Pájina aktualizada iha 00:17h, segunda-feira 26 Maiu

Partidu Demokrátiku fahe malu kona-ba situasaun polítika, haktuir sekretáriu-jeral

20 de Maio de 2020, 00:49

Sekretáriu-jeral PD nian hatete iha loron-tersa ne'e ba Lusa katak partidu "fahe malu" hasoru krizi polítika, maibé prezidente hosi formasaun ne'e afirma katak "hamutuk ho Estadu" no hakarak hakotu impase iha nasaun.


Mariano Sabino, prezidente Partidu Demokrátiku (PD) nian, no deputadu na'in tolu seluk hosi bankada vota ona iha loron-tersa ne'e iha eleisaun hodi hili prezidente foun ba Parlamentu Nasional, no António da Conceição, sekretáriu-jeral, la partisipa iha votasaun.

Antes ne'e, membru sira hotu PD nian sai tiha hosi sala plenáriu nian, la vota iha rekerimentu hosi destituisaun hosi prezidente Arão Noé Amaral, ne'ebé aprezenta hosi forsa foun sira hosi maioria - Fretilin, PLP ho KHUNTO.

Hatán kona-ba pozisaun polítika ne'ebé la hanesan ne'ebé hatudu iha votu sira, António da Conceição konfirma ona katak iha "divizaun" iha partidu, hodi konsidera katak presiza "debate internu ida" no "iha reasaun sira la haksolok iha munisípiu sira" hasoru pozisaun hosi Sabino.

"Sim, ha'u konfirma katak iha divizaun sira iha PD nia laran. Ha'u kontinua ho ha'u nia pozisaun hamutuk ho CNRT. Koligasaun seidauk haketak malu no ha'u la haree razaun ba prezidente partidu hodi vota hamutuk ho partidu tolu seluk hanesan prosesu normal ida", nia afirma.

Hatán kona-ba pozisaun atual hosi PD no iha konkretu kona-ba hamutuk ho CNRT ka ho maioria foun, lidera hosi Fretilin, Mariano Sabino lakohi fó resposta klaru ida, afirma de'it katak partidu "hamutuk ho Estadu" no aposta "hodi hakotu ho impase polítiku".

Sabino hatete katak partidu la vota ona iha destituisaun tanba presiza "mantén prinsípiu legalidade nian, konstitusionalidade ho rejimentu", hodi konsidera katak agora tribunal maka "determina katak iha ka la'e asaun sira iregularidade nian".

Maibé, nia afirma katak pozisaun PD nian "kontinua nafatin atu hakotu ho impase polítiku, konsege normalizasaun ekonómiku no komunikasaun polítika nian no mós esforsu tomak hodi hatán ba konjuntura hosi polítika foun tanba COVID-19.

"PD hamutuk ho Estadu, tenki defende interese povu nian. Tribunal tenki desidi katak krimi ka la'e asaun sira destruisaun ba meza parlamentu nian. Maibé vota konkorda Aniceto Guterres [prezidente eleitu iha loron-tersa ne'e hosi grupu ida deputadu sira nian] hanesan asaun polítika", nia afirma.

Iha kauza maka postura hosi PD ne'ebé, formalmente, halo parte hosi koligasaun ida lidera hosi Congresso Nacional da Reconstrução Timorense (CNRT) hosi Xanana Gusmão no ne'ebé, até pasadu, hanesan maioritáriu.

Ikusmai sai hanesan minoria hafoin saída hosi partidu ida hosi aliansa nian, Kmanek Haburas Unidade Nacional Timor Oan (KHUNTO), ne'ebé halibur hamutuk iha plataforma ne'ebé integra Partidu Libertasaun Popular (PLP), hosi atual primeiru-ministru Taur Matan Ruak, no Frente Revolucionária do Timor-Leste Independente (Fretilin), forsa boot parlamentar.

Insisti katak PD "la desliga ofisialmente hosi koligasaun", António da Conceição atribui mudansa postura hosi Mariano Sabino nian ba "aproximasaun ruma hodi integra mós iha Governu".

"PD konsidera asaun ne'e [destituisaun] ilegal. Maibé, prezidente [Sabino] la konsistente iha nia opsaun no ikusmai vota ona ba eleisaun hosi prezidente parlamentu nian", nia afirma.

"Iha ha'u nia interpretasaun, karik iha aproximasaun ida hosi partidu tolu hodi fó posibilidade pozisaun sira ba membru ruma PD nian iha Governu", nia hatete.

Mariano Sabino lakohi beibeik atu konfirma karik PD hamutuk ho CNRT ka ho maioria foun, hodi insisti katak objetivu hosi koligasaun ne'e maka "hakotu impase polítika" no katak saída hosi KHUNTO hakotu ona maioria no "la bele kumpri objetivu ne'e".

"PD aposta nafatin iha diálogu entre líder nasional sira no entre partidu polítiku sira. PD kontinua aposta ba Estadu, ba defeza hosi interese Estadu nian. No tanba ne'e tenki hakotu ho impase polítika", nia konsidera.

Parlamentu Nasional, iha loron-tersa ne'e, hasoru loron ajitadu ida ho agresaun sira entre deputadu sira, meza monu, hakilar, dudu malu no intervensaun sira hosi ajente polísia sira, iha jornada ida ne'ebé hotu ho eleisaun polémika hosi prezidente parlamentu foun.

Ba loron rua konsekutivu, visi-prezidente sira, Angelina Sarmento ho Luis Roberto, tenta halo sesaun plenária ida la tuir desizaun hosi prezidente parlamentu, Arão Noé Amaral, ne'ebé maioria hosi deputadu sira hakarak hasai.

Deputadu oioin hosi Congresso Nacional da Reconstrução Timorense (CNRT), partidu hosi Arão Noé Amaral, sa'e ba zona hosi meza parlamentu nian hodi tenta trava prosesu ne'ebé hahú hosi maioria, envolve malu iha dudu malu ho agresaun fíziku sira.

Meza hosi prezidente sira dudu monu, rahun no deputadu na'in ida hosi CNRT tuda kadeira Arão Amaral nian ba ar, Polísia Nasional Timor-Leste (PNTL) nian tenki halo intervensaun dalabarak hodi haketak deputadu sira.

Maski ho protestu sira, Angelina Sarmento ikusmai anunsia votasaun sekretu rua, ida uluk hodi hasai Arão Noé Amaral - votu konkorda hamutuk 36, kontra zero no abstensaun zero - no ikusmai ba eleisaun hosi Aniceto Guterres Lopes, hosi Frente Revolucionária do Timor-Leste Independente (Fretilin), hanesan prezidente foun, ho votu konkorda hamutuk 40.

Aniceto Guterres Lopes konsidera ona katak votu hosi maioria hanesan lejítimu ba nia eleisaun, anunsia katak sei konvoka ba loron-kinta konferénsia ida hosi líder sira.

Arão Noé Amaral konsider ona "ilegal, la konstitusional no lahó validade" votasaun ne'ebé hasai ona nia hosi kargu hodi esplika ba Lusa katak sei aprezenta rekursu ida ba Tribunal Rekursu no ho baze ne'e maka sei desidi atu sai ka la'e hosi kargu.

Lusa


Comentários

Critério de publicação de comentários