Pájina aktualizada iha 15:06h, domingu 09 Agostu

COVID-19: Governu ezekuta 604% hosi Fundu COVID-19 to'o fulan-Juñu nia klaran

29 de Junho de 2020, 21:31

Governu ezekuta, to'o fulan-Juñu nia klaran, 60,4% hosi dolar millaun 150 resin hosi Fundu COVID-19, hodi hatán ba pandemia, haktuir hosi relatóriu ida hosi Ministériu Finansa.


Relatóriu, ne'ebé asina hosi ministru Finansa, Fernando Hanjam, no ne'ebé maka Lusa iha asesu, haktuir katak ezekusaun hosi orsamentu to'o ona, iha loron 10 Juñu, dolar millaun 90,621 ka 60,4% hosi total.

Total ne'e inklui pagamentu sira prevensaun ho mitigasaun nian, iha folin dolar millaun 74,12 - 49,4% hosi orsamentu total hosi programa -, ho pagamentu sira ba programa asesu ba produtu alimentar sira, la'ós alimentar ho servisu sira, iha folin dolar millaun 16,5 - 11% hosi total.

To'o loron ne'e seidauk hala'o pagamentu ruma kona-ba programa hosi "aumentu sustentável iha produsaun ho produtividade", hakerek iha dokumentu.

Iha relatóriu, observa katak hahú loron 17 Abril, bainhira kria fundu, total hosi reseita maka dolar millaun 150,75, relasionadu ba transferénsia estraordináriu ida hosi Fundu Petrolíferu hosi dolar millaun 150 no doasaun sira ho apoiu finanseiru sira hosi Organizasaun Internasional Traballu nian iha valor dolar rihun 748.

Parte boot ida hosi gastu sira relasionadu ho apoiu sosial diretu ba família sira ezekuta ona dolar millaun 60,58.

Entre despeza sira seluk, relatóriu marka dolar millaun 6,36 resin, destinadu ba "izola ho trata kazu sira COVID-19 nian", no millaun neen resin hodi "apoia ba operasaun sira prevensaun ho mitigasaun nian".

Atribui ba gabinete PM nian, gasta ona dolar millaun 1,65 iha despeza sira hanesan 'catering', kombustível sira, material sira eskritóriu nian no "insentivu ba pesoal iha liña importante nian", sira ikus ne'e iha valor dolar rihun 600.

SECOMS gasta ona dolar rihun 200 resin liuliu iha funsionamentu hosi Sala Situasaun hosi Sentru Integradu ba Jestaun Krizi (CIGC) nian.

Iha kazu hosi Ministériu Negósiu Estranjeiru ho Koperasaun, parte boot - dolar millaun 3,17 - destina ba "apoiu konsular ba sidadaun timoroan sira iha estranjeiru ne'ebé afetadu ho atividade sira prevensaun ho kombate hasoru moras".

Ministériu Saúde hetan atribuisaun ba parte boot ida hosi gastu - dolar millaun 57,9 - inklui dolar millaun 1,62 ba hotel sira ne'ebé uza ba kuarentena, dolar millaun 2,75 ba reabilitasaun ho manutensaun hosi instalasaun sira kuarentena nian, dolar millaun neen hodi sosa ekipamentu médiku sira ho dolar millaun rua ba extensaun hosi sala Unidade Kuidadu Intensivu hosi Hospital Nasional Guido Valadares no hodi apoia iha tratamentu hosi kazu krítiku sira.

Dolar millaun 2,63 resin destina hodi harii sala sira izolamentu nian no dolar millaun rua hodi reabilita instalasaun sira izolamentu nian iha antigu Hospital Dr. António Carvalho.

Ministériu Agrikultura ho Peska rejista despeza dilar millaun 3,12 resin iha programa oioin.

Kona-ba Forsa Defeza Timor-Leste (F-FDTL) nian, kuadru hatudu gastu hosi dolar millaun 6,4, parte boot - dolar millaun 2,97 - relasionadu ba pagamentu hosi suplementu operasional ida ba ema na'in 2.161, dolar 45 loron-loron durante loron 30.

Destina mós dolar millaun 1,92 iha "ekipamentu ho material hijiene nian".

Iha kazu hosi Polísia Nasional Timor-Leste (PNTL) nian, despeza sira to'o dolar millaun 6,78, parte boot - dolar millaun 6,11 - marka hanesan "kustu hosi despeza operasional sira".

Atribui ba Sentru Lojístiku Nasional dolar millaun 16,52 hodi sosa foos ba rezerva hosi 'stock' alimentar Estadu nian.

Timor-Leste agora daudaun laiha kazu ativu COVID-19 nian no iha loron-sesta liubá hakotu ona períudu datoluk, durante loron 30, hosi estadu emerjénsia.

Lusa

 


Comentários

Critério de publicação de comentários