Pájina aktualizada iha 07:00h, kinta-feira 03 Jullu

COVID-19: Kontrolu fronteira sira kontinua iha Timor-Leste hafoin hakotu estadu emerjénsia

26 de Junho de 2020, 19:14

Iha loron-sesta ne'e, Timor-Leste hakotu estadu emerjénsia ne'ebé aplika tanba pandemia COVID-19 maibé medida sira iha nasaun, liuliu iha fronteira sira no iha kuarentena, sei kontinua, haktuir hosi responsável ida hosi sentru jestaun krizi nian.


"Agora daudaun, fronteira sira sei taka nafatin pelumenus to'o iha desizaun foun sira hosi Konsellu Ministru. Iha kazu hosi fronteira rai nian, ami sei loke de'it durante oras rua, semana ida dala ida", esplika ba Lusa hosi Aurélio Guterres, kordenador hosi destakamentu reasaun lalais nian hosi Sentru Integradu ba Jestaun Krizi nian (CIGC).

"Iha kazu hosi semo sira, no pelumenus durante Jullu, ami sei iha de'it semo ho AirNorth, entre Darwin ho Díli, semana ida dala tolu, selu hosi Governu", nia esplika.

Guterres subliña ona katak, lahó kazu ativu sira iha nasaun, objetivu Governu nian sei kontinua nafatin iha fronteira sira, liuliu iha fronteira rai nian ho viziñu Indonézia ne'ebé númeru hosi kazu sira aumenta nafatin no iha transmisaun komunitáriu.

Nia hatete katak tanba ne'e Governu tenki mantén kuarentena obrigatóriu, ka autokuarentena ka izolamentu obrigatóriu iha uma, mantén mós prosesu teste sira nian, ba sé maka tama iha nasaun, iha vijilánsia sentinela, ba ema sira ne'ebé aprezenta iha postu sira saúde nian ho sintoma sira moras respiratóriu nian.

"Vijilánsia ne'e sei kontinua nafatin", garanti hosi responsábel ida hosi CIGC, estrutura ida ne'ebé Governu kria hodi hasoru ho pandemia no ne'ebé sei lakon bainhira estadu emerjénsia hotu.

Pedro Klamar Fuik, elementu seluk hosi Sentru Integradu hosi Jestaun Krizi nian (CIGC), refere mós objetivu iha fronteira rai nian, esplika ona ba Lusa katak tenki hetan ekilibriu ida entre nesesidade sira vijilánsia nian no prevensaun ho situasaun hosi ema timoroan barak ne0ebé halo moris transfronteirisa nian ka ne'ebé maka hakarak fila.

"Fronteira rasik, liuliu rai nian, hanesan importante ba Timor, liuliu ba ema sira ne'ebé maka hela iha parte seluk no ne'ebé maka iha atividade sira iha ne'e no visi-versa. Iha mós kanal hosi komérsiu transfronteirisa ne'ebé hanesan importante tebes", nia afirma ba Lusa.

"No ami tenki konsidera mós ema timoroan sira ne'ebé moris ona períudu emerjénsia nian no ne'ebé labele desloka. No, klaru, sira hotu hakarak fila ba uma", nia afirma.

Pedro Klamar Fuik hatete katak kestaun ida ne'ebé hamosu preokupasaun sira liuliu tanba iha zona sira Indonézia nian iha kontájiu komunitáriu.

"Iha zona sira ne'ebé iha propagasaun maka'as, ka transmisaun komunitáriu, no ema sira bele mai no lori kazu infetadu balun, no ne'e preokupa ami. Maibé ami labele taka nafatin nasaun", nia hatete.

Resposta kona-ba asaun lalais hosi autoridade sira, ho taka fronteira sira ho kuarentena obrigária ba sé maka to'o, resposta prontu hosi populasaun timoroan - ema rihun sanulu resin sai ona hosi Díli - no sorte balun permiti ona ba Timor-Leste, pelumenus agora, evita estraga sira iha kampu saúde nian.

Nasaun rejista ona nia kazu dahuluk hosi COVID-19 iha loron 21 Marsu - sidadaun estranjeiru ida ne'ebé halo viajen ba estranjeiru -, liutiha semana hahú períudu dahuluk ho loron 30 nia laran ba estadu emerjénsia nian.

Kazu daruak mosu iha loron 10 Abril, sidadaun timoroan ida ne'ebé taka hosi fronteira rai nian ho Indonézia, liutiha loron rua, no iha loron 26 Abril iha ona kazu 18.

Númeru máximu hosi pasiente infetadu sira, na'in 24, akontese iha 24 Abril, no pasiente sira ne'e rekupera hotu ona no nasaun laiha kazu ativu iha 15 Maiu bainhira akontese fulan daruak estadu emerjénsia nian.

Maski laiha kazu ativu, Governu hili prolonga estadu emerjénsia ba tan loron 30, períudu ne'ebé hotu iha tuku 23:59 loron-sesta ne'e, oras lokal.

Ho final hosi estadu emerjénsia, Klamar Fuik esplika katak funsaun sira ho responsabilidade hosi Sala Situasaun CIGC nian agora pasa ba Ministériu Saúde, maski estrutura "desmanteladu ho durante alerta, hodi bele bolu fali bainhira iha kazu foun sira".

Pedro Klamar Fuik subliña katak suses iha nível sira kontrolu moras nian iha Timor-Leste, pelumenus ba agora, akontese tanba "koperasaun entre Estadu, parseiru internasional sira ho populasaun".

"Iha konjugasaun ida hosi vontade sira, hosi públiku tomak iha nível jeral, nasional ho internasional, iha kombate hosi pandemia global ne'e no ne'ebé nia efeitu sira sente mós iha ne'e, iha Timor-Leste", nia nota.

Aurélio Guterres subliña mós "esforsu konjuntu" ne'e maibé aponta ona katak hafoin estadu emerjénsia "iha dezafiu seluk", hodi kontinua evita kazu foun sira.

Relatóriu hosi CIGC tenki aprezenta ba Parlamentu Nasional iha semana oinmai.

Lusa

 


Comentários

Critério de publicação de comentários