Pájina aktualizada iha 04:00h, kinta-feira 03 Jullu

COVID-19: Parlamentu debate aumenta estadu emerjénsia nian iha loron-kuarta

26 de Maio de 2020, 20:27

Parlamentu Nasional debate iha loron-kuarta dadeer pedidu autorizasaun hosi Prezidente Repúblika hodi prolonga ba dala rua estadu emerjénsia iha nasaun tanba COVID-19.


Sesaun, marka ba tuku 10:00 (oras lokal) sei laiha prezensa hosi parte boot ida hosi deputadu sira, ho Congresso Nacional da Reconstrução Timorense (CNRT) desidi haruka de'it reprezentante na'in ida.

Duarte Nunes, xefe bankada CNRT nian, hatete ona ba Lusa katak partidu konsidera nafatin ilegal eleisaun hosi prezidente parlamentu nian, Aniceto Guterres Lopes, maibé hakarak hato'o nia pozisaun polítika ba Governu kona-ba asuntu ne'e.

"Ami sei halo deklarasaun polítika ida hosi partidu tanba iha nesesidade hodi transmiti ami nia opiniaun ho pozisaun ba Governu kona-ba kestaun ne'e", nia esplika.

Ajendamentu hosi pedidu xefe Estadu nian, Francisco Guterres Lu-olo, desidi iha reuniaun ida hosi Konferénsia Líder sira bankada nian iha Parlamentu Nasional ne'ebé maka CNRT la partisipa.

Iha testu ne'ebé maka haruka iha loron-tersa ne'e ba Parlamentu Nasional, ne'ebé maka Lusa iha asesu, Francisco Guterres Lu-Olo husu autorizasaun hodi prolonga estadu emerjénsia to'o loron 27 Juñu oinmai.

"Ho baze hosi evolusaun situasaun nian iha mundu no liuliu iha ita nia nasaun viziñu sira, Prezidente Repúblika konsidera hanesan indispensável renovasaun hosi deklarasaun hosi estadu emerjénsia", hakerek iha testu ne'ebé maka Lusa iha asesu.

"Ha'u hakarak deklara renovasaun hosi estadu emerjénsia iha teritóriu nasional tomak, tuir verifikasaun hosi situasaun ida kalamidade públika nian, ba períudu ida loron 30, hahú hosi tuku 00:00 loron 28 Maiu 2020 - no hotu iha tuku 23:59 iha loron 26 Juñu 2020, iha teritóriu nasional tomak", nia esplika.

"Sakrifísiu sira hotu ita tomak ne'ebé maka bolu Timor-Leste hanesan ita nia Pátria ka ita nia uma sei hamosu rezultadu", nia refere mós.

Maibé nia hatete, no maski Timor-Leste iha ona susesu, ba agora, iha kontrolu hosi moras - nasaun agora daudaun laiha kazu ativu -, "seidauk to'o momentu hodi selebra vitória".

"Ita labele husik atu sakrifísiu sira ne'ebé halo hosi ita hotu to'o iha ne'e sai estraga tanba ita nia retirada antesipadu ho presipitadu hosi kampu batalla nian. Ita seidauk manán batalla ne'e", nia hakerek.

Felisita "sentidu responsabilidade maka'as ho respeitu ne'ebé maka povu Timoroan hatudu to'o agora", Lu-Olo agradese ona apoiu hosi sidadaun tomak, entidade públika sira ho organizasaun nasional sira ho internasional sira, destaka liuliu servisu hosi ekipa sira hosi "asuwa'in anónimu sira" hosi liña importante nian.

Esforsu ida ne'ebé permiti ona "identifika kazu tomak infesaun nian ne'ebé mai hosi estranjeiru, asegura izolamentu terapéutiku hosi ema afetadu sira, evita alastramentu hosi infesaun hosi membru sira komunidade nian no halakon prezensa hosi vírus ne'e iha teritóriu nasional" no importante maka mantén nafatin.

"Governu, hosi imperativu protesaun saúde públika nian, hatudu mai ha'u nesesidade hodi antén mekanizmu adekuadu sira vijilánsia epidemiolójiku nian hodi bele prevene no hamenus oportunidade sira importasaun hosi vírus ne'e ba ita nia teritóriu nasional", nia sustenta no defende vijilánsia liuliu iha ligasaun terestre ho metade illa indonéziu nian.

Iha konkretu, pedidu refere ba limitasaun sira ba direitu sira sirkulasaun internasional nian, permiti kontrolu sanitáriu sira ho taka fronteira sira ho liberdade hosi sirkulasaun no fiksasaun hosi rezidénsia iha pontu ruma hosi teritóriu nasional - hodi permiti izolamentu kompulsivu ho serku sanitáriu sira.

Limita mós direitu rezisténsia nian, la permiti "asaun rezisténsia ruma ativu ka pasivu ba orden sira ne'ebé hasai hosi autoridade públika kompetente sira hodi hala'o estadu emerjénsia".

Agora daudaun, Timor-Leste laiha rejistu ruma ba kazu ativu COVID-19 nian, hafoin kontabiliza ona pasiente hamutuk na'in 24, sira hotu rekupera ona. Ema na'in 100 resin iha hela kuarentena.

Iha nível global, tuir balansu ida hosi ajénsia notísia AFP, pandemia COVID-19 halo ona ema rihun 344 resin mate no infeta ona ema millaun 5,4 resin iha nasaun ho teritóriu hamutuk 196.

Lusa

 


Comentários

Critério de publicação de comentários