Pájina aktualizada iha 14:26h, domingu 09 Agostu

COVID-19: OMS rekomenda atu Timor-Leste kontinua alerta ho vijilante

26 de Junho de 2020, 20:32

Responsável hosi Organizasaun Mundial Saúde (OMS) nian rekomenda iha loron-sesta ne'e atu Timor-Leste mantén "alerta ho vijilante" no avansa nafatin iha preparativu sira hosi sistema saúde nian hodi bele hatán ba eventual hosi kazu foun sira COVID-19 nian.


Rajesh Pandav hatete ona ba Lusa katak, to'o agora, kombinasaun hosi medida sira saúde públika nian, medida sosial sira no "kontrolu matenek ida" hosi fronteira sira, permiti ona ba nasaun hodi agora daudaun laiha kazu ativu sira, ho númeru ki'ik ida hosi pasiente infetadu sira.

"Maibé Timor-Leste fahe fronteira rai nian ho Indonézia. Kazu sira iha Indonézia ho parte sira seluk iha mundu, liuliu iha Ázia, aumenta nafatin. Hanesan provável atu ita bele haree efeitu ne'e iha ne'e iha futuru próximu", nia konsidera.

"Tanba ne'e maka ami presiza permanese alerta, vijilante ho fortalese nafatin preparasaun ho resposta ba importasaun futuru hosi kazu sira", nia subliña.

Pandav ko'alia ba Lusa iha loron ne'ebé Timor-Leste hakotu nia períudu datoluk ba loron 30 iha estadu emerjénsia tanba pandemia, kuaze fulan rua lahó kazu foun sira no agora daudaun laiha kazu ativu sira ho rekuperasaun hosi pasiente infetadu na'in 24.

Resposta ne'ebé lalais hosi autoridade sira, ho taka fronteira sira ho kuarentena obrigária ba sé maka to'o, resposta prontu hosi populasaun timoroan - ema rihun sanulu resin sai ona hosi Díli - no sorte balun permiti ona ba Timor-Leste, pelumenus agora, evita estraga sira iha kampu saúde nian.

Maski antes hetan kazu dahuluk, autoridade sira, apoia hosi OMS ho parseiru dezenvolvimentu sira seluk - inklui Xina, Austrália, Uniaun Europeia, Japaun ho Nova Zelándia - hala'o ona medida oioin hodi buka hatán ba kazu eventual sira.

Pandav destaka ona, entre kestaun sira seluk, entrada kontroladu no depois limitadu totalmente hosi ema sira iha Timor-Leste, ho sira hotu "tenki tama iha kuarentena durante loron 14 iha instalasaun identifikadu sira hosi Governu ho hotel reutilizadu sira".

Prepara mós sentru izolamentu ida no fó formasaun ba ekipa téknika sira ho emerjénsia nian, ho reforsu maka'as ida hosi kapasidade hosi Laboratóriu Nasional Timor-Leste nian ne'ebé iha kapasidade hodi halo teste iha nível nasional.

"Profisional sira saúde nian, ekipa suporte nian ho ekipa emerjénsia nian hetan treinu lalais iha jestaun hosi kazu sira ho kontrolu infesaun sira", nia rekorda.

Maski nasaun simu apoiu ho ekipamentu médiku balun ho material protesaun pesoal nian, sistema saúde nasional hasoru nafatin dezafiu oioin, iha nível infraestrutura sira nian no mós iha nível tékniku ho humanu.

Problema todan sira hosi sistema rasik ne'ebé iha aumentu iha situasaun ida pandemia nian.

"Dezafiu boot ida hosi nasaun maka garanti katak iha kapasidade iha nasaun hodi hasoru ho kazu todan sira no abertura hosi fronteira sira. Importante atu jere mós potensial influksu boot hosi ema sira, garanti kuarentena no atu estrutura sira izolamentu nian prontu", nia subliña.

Iha aprezentasaun iha semana 'online' ne'ebé organiza hosi OMS ho nasaun oioin, portavós ida hosi Sentru Integradu hosi Jestaun krizi (CIGC) nian, Odete da Silva Viegas, halo ona pontu situasaun hodi hatán ba pandemia iha nasaun.

Pontu sentral ida hosi resposta atual maka vijilánsia sentinela, prosesu rastreiu ida iha sentru saúde tomak iha nasaun ne'ebé halo teste sira ne'ebé aprezenta sintoma sira moras respiratóriu nian, ne'ebé bele 'subar' eventual kazu sira hosi COVID-19.

Nasaun laiha, to'o agora, kazu transmisaun komunitáriu, ho kazu konfirmadu sira hanesan importadu ka rezulta hosi kontatu diretu, iha fatin sira kuarentena ho ema infetadu sira.

Hosi kazu pozitivu 24, na'in ida hanesan profisional saúde nian.

Pandemia COVID-19 halo ona ema rihun 484 resin mate no infeta ona ema millaun 9,5 resin iha nasaun ho teritóriu hamutuk 196, haktuir hosi balansu ne'ebé halo hosi ajénsia notísia France-Presse (AFP).

Moras ne'e transmiti hosi koronavírus foun ida ne'ebé hetan iha final Dezembru, iha Wuhan, sidade ida iha sentru Xina nian.

Hafoin Europa troka Xina hanesan sentru pandemia nian iha Fevereiru, kontinente amerikanu agora hanesan fatin ne'ebé iha liu kazu konfirmadu no vítima mortal sira.

Lusa

 


Comentários

Critério de publicação de comentários