Pájina aktualizada iha 06:52h, kinta-feira 03 Jullu

Fretilin repete apoiu ba Governu atual hodi hakotu lejislatura

24 de Abril de 2020, 00:33

Fretilin, partidu boot iha parlamentu, repete fali, iha loron-kinta ne'e, nia apoiu ba Governu atual hodi hakotu lejislatura, pozisaun ida ne'ebé hakarak garanti estabilidade no evita krizi sira, inklui kombate ba COVID-19.


"Atu labele iha dúvida bainhira afirma katak apoiu Fretilin ba Governu daualuk iha de'it sentidu ida - garanti atu governu ho nia primeiru-ministru Taur Matan Ruak kontinua governa to'o nia mandatu nia rohan iha tinan 2023, ho estabilidade total no lahó krizi institusional sira hosi natureza ruma", hakerek hosi sekretáriu-jeral hosi Frente Revolucionária do Timor-Leste Independente (Fretilin), iha nota ida ne'ebé haruka ba Lusa.

"Ami repete fali katak apoiu (…) sei akontese, ho dalan hanesan, maski lahó COVID-19", tanba, tuir esplika hosi Mari Alkatiri, apoiu ne'e "halo ho baze iha nesesidade hodi garanti estabilidade governativu ho governabilidade nasaun nian to'o 2023".

Iha "nota esklaresimentu", sekretáriu-jeral Fretilin nian refere ba apoiu ne'ebé nia partidu fó ba Governu.

"Nune'e sai klaru katak Fretilin nia apoiu hakarak reforsa lejitimidade hosi Governu Konstitusional daualuk no garanti estabilidade governativu to'o tinan 2023 no la'os kria "aliansa" parlamentar ida hodi konstitui Governu foun ida", nia afirma.

Rekorda katak Governu atual ne'ebé sai hosi vitória ida hosi koligasaun ida pré-eleitoral - Aliansa Mudansa ba Progresu (AMP) - harii hosi Congresso Nacional da Reconstrução Timorense (CNRT), hosi Xanana Gusmão, Partidu Libertasaun Popular (PLP) hosi Taur Matan Ruak ho Kmanek Haburas Unidade Nacional Timor Oan (KHUNTO), hosi José Naimori.

Koligasaun ne'e ikusmai fahe malu hafoin deputadu sira CNRT nian vota tiha kontra no abstensaun iha Orsamentu Jeral Estadu (OJE) ba tinan 2020, nune'e xumba tiha.

Situasaun aumenta tan krizi polítika iha nasaun, halo Taur Matan Ruak husu demisaun - ne'ebé liutiha fulan rua repete fali - no Prezidente Repúblika promove diálogu ida ho partidu sira, ne'ebé ikusmai harii koligasaun foun ida hosi partidu neen, lidera hosi CNRT, ne'ebé inklui deputadu na'in 34 hosi deputadu na'in 65 ne'ebé tuur iha parlamentu.

Koligasaun ne'e hatudu Xanana Gusmão nu'udar primeiru-ministru maibé proposta ne'e nunka hetan resposta hosi Prezidente Francisco Guterres Lu-Olo.

Fretilin ho PLP ikusmai asina nota entendimentu ida, membru sira hosi CNRT ho KHUNTO halo parte nafatin hosi Governu maski, dalaruma, partidu iha parlamentu vota kontra medida sira ne'ebé ezekutivu foti.

Alkatiri argumenta katak partidu promove nafatin diálogu hodi konkorda ho "plataforma boot ida hosi entendimentu nasional", pozisaun ne'ebé mantén hafoin manán eleisaun sira iha tinan 2017 ne'ebé buka "harii plataforma boot ida serbisu nian ne'ebé inklui akordu sira hosi koligasaun, inkluzaun ho insidénsia parlamentar ho partidu sira seluk".

"Lamentavelmente, hanoin sira ne'ebé la hanesan, no deskonfiansa balun sira, estraga fali esforsu sira", nia hakerek.

Alkatiri defende buka solusaun inkluzivu sira, maibé lahó baze iha de'it "maioria ne'ebé harii hafoin eleisaun sira, liuhosi prosesu ida kontajen nian hosi mandatu sira hosi minoria sira ne'ebé la hanesan", ne'ebé "ikusmai la inklui partidu ne'ebé hetan liu votu, trai espetativa ho sentidu hosi votu maioria nian".

Iha kontestu atual, no hafoin "disolusaun ka implozaun hosi eventual ida koligasaun pré-eleitoral nian", Alkatiri konsidera ona katak partidu ne'ebé hetan liu votu, iha kazu ne'e maka Fretilin, maka tenki "buka plataforma sira entendimentu nain hodi bele garanti kontinuasaun ba governasaun, viabiliza Governu ne'ebé iha ona ka harii governu seluk", ne'ebé nia lidera ka la'e.

"Bele akontese katak, tanba razaun sira hosi interese nasional, iha nesesidade hodi garanti medida balun hodi permiti estabilidade governativu ba Governu ida ne'ebé presiza apoiu hodi kompleta nia mandatu tinan lima nian", nia refere.

Iha kazu Fretilin nian, Alkatiri sustenta, apoiu tenki hatudu liuhosi "insidénsia parlamentar" iha apoiu ba medida sira Governu nian no hanesan tentativa hodi "kontraria tentativa balun hosi blokeiu institusional no hosi atuasaun hodi konkorda ba krizi konstitusional foun ida ne'ebé kontraria ba interese nasaun ho povu nian".

"Bainhira hakarak atu enfrakese potensial konlitu sira, baze entendimentu labele hanesan 'aliansa' foun ida ne'ebé harii hosi somáriu hosi mandatu sira hosi partidu ki'ik sira hodi harii Governu foun ida", nia subliña.

Alkatiri konsidera ona katak tenki buka reforsa lejitimidade Governu nian hodi nune'e "labele iha interupsaun forsadu hosi estabilidade governativu, loke dalan ba alternánsia anormal ida no ne'ebé la dezejável hanesan prátika polítika iha nasaun ida ne'ebé nia sistema esperimenta krizi identidade ida, ho reflexu iha ezersísiu poder nian".

Lusa

 


Comentários

Critério de publicação de comentários