Pájina aktualizada iha 04:06h, kinta-feira 03 Jullu

COVID-19: Pasiente infetadu sira iha Díli haktuir tratamentu di'ak iha fatin izolamentu

24 de Abril de 2020, 22:47

Pasiente infetadu sira ho COVID-19 iha Timor-Leste hatete ona, iha loron-sesta ne'e, katak sira hetan "tratamentu di'ak" no akompañamentu di'ak iha fatin izolamentu ne'ebé sira hela ba, instala hosi Governu iha Klínika Vera Cruz iha Díli.


"Ami simu daudaun tratamentu di'ak. Ami di'ak hela, laiha sintoma sira no simu akompañamentu ho dedikadu tebes", hatete ba Lusa hosi pasiente na'in ida, entre pasiente na'in 22 ne'ebé ativu, ne'ebé maka hela iha sentru izolamentu úniku ne'ebé instala agora iha Timor-Leste.

Iha fatin ne'e, aleinde pasiente na'in 22, iha suspeitu na'in haat seluk, no hetan ona alta, durante semana hirak nia laran, kazu konfirmadu dahuluk iha Timor-Leste.

Entre pasiente sira iha portugés na'in rua.

Pasiente sira agora iha grupu sira iha enfermaria oioin hosi kompleksu ne'ebé maka taka metin ba exterior no ne'ebé funsionáriu médiku sira, sira hotu uza ekipamentu protesaun pesoal nian, halo movimentasaun.

Maioria hosi pasiente sira laiha sintoma ruma, parte barak hosi akompañamentu halo hosi dook, liuhosi telefone. Sira seluk iha sintoma kmaan sira.

"Felismente ami la presiza kuidadu médiku sira tanba ami laiha sintoma ida. Maibé iha atensaun maka'as ida, ho kontaktu sira ne'ebé halo mós liuhosi telefone hodi hatene katak ami di'ak ka ami presiza buat ruma", nia hatete.

"Iha akompañamentu ida dedikadu tebes", refere hosi pasiente ida.

Pasiente sira ne'ebé ko'alia ho Lusa esplika ona katak refeisaun sira - loron ida dala tolu - "iha kualidade di'ak tebes, ho kuantidade ne'ebé jenerozu" no iha nafatin ai-fuan ho bee barak.

Rotina loron nian maka hanesan "kuaze izolamentu total", ho pasiente sira iha, ketak-ketak, períudu ida minutu 15 ba ezersísiu fíziku iha zona espesífiku ida iha kompleksu, iha ár livre.

Kompleksu Vera Cruz kompostu hosi edifísiu tolu, edifísiu prinsipal iha parte rua. Ida hosi parte direitu, zona separadu ba feto sira ho mane sira ne'ebé maka infetadu no, iha parte liman-karuk, ba pasiente sira ne'ebé suspeitu iha kontájiu balun.

Edifísiu iha zona osidental rezerva mós ba izolamentu.

Aleinde hariis-fatin sira no zona ida dapur nian, kompleksu iha sala sira ba konsulta sira no atendimentu médiku, sala ida ba raiu-x, farmásia ho zona armazenajen ho eskritóriu oioin.

Iha edifísiu prinsipal hosi kompleksu nian oin, instala ona tenda rua ONU nian ba apoiu adisional ne'ebé uza hodi halo avaliasaun ho triajen.

Pasiente pozitivu sira halo fali ona teste sira, presiza teste negativu konsekutivu rua hodi bele konsidera hanesan kura hodi nune'e bele simu alta.

Autoridade timoroan sira disponibiliza apoiu psikolójiku ho espiritual ba sé maka presiza ka sé maka husu, ba ema sira iha izolamentu no mós sira ne'ebé maka iha kuarentena iha instalasaun sira Governu nian.

Aleinde fornese hahán loron-loron, autoridade sira halo limpeza ho deinfesaun regular ba fatin sira, ho akompañamentu ida hosi vijilánsia médiku beibeik hodi detekta kazu ruma hosi COVID-19, liuliu iha fatin sira kuarentena nian.

To'o agora, autoridade sira iha Timor-Leste halo ona teste ba ema na'in 382, ho kazu konfirmadu hamutuk 24 (na'in rua rekupera ona), negativu hamutuk 347 no ema na'in 28 hein hela rezultadu sira teste nian.

Ema na'in 1.695 maka hakotu ona períudu kuarentena durante loron 14.

Iha nível global, haktuir hosi balansu ida hosi ajénsia notísia France-Presse, pandemia COVID-19 nian halo ona ema rihun 190 resin mate no infeta ona ema millaun 2,6 iha nasaun ho teritóriu hamutuk 193, ho pasiente rihun 708 resin maka konsidera hanesan kura ona.

Lusa

 


Comentários

Critério de publicação de comentários