Pájina aktualizada iha 01:23h, domingu 06 Jullu

Tribunal Rekursu husu klarifikasaun antes desidi kona-ba inkonstitusionalidade

22 de Maio de 2020, 20:06

Iha loron-sesta ne'e, prezidente hosi Tribunal Rekursu husu ona klarifikasaun kona-ba momentu ne'ebé hasai Arão Noé Amaral nu'udar prezidente parlamentu nian antes apresia pedidu fiskalizasaun ida hosi artigu ida hosi rejimentu parlamentar.


Iha despaxu ne'ebé asina iha loron-sesta ne'e no ne'ebé maka Lusa iha asesu, Deolindo dos Santos husu ba Parlamentu Nasional timoroan "atu informa oras loloos ne'ebé, iha loron 19 Maiu 2020, bainhira konklui votasaun hosi destituisaun" Arão Noé Amaral nian hosi kargu.

Tribunal presiza hatene informasaun ne'e hodi avalia pedidu ida hosi Arão Noé Amaral ba fiskalizasaun hosi konstitusionalidade hosi artigu sira rejimentu parlamentu nian ne'ebé permiti nia destituisaun.

Tribunal esplika katak pedidu fiskalizasaun hosi konstitusionalidade hosi norma ne'ebé to'o iha Tribunal Rekursu iha loron 19 Maiu iha tuku 16:35", no "lejitimidade hosi rekuerente hodi formula pedidu halo iha nia kualidade nu'udar prezidente Parlamentu nian".

"Hanesan ema hotu hatene, iha loron 19 Maiu 2020 Parlamentu Nasional vota ona destituisaun hosi señór deputadu Arão Noé Amaral hosi kargu prezidente Parlamentu Nasional nian", refere hosi tribunal hodi nota katak destituisaun hamosu efeitu imediatu iha momentu votasaun nian.

"Nune'e, antes de mais, tenki hatene bainhira asaun ne'e hahú iha Tribunal Rekursu, señór deputadu Arão Noé Amaral sei hanesan hela prezidente Parlamentu Nasional nian", esplika.

Votasaun ne'e akontese iha final dadeer loron 19 nune'e implika atu, bainhira entrega pedidu fiskalizasaun ba konstitusionalidade hosi artigu ne'e, Arão Noé Amaral hetan ona destituisaun hosi kargu.

Pedidu ne'e aprezenta iha loron-tersa hafoin loron rua tensaun nian iha parlamentu ne'ebé ikusmai maioria deputadu sira (na'in 36 hosi na'in 65) vota hodi hasai Arão Noé Amaral ho maioria ida boot liu (deputadu na'in 40) hili Aniceto Guterres hodi prezidi parlamentu.

Hafoin votu, Arão Noé Amaral - ne'ebé, ikusmai, entrega ona gabinete ho karreta sira no iha hela prosesu hodi sai hosi uma ne'ebé nia okupa nu'udar prezidente - konsidera ona votasaun rua hanesan "ilegal, la konstitusional ho lahó validade".

Lusa

 


Comentários

Critério de publicação de comentários