Pájina aktualizada iha 21:09h, kinta-feira 24 Setembru

COVID-19: Pakote medida ekonómiku ho sosial iha Timor-Leste kusta dolar millaun 142

25 de Abril de 2020, 00:57

Pakote ba medida sosioekonómiku sira Governu nian hodi hatán ba impaktu hosi pandemia COVID-19 iha kustu kalkuladu hamutuk dolar millaun 142 to'o Agosto, haktuir Ezekutivu.


Konta sira, halo hosi gabinete ministru kordenador interinu ba Asuntu Ekonómiku nian, Fidelis Magalhães, no disponibiliza ba Lusa, hatudu katak parte boot hosi gastu, besik dolar millaun 89, sei haruka ba apoiu diretu.

Hosi valor ne'e, inklui dolar millaun 68 ne'ebé estimadu ba subsídiu diretu hamutuk dolar 100 fulan-fulan, durante fulan tolu, ba família timoroan sira, aprova hosi Governu iha loron-kinta, maski valor final bele ajusta ho kritéiru hosi distribuisaun apoiu nian.

Pakote ne'e sei inklui mós gastu sira ne'ebé previstu hamutuk dolar millaun 14,69 ba programa subsídiu salarial sira to'o 60% ba universu ida kalkuladu hamutuk traballador rihun 30, apoia nune'e empreza sira ho empregu.

Izensaun ba kontribuisaun sira ba Seguransa Sosial durante fulan tolu sei iha kustu ida dolar millaun 2,45, valor hanesan ba apoiu ba estudante timoroan sira hamutuk na'in 3.500 resin iha estranjeiru, izensaun ba renda sira iha propriedade sira Estadu nian sei iha kustu besik dolar millaun 1,22.

Pilar daruak hosi despeza maka'as maka ho distribuisaun ba sasán importante sira, pakote ne'ebé sei iha kustu liu dolar millaun 24.

Iha kapítulu ne'e inklui despeza ida besik dolar millaun 19 hodi sosa 'stock' ida hamutuk tonelada rihun 33 ba foos emerjénsia nian hodi garanti seguransa alimentar ba populasaun.

Governu sei gasta mós dolar millaun 4,8 resin ho programa ida, hahú ona hosi Ministériu Agrikultura ho Peska, ba estímulu ba produsaun iha kosta-súl ho apoiu sira ba agrikultor ho peskador hamutuk rihun 36 resin.

Entre serbisu importante sira, Governu kalkula gasta kuaze dolar millaun ualu, parte boot hodi fornese dolar 15 eletrisidade gratuitu fulan-fulan, durante fulan tolu, ba universu ida kalkuladu hamutuk família rihun 160, no sira seluk hodi fornese bee gratuitu ba nasaun tomak.

Iha telekomunikasaun sira, Governu sei hein atu gasta dolar rihun 600 resin ba subsídiu ida hodi selu asesu ba internet ba alunu sira ho profesor sira hamutuk 67.000 hosi ensinu superior no alunu rihun 165 hosi ensinu sekundáriu.

Programa kontratasaun ba semo sira entre Díli ho Darwin sei iha kustu ba Estadu hamutuk dolar rihun 675 durante semana 10, ba folin ida tuir semo ba mai hamutuk dolar rihun 15.

Entre medida sira ne'ebé previstu, Governu antesipa kustu ida dolar millaun 19,68 ba programa kréditu ida ne'ebé inklui renegosia prazu sira, liña kréditu emerjénsia nian, mekanizmu sira hodi garanti importasaun ba sasán importante sira ho apoiu likidez ba prazu badak.

Medida sira, balun hahú implementa ona no sei selu hosi Fundu COVID-19, kria hosi Governu ho dolar millaun 150, no mós hosi konta Tezouru nian.

Agora daudaun, Timor-Leste iha kazu konfirmadu ba COVID-19 hamutuk 24, na'in rua rekupera ona.

Iha nível global, haktuir hosi balansu ida hosi ajénsia notísia France-Presse, pandemia COVID-19 nian halo ona ema rihun 190 resin mate no infeta ona ema millaun 2,6 iha nasaun ho teritóriu hamutuk 193, ho pasiente rihun 708 resin maka konsidera hanesan kura ona.

Lusa

 


Comentários

Critério de publicação de comentários