Pájina aktualizada iha 07:24h, kinta-feira 03 Jullu

Governu aprova limiti hosi dolar millaun 1,492 ba Orsamentu 2020 nian

29 de Junho de 2020, 22:34

Iha loron-segunda ne'e, Governu aprova ona limiti orsamental hosi dolar millaun 1.492,3 ba Orsamentu Jeral Estadu (OJE) 2020 nian ne'ebé sei hein atu aprova iha final Agostu.


Iha komunikadu, Governu esplika katak limiti hosi despeza sira ba tinan ne'e - nasaun iha duodésimu hahú hosi 01 Janeiru - aprova iha reuniaun estraordináriu ida hosi Konsellu Ministru sira iha Palásiu Governu iha Díli.

Entre prioridade sira Governu nian destaka "estabilizasaun hosi setor sosial, ho foku iha saúde, edukasaun, formasaun, bee ho saneamentu no estabilizasaun hosi setor ekonómiku, ho promosaun hosi investimentu iha setor privadu, kriasaun empregu, agrikultura ho seguransa alimentar no polítika makroekonómiku nian".

Prioridade sira inklui mós "reforma sira hosi administrasaun públika, ekonomia, sistema judisiáriu ho jestaun hosi finansa públika".

Hosi valor total ne'ebé gastu sira, Governu sei haruka 33,8% ba setor sosial (8% iha edukasaun, 15% iha protesaun sosial, 11% iha saúde) no 48,5% ba dezenvolvimentu ekonómiku ho infraestrutura sira (inklui medida sira ba estabilizasaun ekonómiku iha ámbitu hosi COVID-19).

Kalendáriu ne'ebé aprova iha loron-segunda ne'e kalkula atu proposta lei OJE nian - agora iha hela preparasaun - sei aprova iha Konsellu Ministru iha 26 Agostu, hodi haruka ba Parlamentu Nasional hahú loron 15 Setembru.

Kona-ba kalendáriu ba OJE tinan oinmai, proposta lei sei apresia iha Konsellu Ministru iha 25 Setembru hodi bele submete ba Parlamentu to'o 15 Outubru.

Limiti hosi despeza públika previstu ba tinan ne'e reprezenta diminuisaun ida hosi dolar millaun 175,7 relasionadu ho proposta ne'ebé Governu lori ba parlamentu iha final tinan 2019 nian no ne'ebé maka xumba tiha ona iha Janeiru liubá.

Proposta ne'e reprezenta ona diminuisaun ida hosi 14,46% iha proposta dahuluk hosi OJE ba tinan ne'e bainhira Governu aprezenta ona ba Parlamentu Nasional no ne'ebé hasai tiha ona durante debate iha jeneralidade no antes hetan votasaun hasoru protestu maka'as hosi maioria bankada sira iha momentu ne'ebá.

Lusa

 


Comentários

Critério de publicação de comentários