Pájina aktualizada iha 20:53h, kinta-feira 24 Setembru

COVID-19: Governu sei husu ba parlamentu reforsu orsamental foun

23 de Maio de 2020, 00:02

Governu sei husu ba Parlamentu Nasional reforsu ida hosi Fundu COVID-19 no ba konta Tezouru hodi selu medida oioin hodi hatán ba pandemia no hodi kompleta falta orsamental sira, hatete hosi ministra interina Finansa nian ba Lusa.


Sara Brites, ne'ebé la refere valor reforsu nian, esplika ona ba Lusa katak despeza sira ne'ebé dezignadu hodi hatán ba COVID-19, inklui medida sosioekonómiku sira, ultrapasa ona valor hosi Fundu ne'ebé kria ho dolar millaun 150.

"Tau hamutuk medida sira ne'e, agora daudaun Fundu iha ona défise ida besik dolar millaun 70 resin", esplika katak, efetivamente, taxa ezekusaun nian hanesan besik dolar millaun hitu resin.

"Tanba ne'e, iha tempu badak, Governu sei hato'o ba parlamentu reforsu ida, hodi kompleta kestaun ne'e ho asegura Tezouru to'o ami iha Orsamentu Jeral Estadu (OJE) nian", nia esplika.

Sara Brites esplika ona katak parte barak hosi défise iha ligasaun ho aumentu maka'as iha númeru hosi família sira ne'ebé maka rejista hodi simu apoiu dolar 100, ho valor indika atu aumenta besik millaun 65.

"Rejistu sei halo hela no informasaun sira aumenta bainhira kompara ho kálkulu antes, família besik rihun 200 no tanba ne'e maka presiza reforsa medida", nia esplika.

La'ós de'it tanba kestaun finanseiru sira, implementasaun hosi medida sira hamosu hela susar tanba kompleksidade, burokrasia ho problema tékniku sira seluk.

Sara Brites admiti konfuzaun ruma no subliña katak parte hosi problema akontese tanba Governu aprova no anunsia aumentu hosi númeru hosi medida sira "lahó asegura orsamentu nesesáriu" hodi selu, liuliu iha kuadru ida duodésimu nian.

"Ami labele aprova buat sira bainhira la asegura orsamentu. Aprova buat hotu dala ida de'it no agora ami tenki desidi saida maka tenki halo dahuluk no saida maka tenki halo ikus", nia afirma.

"Ami iha ona osan kativadu ba programa oioin maibé taxa ezekusaun nian seidauk tuun", nia hatete.

Hodi hatán ba COVID-19, iha interasaun Konsellu Ministru, Ministériu oioin no estrutura seluk Estadu nian, komisaun interministerial ne'ebé kria ba COVID-19 (no lidera hosi primeiru-ministru) ho Sentru Integradu ba Jestaun Krizi nian (CIGC).

Kona-ba Fundu COVID-19 rasik, iha Konsellu Jestaun ida no Sekretariadu Tékniku ida, ho fonte sira besik ba prosesu hatete kona-ba debate jurídiku sira, "konfuzaun kona-ba kompeténsia sira" no ladún iha ajilizasaun iha desizaun sira.

Nune'e, Governu seidauk fó sai loron hodi hahú pagamentu sira.

Hosi parte ida iha pakote hosi medida ekonómiku sira Governu nian ne'ebé hahú diskuti iha Marsu, maibé, liutiha fulan rua seidauk implementa, ho nasaun besik hakotu - iha loron 26 Maiu - fulan rua estadu emerjénsia nian.

Apoiu ba saláriu sira iha área privadu, subsídiu dolar 100 ba família timoroan sira no suplementu remuneratóriu ida ba traballador sira ne'ebé iha liña importante ba combate COVID-19 nian hanesan medida importante sira.

Iha mós apoiu ida ba estudante sira ne'ebé iha estranjeiru no la konsege fila, subsídiu sira ba eletrisidade no ba internet ba alunu sira, apoiu iha transporte sira ba Ataúro ho Oecusse no medida sira seluk hosi ministériu oioin.

Hotel sira uza ba kuarentena no empreza sira ne'ebé fornese hahán ba sé maka iha fatin sira ne'ebé Governu kria seidauk simu mós pagamentu ruma hosi Estadu.

Kritériu ba inkluzaun hosi medida sira ne'e seidauk fó sai klaru hosi Governu no medida sira ne'e aprova ona no hetan ona dekretu públiku sira, hanesan ezemplu, seidauk determina no seluk tan ne'ebé aprezenta depois iha ona.

La inklui hosi valor total ba gastu sira ne'ebé maka determina ona iha, hanesan ezemplu, dolar millaun 18 resin ne'ebé kalkula ba programa hosi subsídiu sira 60% hosi saláriu sira durante fulan tolu, iha medida ida ne'ebé hakarak apoia empreza sira ho mantén empregu durante COVID-19.

Institutu Nasional Seguransa Sosial (INSS), ne'ebé implementa medida, hakarak garantia hosi konzignasaun ho finansiamentu hosi Fundu COVID-19 - maski pagamentu ne'e halo ikus -, antes avansa ho pagamentu sira.

Sara Brites konsidera katak INSS tuir loloos "avansa lalais" tanba iha fundu disponível ne'ebé ikusmai sei rembolsadu, maski formalmente Komisaun hosi Jestaun Fundu nian la komunika ofisialmente alokasaun ne'e.

"INSS hakarak atu valor ne'e hetan blokeiu ka kativadu iha fundu maibé agora fundu ne'e iha hela défise. Maibé sira bele avansa", nia konsidera.

Fonte sira hosi INSS garanti ona ba Lusa katak instituisaun prontu atu selu maibé la avansa lahó konfirmasaun finansiamentu nian maski ne'e to'o tarde.

Lusa

 


Comentários

Critério de publicação de comentários