Pájina aktualizada iha 06:58h, kinta-feira 03 Jullu

Regulamentu disiplinar polísia nian defende "konviksaun" la'os forsa

26 de Junho de 2020, 23:29

Ajente sira hosi Polísia Nasional Timor-Leste nian tenki autodisiplinadu, defende direitu sira sidadaun nian, hili konviksaun no la'os forsa no la partisipa iha grupu sira arte marsial ilegal nian, haktuir hosi kódigu disiplinar foun ne'ebé Governu aprova.


Diploma, aprova iha Konsellu Ministru no ne'ebé maka Lusa iha asesu, nota natureza apartidáriu hosi Polísia Nasional Timor-Leste (ONTL) nian, defini katak prevensaun kriminal "tenki halo ho respeitu ba ema sira nia direitu" no atu atuasaun tenki respeita "legalidade demokrátiku, garanti hosi sidadaun sira nia direitu ho seguransa hosi ema sira nian ho sasán sira".

"Hosi valor sira, prinsípiu sira ho regra sira hosi Lei Fundamental no lei ordináriu sira seluk (…) hamosu mensajen sensível ida ho dimensaun étiko-profisional aas ne'ebé determina interiorizasaun, klarifikasaun ho tutela koativu, hodi nune'e Polísia nia servisu konsideradu ho ezersidu hanesan serbisu públiku fundamental ida ba defeza hosi direitu sira, liberdade sira ho garantia sira hosi sidadaun tomak", konsidera.

Nune'e, testu eziji atu polísia "iha sentidu autodisiplina aas ida, ne'ebé labele konfundi ho agresividade ka exesu hodi uza forsa nian, maibé identifika antes ho respeitu rigorozu ba valor sira, prinsípiu sira ho norma sira étiko-jurídiku nian".

Mudansa ba diploma akontese hafoin tinan 16 hosi aprovasaun regulamentu inisial nian, hahú hosi ne'ebá "akontese mudansa oioin, liuliu legal sira, organizasional sira ho estatutáriu sira" ne'ebé sai "espesialmente justifikadu" ba mudansa, diploma refere.

Mudansa oioin ne'ebé hanesan importante, nota espozisaun hosi motivu sira diploma nian, ne'ebé justifika "substituisaun integral ida hosi regulamentu atual".

Objetivu maka estabelese ba PNTL "regra estruturadu oioin ne'ebé garanti disiplina institusional ho profisional, iha diresaun ba objetivu legal loloos sira hosi Polísia modernu ida, kria hodi defende sidadaun sira no ba disiplina hosi relasaun fundamental sira moris nian iha sosiedade".

Diploma lista, aleinde dever jeral sira hosi elementu sira PNTL nian, dever disiplinar espesífiku hamutuk 12, liuliu obediénsia, lealdade, profisionalizmu, imparsialidade, koresaun, disponibilidade, sijilu ho aprumu.

Entre lista naruk hosi dever sira, diploma obriga, hanesan ezemplu, atu ajente sira komunika prontamente ho sira nia superior hierarkiku sira faktu tomak "ne'ebé bele hamosu risku ba seguransa ho orden públika, seguransa hosi ema sira nian no sira nia sasán, funsionamentu normal hosi instituisaun demokrátiku sira ho interese ruma ne'ebé protejidu penalmente".

Tenki komunika mós asaun sira ne'ebé "membru sira seluk PNTL nian halo kontra dispozisaun sira ne'ebé haktuir iha lei, liuliu sira ne'ebé maka iha violasaun hosi dever disiplinar sira" ne'ebé haktuir iha regulamentu.

Entre aspetu sira, regulamentu determina atu membru sira PNTL nian labele "integra, partisipa ka kolabora ho asosiasaun kriminozu sira ka grupu organizadu sira ne'ebé dedika ba prátika ilegal hosi arte marsial sira no ritual sira".

Iha nível profisionalizmu nian, diploma determina, hanesan ezemplu, atu tenki "uza konviksaun hanesan regra atuasaun nian no uza de'it forsa, ka dalan susetível sira seluk hosi afeta direitu sira, liberdade sira no garantia sira hosi ema sira nian, bainhira esgotadu dalan sira seluk hodi rezolve ho dame konflitu sira".

Bandu uza arma sira servisu nian bainhira la halo funsaun sira no uzu hosi "instalasaun sira, armamentu sira, karreta sira no material sira seluk ba finalidade deskoñesidu hosi servisu".

Iha norma oioin kona-ba labele fuma iha fatin ne'ebé destaka, kona-ba labele konsumu álkol, kona-ba kuidadu ne'ebé iha hodi hetan empréstimu sira ne'ebé bele sai hanesan 'arma' koasaun nian no kona-ba regra sira seluk komportamentu nian.

Ajente sira tenki mantén atualizadu kona-ba normal legal sira ho regulamentar sira, labele "trata aat sidadaun sira ka ofende sira nia direitu lejítimu, fiar, kostume sira ho interese sira", maski laiha oras servisu nian.

Labele halo asaun ne'ebé viola lei la atua la tuir "moral públika no kostume lokal nian", no tenki iha kuidadu ho hijiene no aprezentasaun pesoal no mantén "kondisaun fíziku ho intelektual ne'ebé di'ak, liuliu labele hemu hemun alkóliku maka'as".

Regulamentu haree ba rekomensa disiplinar oin tolu - elojiu, lisensa tanba méritu ho louvor - no aplika kastigu disiplinar oin tolu - reprensaun eskrita, suspensaun ho demisaun, klasifika konduta iha "klase komportamentu" lima, hosi Dahuluk (ezemplar) to'o Dalima (aat).

Iha kazu suspensaun nian, hamenus prazu máximu hosi loron 240 ba loron 180, "liuliu tanba sé maka fila ba servisu hafoin afastamentu naruk ida, fila lahó motivu maka'as, la atualizadu no, ikusmai, ho susar maka'as atu integra fali, ikusmai la kumpri finalidade hosi prevensaun espesial pozitivu".

Lusa

 


Comentários

Critério de publicação de comentários