Pájina aktualizada iha 20:33h, kinta-feira 24 Setembru

COVID-19: Jakarta prolonga limitasaun hodi inklui fulan Ramadaun nian

24 de Abril de 2020, 01:22

Iha loron-kinta ne'e, limitasaun sosial sira hodi trava propagasaun hosi koronavírus foun prolonga ona iha kapital Indonézia nian, bainhira populasaun hosi nasaun musulmanu boot liu iha mundu prepara hela ba fulan jejun Ramadaun nian.


Governador Jakarta nian, Anies Baswedan, hatete ona katak limitasaun, ne'ebé tuir loloos hotu iha loron-knta, sei aumenta to'o loron 22 Maiu no eziji atu musulmanu sira la desloka ba meskita sira durante Ramadaun.

Fulan musulmanu sagradu tenki hahú iha Indonézia iha loron-sesta. Fiél sira halo jejun durante loron no bainhira kalan sei halibur hamutuk hodi hakotu jejun ho refeisaun komunitáriu ho orasaun sira.

Prezidente indonéziu, Joko Widodo, rekoñese ona iha fulan liubá katak Governu la avansa informasaun kona-ba surtu koronavírus nian hodi evita pániku.

Maibé atrazu iha aplikasaun ba regra sira distansiamentu sosial no taxa ki'ik ba rastreiu aumenta preokupasaun katak situasaun iha Indonézia sei aat liu duké situasaun rekoñesidu.

Baswedan hanesan rival polítiku Prezidente nian no hili ona limitasaun sira todan sira bainhira infesaun sira aumenta iha kapital.

Indonézia rejista kazu COVID-19 nian hamutuk 7.418 ho na'in 635 mate.

Medida sira iha Jakarta fó tan poder ba autoridade sira hodi obriga ema sira hodi hakmatek iha uma no loja sira taka hotu.

Polísia bele impede reuniaun ruma ne'ebé iha liu ema na'in lima no infrator sira bele tama kadeia tinan ida no multa ida ho folin millaun 100 rupiah (euro 5.860).

Tuir balansu hosi ajénsia France Presse, pandemia COVID-19 halo ona ema na'in 184.000 mate no infeta ona ema millaun 2,6 resin iha nasaun ho teritóriu hamutuk 193.

Lusa

 


Comentários

Critério de publicação de comentários