Pájina aktualizada iha 14:26h, domingu 09 Agostu

COVID-19: Sistema saúde kontinua la preparadu nafatin ba surtu maka'as

26 de Junho de 2020, 23:50

Sistema saúde konsege trava eventual kazu foun sira hosi COVID-19 ne'ebé maka mosu iha nasaun, maibé sei iha susar hasoru kontájiu ida ho dimensaun boot, maski preparativu balun iha fulan hirak ikus ne'e, haktuir hosi portavós hosi sentru krizi nian.


"Ho mínimu ne'ebé maka ami iha, bainhira mosu kazu foun ida ka kazu oituan, sei bele trava", hatete ba Lusa hosi portavós sira hosi Sentru Integradu ba Jestaun Krizi nian (CIGC), Pedro Klamar Fuik, ne'ebé kria hosi Governu hodi hasoru ho pandemia.

"Maibé bainhira mosu kazu sira ho dimensaun seluk, sei hamosu susar maka'as ba kapasidade atu sistema saúde Estadu nian hodi hatán", nia subliña.

Pedro Klamar Fuik ko'alia ba Lusa iha loron ne'ebé maka iha Timor-Leste - agora daudaun laiha kazu ativu hosi moras ne'e, hosi máximu ida na'in 24 ne'ebé akontese iha 24 Abril -, hakotu fulan konsekutivu datoluk ba estadu emerjénsia.

Nasaun laiha kazu ativu dezde 15 Maiu no, hahú hosi ne'ebá, autoridade sira atua nafatin, halo teste sira ba pasiente sira ho sintoma moras respiratóriu sira, iha ámbitu hosi "vijilánsia sentinela" ne'ebé implementa.

Ema na'in 150 resin maka iha hela kuarentena ka iha auto izolamentu no kuaze na'in 150 hein hela rezultadu sira teste nian. Nasaun halo, to'o agora, teste sira ba kuaze ema na'in 2300, ho na'in 2.500 resin liu ona hosi períudu kuarentena nian.

Final hosi estadu emerjénsia, ne'ebé hotu iha loron-sesta ne'e iha tuku 23:59, marka final hosi CIGC, ne'ebé nia responsabilidade sira agora pasa ba Ministériu Saúde no nia ekipa vijilánsia epidemiolójiku, hahú hosi fulan ne'e, lidera hosi ministra Saúde foun, Odete Belo.

"Ami hein katak fila ba situasaun hosi kordenasaun hosi Ministériu Saúde nian bele servisu di'ak liu hodi viabiliza saida maka falta halo hosi kondisaun nesesáriu sira hodi iha prevensaun adekuadu bainhira mosu situasaun ruma", hatete hosi Klamar Fuik.

Iha fulan hirak ikus ne'e, Governu insisti nafatin atu períudu ne'e sei permiti hadi'a kondisaun sira hosi sistema saúde nian, liuliu iha nível infraestrutura sira, ekipamentu sira ho ai-moruk sira.

Maski nune'e, no maski di'ak balun iha sentru izolamentu úniku, iha Díli, ne'ebé izola pasiente pozitivu sira to'o hetan rekuperasaun, no hosi preparasaun ba sentru kuarentena ida iha besik kapital, kondisaun jeral sira sai di'ak oituan.

"Estadu emerjénsia hamosu susar hodi sosa no hetan rekursu nesesáriu sira hotu hodi hatán ba situasaun real. Felismente, laiha transmisaun lokal no ami bele trava no kontrola kazu sira", nia destaka.

"Maibé situasaun hosi rekursu sira, liuliu infraestrutura sira ho ekipamentu sira sei depende hosi ekipamentu sira hotu ne'ebé fó hosi nasaun belun sira ho organizasaun internasional sira, liuliu máskara sira, ventilador balun, luvas ho ekipamentu hosi protesaun individual nian", nia subliña.

Pandemia COVID-19 halo ona ema rihun 487 resin mate no infeta ona ema millaun 9,6 resin iha nasaun ho teritóriu hamutuk 196, haktuir balansu ne'ebé halo hosi ajénsia notísia France-Presse (AFP).

Moras ne'e transmiti hosi koronavírus foun ida ne'ebé hetan iha final Dezembru, iha Wuhan, sidade ida iha sentru Xina nian.

Hafoin Europa troka Xina hanesan sentru pandemia nian iha Fevereiru, kontinente amerikanu agora hanesan fatin ne'ebé iha liu kazu konfirmadu no vítima mortal sira.

Lusa

 


Comentários

Critério de publicação de comentários