Pájina aktualizada iha 07:16h, kinta-feira 03 Jullu

COVID-19: OMS lansa koligasaun hodi iha vasina ho tratamentu asesível ba mundu tomak

25 de Abril de 2020, 01:58

Iha loron-sesta ne'e, Organizasaun Mundial Saúde (OMS) aprezenta ona koligasaun ida hosi nasaun sira, organizasaun sira ho empreza sira ne'ebé iha empeñu hodi asegura vasina sira, teste diagnóstiku sira ba COVID-19 hodi iha asesu lalais no ba mundu tomak.


"Esperiénsia iha pasadu hatudu mai ita katak maski bainhira feramenta sira ne'e disponível, sei la disponível ba ema hotu. Ita labele permiti atu ne'e akontese", afirma hosi diretor-jeral OMS, Tedros Ghebreyesus, iha aprezentasaun hosi "Aselerador ACT".

Fransa, España, Alemaña, Reinu Unidu, Itália, Uniaun Afrikanu, fundasaun Gates, Komisaun Europeia hanesan parseiru balun hosi inisiativu ne'ebé iha loron 04 Maiu sei iha reuniaun dahuluk hodi hetan fundu sira.

"Ne'e hanesan kolaborasaun istóriku ida hodi aselera dezenvolvimentu, produsaun ho distribuisaun ekuitativu hosi vasina sira, teste diagnóstiku no terapia sira ba COVID-19", hatete hosi Ghebreyesus.

Prezidente fransés, Emmanuel Macron, konsidera katak konjugasaun hosi vontade sira, ne'ebé inklui área públiku ho privadu, hanesan mós "tributu ida" ba investigador sira hotu ne'ebé serbisu ona hodi buka vasina ida ho kura ida no hosi profisional sira saúde nian.

Macron afirma ona katak fiar atu "sei laiha divizaun sira" entre nasaun sira hodi halo vasina sira sai asesível no atu nasaun sira hanesan Estadus Unidus ho Xina sei iha empeñu.

Xanxeler alemã, Angela Merkel, hatudu ona apoiu hosi nia nasaun ba "inisiativu polítiku tomak" ne'ebé ajuda halibur esforsu sira hodi dezenvolve vasina sira ho halibur osan sira ne'ebé presiza, hodi hatete katak presiza "aumenta kapasidade produsaun nian" hodi distribui vasina sira, teste sira ho terapia sira ba mundu tomak.

Xefe Governu hosi nasaun ida ne'ebé afetadu liu ho COVID-19, españól Pedro Sanchez, afirma ona empeñu hosi nia nasaun hodi "evita atu akontese iha fatin ruma akontesimentu ne'ebé maka akontese ona iha España".

Iha dokumentu ba lansamentu hosi inisiativu, hatete katak "bainhira iha ema ruma iha risku tanba vírus, mundu inteiru sei iha risku", no katak "ema hotu no ema ruma iha planeta presiza hetan protesaun hosi moras ne'e".

Tedros Ghebreyesus afirma ona katak hahú Janeiru liubá maka OMS serbisu hela ho "investigador millaun resin iha mundu tomak hodi aselera ho akompaña dezenvolvimentu hosi vasina sira", nune'e mós teste diagnóstiku sira ne'ebé uza ona iha nível global.

Nasaun sira ho organizasaun sira ne'ebé adere - hosi Europa, Ázia, Áfrika ho Amérika Latinu - kompromete ona kria "nível parseria ida ne'ebé nunka akontese" no ko'alia ho "lian forte ida no unifikadu".

"La'ós hanesan iha autoridade individual hodi foti desizaun sira maibé hodi rezolve problema sira hamutuk" ba ema tomak hodi bele benefisia hosi koñesimentu", refere mós hosi dokumentu ne'ebé fó sai iha loron-sesta ne'e iha Jenebra hosi ajénsia ONU nian ba saúde.

Iha nível global, tuir balansu ida hosi AFP, pandemia COVID-19 halo ona ema rihun 200 resin mate no infeta ona ema millaun 2,7 resin iha nasaun ho teritóriu hamutuk 193.

Pasiente rihun 720 resin maka konsidera kura ona.

Iha Portugal, ema na'in 854 mate ona hosi ema infetadu ne'ebé konfirmadu hamutuk 22.797, no iha kazu rekuperadu hamutuk na'in 1.228, tuir Diresaun-Jeral Saúde portugeza nian.

Lusa

 


Comentários

Critério de publicação de comentários