Pájina aktualizada iha 04:54h, kinta-feira 03 Jullu

COVID-19: Prezidente Repúblika husu renovasaun ba estadu emerjénsia ho restrisaun oituan

26 de Maio de 2020, 19:29

Iha loron-tersa ne'e, Prezidente Repúblika husu ona ba Parlamentu Nasional timoroan autorizasaun hodi prolonga estadu emerjénsia tanba COVID-19 durante loron 30 tan maibé ho restrisaun oituan, anunisa prezidénsia.


Francisco Guterres Lu-Olo husu atu estadu esepsaun sei deklara durante loron 30 tan to'o loron 27 Juñu oinmai.

Fonte parlamentar sira esplika ona ba Lusa katak pedidu ne'ebé Francisco Guterres Lu-Olo haruka ona iha loron-segunda ne'e ba Parlamentu Nasional asenta, liuliu, iha redusaun hosi direitu rua, ba sirkulasaun internasional ho interna.

Limitasaun hosi direitu sira ne'e permiti ba Governu hodi mantén taka fronteira sira no obriga aplikasaun hosi kuarentena ka izolamentu obrigatóriu.

"Ha'u iha konviksaun katak impozisaun hosi medida oioin hanesan importante hodi prevene entrada hosi vírus SARS-CoV-2 iha teritóriu no nia transmisaun entre populasaun", refere hosi Francisco Guterres Lu-Olo iha testu ne'ebé haruka ba parlamentu.

Lu-Olo konsidera hanesan importante kontrolu hosi entrada sira iha teritóriu nasional, impozisaun hosi izolamentu obrigatóriu "iha kazu determinadu" no sujeisaun hosi rezidente sira ba medida hosi kontrolu sanitáriu nian.

Ba xefe Estadu, aumentu iha relasaun ho "evolusaun hosi preokupasaun ho situasaun epidemiolójiku no profilerasaun hosi kazu sira ne'ebé rejista hosi transmisaun komunitáriu hosi COVID-19 iha Indonézia, liuliu iha Timor Osidental".

Nia konsidera katak hanesan situasaun ida ne'ebé eziji "manutensaun hosi aplikasaun ba medida estraordináriu sira hodi trava pandemia ho evita transmisaun ba kazu foun sira infesaun nian iha teritóriu nasional".

Pedidu hosi xefe Estadu, ne'ebé sei debate iha loron-tersa ne'e iha konferénsia hosi líder sira iha Parlamentu Nasional - no ne'ebé bele vota iha plenáriu iha loron-kuarta - mosu hafoin Konsellu Estadu (CE) ho Konsellu Superior Defeza ho Seguransa (CDSD) fó ona nia opiniaun ba aumentu hosi estadu esepsaun nian.

Bainhira Parlamentu Nasional vota konkorda prolongamentu, xefe Estadu sei emiti dekretu prezidensial ida hodi konfirma prolongamentu, Governu maka ikusmai sei aprova pakote hosi medida sira ne'ebé detalladu ne'ebé sei kontinua implementa.

Iha loron-segunda, ministru Reforma Lejislativu ho Asuntu Parlamentar, Fidelis Magalhães, indika ona katak maski aumenta estadu emerjénsia, Governu sei hamenus medida oioin ne'ebé hala'o durante fulan rua dahuluk.

Iha komunikadu, Governu esplika katak "nesesidade hodi aumenta estadu emerjénsia halo tanba evolusaun preokupante hosi situasaun epidemiolójiku no proliferasaun hosi kazu sira ne'ebé rejista hosi kontájiu COVID-19 nian iha nasaun viziñu, Indonézia, liuliu iha Timor Osidental".

Agora daudaun, Timor-Leste laiha rejistu ruma ba kazu ativu COVID-19 nian, hafoin kontabiliza ona pasiente hamutuk na'in 24, sira hotu rekupera ona. Ema na'in 100 resin iha hela kuarentena.

Iha nível global, tuir balansu ida hosi ajénsia notísia AFP, pandemia COVID-19 halo ona ema rihun 344 resin mate no infeta ona ema millaun 5,4 resin iha nasaun ho teritóriu hamutuk 196.

Lusa

 


Comentários

Critério de publicação de comentários