Pájina aktualizada iha 18:17h, sesta-feira 07 Agostu

Tempu ladi'ak hamosu inundasaun iha munisípiu haat, inklui iha Díli

22 de Maio de 2020, 19:26

Udan boot halo ona inundasaun iha munisípiu oioin, estraga ponte sira ho estrada sira, bee nakonu iha edifísiu públiku sira ho uma partikular sira, haktuir hosi balansu dahuluk hosi Protesaun Sivil ne'ebé maka Lusa iha asesu.


Fonte sira hosi Protesaun Sivil esplika ona ba Lusa katak agora daudaun laiha rejistu ba vítima ruma no situasaun todan liu maka iha munisípiu sira Viqueque, Manatuto, Lautém, Covalima ho Manufahi, ho problema sira mós iha kapital Díli.

Ekipa sira hosi Protesaun Sivil, apoia hosi bombeiru sira ho autoridade lokal sira, rejista ona okorénsia oioin, prepara hela pakote ida apoiu emerjénsia nian, ho hahán no sira seluk, ba populasaun afetadu sira, haktuir hosi fonte sira ne'e.

Iha Viqueque, iha ponta leste, inundasaun sira, agora kontroladu ona, estraga Ponte Dilor, iha Lautém - ne'ebé udan tuun durante oras hitu nia laran, zona afetadu sira maka Lospalos, Hamamoko, Titilari, Bemoris ho Motolori.

Bee dada ema na'in tolu ne'ebé halo viajen ho motor iha zona maibé konsege salva ona sira, ho estraga todan iha ponte Apikuro, ko'a ligasaun entre Lospalos ho Díli.

Iha Natarbora (Manatuto), udan boot durante kuaze oras 16 nia laran halo estraga maka'as iha suku Obeon, Sikoli Biluli, Uma Boku ho Abat Oan.

Iha zona Natarbora ne'e, mota sira Wenaknuru, Waikamuak ho Lamarak nakonu - iha Lamarak estraga ponte.

Iha súl nasaun nian, iha inundasaun iha zona oioin iha Suai ho Beco, ho estraga mós iha postu administrativu Tilomar, liuliu iha Suku sira Casabau ho Maudemo.

Ema na'in rua bee dada iha mota Karau Ulun maibé bombeiru sira Covalima nian konsege salva sira.

Iha Manufahi, ne'ebé rejista udan boot iha semana ikus ne'e, iha inundasaun iha fatin oioin, ho destruisaun iha ponte Selihassa, iha estrada entre Natarbora ho Same.

Iha Same, lori vítima balun hosi inundasaun ba Eskola Betano nian hodi hetan daudaun apoiu.

Udan boot inunda mós fatin oioin iha kapital timoroan, ho destake, entre fatin sira seluk, ba edifísiu RTTL nian no ba fatin ida ne'ebé prepara ba kuarentena COVID-19 nian, iha zona Tasi Tolu, ne'ebé "nakonu tebes ho bee no la operasional", haktuir hosi fonte sira.

Hodi hatán ba problema sira, ministru hosi Obras Públikas, Salvador Soares, fó ona instrusaun ba Diresaun Jeral hosi Obras Públikas (DGOP) no ba Institutu Jestaun Ekipamentu sira nian (IGE) hodi mobiliza meiu sira ba fatin sira ne'ebé afetadu.

Situasaun sira ne'ebé todan liu, tuir nota ida hosi nia gabinete, bele haree liuliu iha munisípiu sira Covalima ho Manufahi, iha kosta-súl, iha Manatuto (norte) no iha zona sira Viqueque nian no Lautém, iha ponta leste.

Estrada ho ponte oioin maka afetadu ho inundasaun, esplika hosi gabinete, ho estraga todan iha ponte Weru-Koco, iha estrada nasional ba Lospalos.

Diresaun Nasional hosi Meteorolojia ho Jeofíziku (DNMG) timoroan alerta ona ba risku hosi tempu ladi'ak iha zona oioin iha nasaun, ho udan ho intensidade ruma iha munisípiu oioin inklui iha illa Ataúro no enklave Oecusse.

Refere risku ba inundasaun sira, afundamentu, bee nakonu iha estrada sira ho ko'a enerjia elétriku, DNMG esplika katak tempu ladi'ak sira akontese pelumenus to'o domingu.

Lusa

 


Comentários

Critério de publicação de comentários