Pájina aktualizada iha 02:48h, kinta-feira 03 Jullu

Parlamentu hahú fali plenáriu maibé lahó bankada CNRT

26 de Maio de 2020, 01:02

Iha loron-segunda ne'e, Parlamentu Nasional hahú fali nia plenáriu sira maibé ho auzénsia hosi bankada hosi partidu daruak, CNRT, ne'ebé protesta nafatin legalidade hosi eleisaun prezidente Aniceto Guterres Lopes nian.


Sesaun iha loron-segunda, marka prezensa hosi maioria deputadu sira - na'in 40 resin hosi deputadu na'in 65 - marka ho intervensaun oioin hosi deputadu sira kona-ba situasaun polítika no impaktu hosi inundasaun sira ne'ebé iha semana liubá afeta família 2.500 iha munisípiu oioin.

Iha análize inklui mós situasaun hosi pandemia COVID-19, liuliu kestaun aumenta estadu emerjénsia, ho deputadu sira refere risku hosi posível kontájiu hosi metade illa indonéziu nian.

Maski nune'e, tuir komunikadu hosi Parlamentu Nasional, deputadu sira defende katak iha kazu hosi prolongamentu "presiza fó fleksibilidade boot moris nian ba komunidade sira" hodi taka nafatin fronteira sira.

"Sira kestiona mós kona-ba apoiu sira ka subsídiu sira ne'ebé Governu promete ona hodi ajuda populasaun no mós estudante sira iha estranjeiru no ne'ebé, to'o ohin loron, seidauk atribui", refere.

Plenáriu loron-segunda hanesan plenáriu dahuluk iha fulan tolu nia laran no akontese hafoin tensaun ne'ebé maka akontese iha semana liubá, ho destituisaun hosi anterior Prezidente Arão Noé Amaral ho eleisaun hosi Aniceto Guterres Lopes.

Prosesu ne'e hetan nafatin krítika hosi bankada CNRT nian ne'ebé rekore ona ba Tribunal Rekursu no esplika ona katak sei la partisipa iha asaun parlamentar sira - plenáriu ho komisaun sira - to'o iha opiniaun ida hosi tribunal.

Kestaun ne'e debate ona iha plenáriu iha loron-segunda, ho deputadu sira "agredese ba populasaun tomak no ba joven sira ne'ebé kontribui ona ho nia maturidade polítika hodi mantén situasaun kalma maski iha asaun polítika iha Parlamentu Nasional".

Durante sesaun iha loron-segunda ne'e, Aniceto Guterres Lopes anunsia baixa hosi proposta lei protesaun sivil ba komisaun A, hosi Asuntu Konstitusional sira ho Justisa, no ba komisaun B ne'ebé trata asuntu sira hosi Negósiu Estranjeiru, Defeza ho Seguransa.

Komisaun rua agora sei analiza diploma, aprezenta hosi Governu, tenki aprezenta iha loron 15 nia laran relatóriu sira ho opiniaun sira ba diskusaun ho aprovasaun iha plenáriu.

Ba plenáriu loron-tersa nian ajenda ona debate ho votasaun hosi destituisaun ho eleisaun hosi kargu sekretáriu ho visi-sekretáriu hosi Meza Parlamentu nian.

Lusa

 


Comentários

Critério de publicação de comentários