Pájina aktualizada iha 05:56h, kinta-feira 03 Jullu

Ministru Edukasaun foun hakarak reforsa koperasaun ho Portugal

26 de Junho de 2020, 00:55

Ministru Edukasaun foun, Armindo Maia, hakarak reforsa koperasaun iha área ne'e ho Portugal, liuliu iha fortalesimentu hosi lian portugeza no iha eskola sira nasaun nian ne'ebé agora daudaun iha profesor portugés sira ne'ebé koñese hanesan CAFE.


"Hanesan klaru katak ami tenki reforsa koperasaun ho Portugal, liuliu kona-ba lian portugeza, maibé mós iha eskola sira CAFE nian", hatete ba Lusa hosi Armindo Maia, hodi refere ba Sentru Aprendizajen ho Formasaun Eskolar (CAFE), projetu luzu-timoroan ida ne'ebé inklui dosente portugés na'in 140.

"Ami hakarak reforsa projetu CAFE no, bainhira bele, até aumenta", nia konsidera.

Área edukasaun, no liuliu hosi lian portugeza, domina koperasaun bilateral portugeza nian iha nasaun dezde restaurasaun independénsia Timor-Leste nian iha tinan 2002.

Projetu oioin hala'o hela, entre sira maka destaka ba projetu CAFE, inisiativa ida hosi rekualifikasaun hosi ensinu timoroan nian iha lian portugeza, kofinansiadu hosi Portugal ho Timor-Leste, ho divizaun hosi despeza inerente sira ba kolokasaun hosi dosente portugés na'in 140 ne'ebé envolvidu agora daudaun.

Antes koñese ho naran Eskola Referénsia sira, CAFE loke neineik iha munisípiu 12 no iha Rejiaun Administrativu Espesial Oecusse-Ambeno (RAEOA), no antes administra hosi protokolu ida ne'ebé asina hosi Governu rua iha tinan 2011.

Hahú tinan 2015, akordu foun hamosu mudansa sira seluk, inklui transformasaun hosi Eskola Referénsia sira ba atual CAFE sira ne'ebé konta, tinan ne'e, ho alunu na'in 8.800 resin.

Opsaun hodi aumenta CAFE eventualmente iha nível submunisipal sai hanesan ideia ida ne'ebé ko'alia pontualmente no defende hosi líder oioin nasaun nian, entre sira maka eis-Prezidente José Ramos-Horta.

Armindo Maia, ne'ebé simu pose iha loron-kuarta nu'udar ministru Edukasaun, Juventude ho Desportu hosi Governu Konstitusional daualuk, fila fali ba pasta hanesan ne'ebé nia okupa iha Governu dahuluk, entre tinan 2002 ho 2006.

Rekorda katak orsamentu dahuluk sira dedika ona ba área edukasaun besik 15% hosi gastu públiku, valor ne'ebé tuun beibeik hahú hosi ne'ebá - Orsamentu Jeral Estadu (OJE) tinan 2010 nian kalkula de'it ba 9%.

"Parte edukasaun nian maka besik 15% no bainhira kompara hanesan nível sira ne'ebé aas tebes duké agora. Ami tenki haree ba ne'e", nia nota.

"La'ós de'it kestaun aumenta osan maibé oinsá investe. Maski iha nível sira persentajen hosi gastu públiku kontinua ki'ik nafatin bainhira kompara ho nasaun sira seluk iha ne'e, iha Ázia".

Informasaun hosi estudu foun sira hatudu katak nasaun tomak hosi rejiaun gasta liu nia orsamentu iha área edukativu duké Timor-Leste, ho nível sira hakbesik ba 15%.

Iha nasaun sira hanesan Malázia ho Vietname, valor ne'e hakbesik ba 20% hosi nia orsamentu, persentajen ne'ebé to'o 30% iha Tailándia no to'o 35% iha Illa Salomaun, hanesan ezemplu.

Maibé, iha prazu badak, Armindo Maia esplika katak prioridade maka "loke fali eskola sira" iha senáriu hosi pandemia COVID-19, hadi'a kondisaun sira hodi nune'e alunu sira bele fila fali ba nível tomak hosi área edukativu.

"No hafoin ultrapasa situasaun ne'e, ami tenki haree mínimu ne'ebé maka eskola sira presiza, hahú hosi infraestrutura báziku sira to'o kestaun kuríkulu nian", nia subliña.

Lusa

 


Comentários

Critério de publicação de comentários