Pájina aktualizada iha 15:06h, domingu 09 Agostu

PM hakarak lori Orsamentu 2020 nian ba parlamentu iha Setembru

27 de Junho de 2020, 01:29

Iha loron-kinta ne'e, primeiru-ministru hatete katak Governu hakarak lori ba parlamentu iha Setembru proposta foun ida hosi Orsamentu Jeral Estadu (OJE) ba tinan 2020, aprezenta iha fulan tuirmai konta públika sira tinan oinmai nian.


"Ministériu Finansa aprezenta ona kalendáriu ida, ne'ebé sei aprezenta iha loron-segunda ba membru foun sira Governu nian, hodi nune'e bele haree planu, iha Setembru lori Orsamentu 2020 nian ba parlamentu", Taur Matan Ruak hatete ba jornalista sira.

"Lei defini katak to'o 15 Outubru, Orsamentu 2021 tenki aprezenta ba parlamentu", nia refere mós.

Rekorda katak nasaun iha duodésimu dezde 01 Janeiru, Taur Matan Ruak hatete ona katak valor hosi ezekusaun normal sira - ne'ebé hakbesik dolar millaun 100 fulan-fulan - sei la alkansa tanba pandemia COVID-19.

"Iha estadu emerjénsia, kapasidade ezekusaun nian hanesan ki'ik liu, maibé agora ho Governu kompletu ami hein atu aumenta, eleva ezekusaun hosi orsamentu duodesimal ne'ebé sei prolonga, karik to'o Outubru, to'o aprovasaun hosi orsamentu 2020 nian", nia esplika.

Taur Matan Ruak ko'alia ba jornalista sira hafoin nia enkontru semanal ho Prezidente Repúblika ne'ebé ko'alia ona, entre kestaun sira seluk, tomada pose hosi membru foun na'in 19 hosi ezekutivu iha loron-kuarta, kompleta nune'e elenku Governu nian.

"Ha'u senti kontente tanba ikusmai ha'u iha ekipa kompletu, hafoin kuaze tinan rua (…) ha'u hein atu ekipa serbisu no esforsa ba sidadaun nian di'ak, hodi nune'e mákina estadu nian hatán ba situasaun saúde nian, ba ekonomia ho ba problema sosial sira", nia destaka.

Lusa

 


Comentários

Critério de publicação de comentários