interinu hosi Asuntu Ekonómiku, hatete ba Lusa katak desizaun ikus maka "ida ne'ebé aprova ona" maibé admiti susar sira relasiona ho informasaun desagregadu sira kona-ba rendimentu.

Kálkulu dahuluk sira hatudu katak bele inklui família rihun 120 resin ho kustu total hosi medida, durante fulan tolu, varia entre dolar millaun 30 no 40.

Magalhães hatete katak pagamentu sei selu liuhosi Fundu COVID-19 nian, kria hosi Governu hodi hatán ba pandemia, subliña katak iha loron-kinta ne'e hasoru malu ho deputadu sira hosi komisaun sira C ho D hosi parlamentu hodi fó hatene ba pakote hosi medida sira Governu.

"Ha'u iha loron-sesta ne'e iha parlamentu no simu apoiu ida unanimidade hosi deputadu tomak hosi komisaun C ho D ba aprezentasaun integradu hosi medida tomak Governu nian", nia hatete.

"Agora daudaun Governu iha Fundu COVID-19 no konta Tezouru no, tanba ne'e, hanesan kestaun ida jestaun nian hosi parte Governu nian. Maibé bainhira presiza aumenta fundu sira, hanesan natural Governu sei uza reforsu ida hosi Fundu Petrolíferu, ba Fundu COVID-19 nian no mós ba kofre Estadu nian, ne'ebé tenki liuhosi parlamentu", nia esplika.

Fidelis Magalhães hatete katak maski sistema "la hanesan perfeitu" hanesan importante halo ona asaun ho apoiu ne'e ba família sira, ikusmai ajusta "nia implementasaun" hodi hamenus impaktu krizi nian.

"Governu tenki apoia. Laiha dalan seluk bainhira nasaun hasoru hela krizi ida ho dimensaun hanesan ne'e. Bainhira ami hein to'o buat hotu sai perfeitu, nunka avansa ho perfeisaun. Ami tenki hamenus no kontrola marjen sira sala nian", nia afirma.

"No hanesan mós oportunidade di'ak ida hodi formaliza ekonomia nasional no hodi aumenta uzu hosi servisu formal sira hosi ekonomia nasional, hanesan banku sira ho instituisaun finanseiru sira", nia hatete.

Sara Brites, ministra interina Finansa nian, hatete ona ba Lusa katak nia kontra universalidade hosi medida, hodi defende katak apoiu tuir loloos haruka liuliu ba família sira ne'ebé iha situasaun aat tebes.

Hodi admiti katak laiha informasaun loloos kona-ba númeru hosi família sira, Brites rekoñese ona katak "hanesan susar" determina rendimentu sira hosi ema sira maibé apoiu ne'e tenki sai ba família sira.

"Hanesan importante fó apoiu ne'e, liuliu ba família fraku sira. Sé maka laiha rendimentu fisku sira hasoru daudaun susar balun. Maibé apoiu tenki fó ba númeru ki'ik tebes hosi família sira. Labele ba família sira hotu", nia konsidera.

Apoiu sei hahú fó iha fulan tuirmai hahú hosi aprovasaun diploma nian, nune'e implika atu valor dahuluk sira sei seluk iha fulan-Maiu.

Entre desizaun sira seluk, Governu aprova mós iha loron-kinta ne'e sosa foos iha Vietname, proposta hosi Fidelis Magalhães, "hodi reforsa stock foos nian ne'ebé iha hodi bele hasoru ho posibilidade falta durante pandemia".

Timor-Leste, agora daudaun iha kazu konfirmadu ba COVID-19 hamutuk 23, na'in ida rekupera ona, nune'e hanesan "indispensável renovasaun hosi deklarasaun estadu emerjénsia nian", nia hatutan.

Iha nível global, haktuir hosi balansu ida AFP nian, pandemia COVID-19 halo ona ema rihun 181 resin mate no infeta ona ema millaun 2,6 resin iha nasaun ho teritóriu hamutuk 193. Pasiente na'in 593.500 resin maka konsidera kura ona.

Lusa

 


Comentários

Critério de publicação de comentários