Pájina aktualizada iha 21:07h, kinta-feira 24 Setembru

COVID-19: Parlamentu Nasional aprova prolongamentu ba estadu emerjénsia ba loron 30

27 de Abril de 2020, 20:41

Iha loron-segunda ne'e, Parlamentu Nasional aprova ona prolongamentu ba estadu emerjénsia nian ba loron 30 hanesan resposta hasoru COVID-19, ho votu konkorda 37, votu kontra 23 no abstensaun haat.


"Renova ona estadu emerjénsia ho durasaun loron 30, hahú hosi tuku 00:00 iha loron 28 Abril to'o tuku 23:59 iha loron 27 Maiu 2020", refere iha autorizasaun ne'ebé aprova iha loron-segunda ne'e iha votasaun nominal, ne'ebé fó autorizasaun ba Prezidente Repúblika hodi dekreta extensaun ba medida.

Autorizasaun ne'e aprova ona ho votu favorável sira hosi Frente Revolucionária do Timor-Leste Independente (Fretilin), hosi Partidu Libertasaun Popular (PLP) no hosi Kmanek Haburas Unidade Nacional Timor Oan (KHUNTO).

Partidu Demokrátiku (PD) ne'ebé halo parte iha koligasaun foun iha opiniaun ne'ebé la hanesan, ho líder hosi partidu, Mariano Sabino, vota konkorda no deputadu na'in tolu seluk (na'in ida auzente) vota abstensaun, no deputadu úbiku hosi Partidu Unidade Dezenvolvimentu Demokrátiku (PUDD) vota abstensaun.

Votasaun hatudu fratura ida iha maioria foun hosi aliansa parlamentar, ho KHUNTO, PD ho PUDD hili postura ida ne'ebé la hanesan ho Congresso Nacional da Reconstrução Timorense (CNRT), hosi Xanana Gusmão nian, ne'ebé maka lidera aliansa ne'e.

Ne'e halo deputadu na'in 21 hosi CNRT, deputadu hosi Frente Mudansa ho deputadu hosi União Democrática Timorense (UDT) iha bloku la konkorda.

Rekorda katak CNRT, KHUNTO, PD,PUDD, UDT ho FM ne'ebé halo parte iha aliansa foun hosi maioria parlamentar hatudu agora divizaun iha apresiasaun ba autorizasaun.

Momentu balun antes votu no hodi hatán ba interpelasaun sira hosi deputadu sira, primeiru-ministru, Taur Matan Ruak, defende ona nesesidade hosi estadu emerjénsia nian hodi fó marjen manobra nian ba asaun governativu iha kombate ne'e.

Nia hatete kombate ne'e halo hodi hamenus risku hosi propagasaun ba COVID-19 nian no mós hodi hamenus nia impaktu ekonómiku ho sosiak iha populasaun nia moris.

"Entre moris ho ekonomia imi hili saida. Ami hili uluk moris no ikusmai maka ekonomia. Maibé ami entende katak situasaun la'ós fásil no ami rekoñese katak família barak presiza ajuda", nia afirma.

"Estadu emerjénsia la'ós hanesan solusaun, maibé hanesan solusaun di'ak hodi nune'e ita bele prepara kondisaun sira, hodi prepara sistema hodi hatán ba situasaun. Hanoin iha interese hosi sidadaun tomak", nia hatete.

Taur Matan Ruak subliña ona katak Governu atua hela iha paralelu iha nível sira sanitáriu ho ekonómiku, hodi relembra katak nasaun la'ós hanesan úniku hasoru dezafiu atual sira.

"No bainhira ita laiha vasina, kura, ita tenki serbisu nafatin. Governu iha konsiénsia hosi problema sira, maibé preparadu, ho apoiu hosi parlamentu, hodi serbisu atu hamenus risku hosi espansaun ba COVID-19 no mós hodi tenta hamenus impaktu ekonómiku ho sosial iha sidadaun sira nia moris", nia konsidera.

Debate marka ona ho intervensaun oioin hodi destaka sakrífisiu sira ho dedikasaun hosi ema tomak ne'ebé maka iha liña importante hodi kombate ba moras, hahú hosi profisional sira saúde nian to'o ba membru sira hosi forsa sira seguransa nian no funsionáriu sira seluk.

Domina mós ho referénsia asira ba impaktu ekonómiku hosi pandemia rasik no mós hosi medida sira ne'ebé implementa iha estadu emerjénsia, liuliu iha populasaun sira ne'ebé fraku liu.

Deputadu oioin destaka impaktu iha traballador barak hosi área formal, maibé liuliu hosi área informal, ho bankada balun refere ba nesesidade atu Governu aselera implementasaun hosi medida sosioekonómiku sira hodi hatán ba krizi, maioria seidauk promulga.

Deputadu sira destaka mós komportamentu ezemplar hosi populasaun timoroan nian, iha respeitu ba medida sira estadu emerjénsia nian no iha esforsu hodi mantén distansiamentu sosial no inisiativu sira seluk ba prevensaun.

Autorizasaun ne'ebé aprova iha loron-segunda ne'e hosi parlamentu agora sei haruka ba Prezidente Repúblika ne'ebé sei dekreta formalmente prolongamentu ba períudu ne'e.

Ikusmai, Governu sei desidi atu muda ka mantén medida sira ne'ebé hala'o dezde hahú estadu emerjénsia iha loron 28 Marsu.

Agora daudaun, Timor-Leste iha kazu ativu ba COVID-19 hamutuk 22.

Iha nível global, tuir balansu ida hosi ajénsia notísia AFP, pandemia COVID-19 halo ona ema rihun 204 resin mate no infeta ona ema millaun 2,9 resin iha nasaun ho teritóriu hamutuk 193.

Pasiente besik rihun 800 maka konsidera hanesan kura ona.

Lusa

 


Comentários

Critério de publicação de comentários